Aki ta sigui un resumen di noticianan policial pa loke ta dia 2 di Augustus 2017.
Cacalaca Blanco haciendo sospechoso cu auto supuestamente horta
SIRIBANA – Diaranson, pa mas of menos 1’or y 50 di marduga, durante patruya, polis atabata pasa banda di e Shap na Paradera y a topa cu un Nissan March color shinishi. Polis ta na altura cu un mesun auto a wordo horta algun dia pasa. Na e mesun momento un homber tabata saliendo for di e minimarket y a purba di drenta den dicho auto y diripente el a keda para banda di e auto, ora el a mira auto di polis. A controla e number di auto cu Central y esaki a bisa cu e no ta aparece den nan sistema. A base di esaki, polis a papia cu ehomber y a pidie pa e documentonan di e auto. E homber no a cumpli cu peticion di polis y a declara cu e auto no ta di dje y cu su amigo Venezolano G tabata na pia haciendo algo. Polis no a confia e storia. El a duna su nomber como JALF, miho conoci como Cacalaca Blanco, un conocido di polis y di husticia. E homber despues a declara cu e motor di e auto tabata paga, cual no tabata asina. Polis a topa cu e motor di e auto cendi. Tambe el a declara cu su slof y tas ainda tabata den e auto y cu e kier a haya esakinan. A base di esaki, e homber ta wordo sospecha di ladronicia y a wordo deteni, hiba warda di Santa Cruz, unda cu el a keda presenta dilanti di fiscal auxiliar, y despues encarcela pa mas investigacion.
Dama di edad ta wordo atraca
SERO BLANCO – Diaranson, pa mas of menos 1’or y 25 di merdia, Central ta manda patruya na un adres na Sero Blanco, pa un caso di atraco. Eynan a papia cu e dama CTA, kende a declara cu mas of menos 12’or y 15 di merdia, el a wordo atraca pa 2 homber. E hombernan tabata completamente na preto bisti y nan cabes tabata tapa. Solamente e por a mira e wowonan. Ambos homber tabata tin arma di candela. E hombernan a exigi’e pa el a duna placa. A. a duna nan 700 florin na e dos hombernan. Despues e hombernan a bula cura parti patras di e cas y a core bay. Alabes A. a declara cu e hombernan aki tabata papia Spaño, pero nan no tabata tin accento Spaño. Segun e dama, e dos hombernan aki tabata Arubiano. Atraco Team a wordo poni na altura y a bin na e sitio. Central tambe a wordo poni na altura.
Chauffeuer di Tourbus ta wordo para
EAGLE – Diaranson, pa mas of menos 9’or y mey di mainta, patruya di Strandpolitie a nota un pick up blanco skirbi Extreme island Tours, tabata coriendo con cu ta. Por a mira cu den e jeep tabata tin 4 turista y por a nota cu nan tabata riba un tour y tabata tin musica basta halto. Por a mira e jeep na altura di Baranca Plat, ta coriendo riba e parti strepia y despues den varios occasion tabata cambia di caminda di drechi p’arobes y tabata pasa e otro autonan. Den cuadro cu esaki, na altura di Blue Residence, por medio di zwaailicht y sirena a haci seña pa para e auto. Polis a logra despues di varios intento pa par’e na altura di La Quinta Aruba Resort. E conductor W., a wordo poni na altura pakico el a wordo para y tambe riba su comportacion riba caminda. W. a pidi despensa y a bisa door di e musica halto e no tabata sa cu polis a purba di stop’e. El a indica cu e musica tabata tin varios zonido cu tabata aparenta e sirena di polis. W. a wordo atendi riba esaki, mirando cu ta cu turista e tabata riba tour cun’e y cu e ta responsabel riba e manera cu tin cu comporta riba caminda publico y mester ta atento, pasobra esaki tambe ta conta cu si un ambulance of brandweer lo tabata su tras, si en caso cu nan mester bay rapidamente na un melding. W. a mustra comprension. Personal di DOPV a presenta pa control di entre otro debi cu e no tabata core cu e number O. riba e auto. Comandante na warda a wordo poni na altura.
Polis no por forsa turista paga pa algo cu e no kier
PALM BEACH – Diaranson, pa mas of menos 10’or y 37 di anochi, a drenta melding via Central pa yuda polis di Noord, mirando cu nan tabata druk cu otro trabaonan y a manda patruya di Strandpolitie na e luga. Nan a papia cu e homber W., doño di un taxi, kende ta conta cu el a busca un pareha den cercania di Gianni’s y a transporta nan pa Caribbean Palm Village. Una bes eynan, el a bin realisa cu un di e stoelnan, segun e, tabata muha. Door di esey el a yama polis, pasobra e hendenan no kier a paga 50 dollar, segun condicionnan di taxi. Papiando cu e turista, yama AM, e ta conta cu e ta dispuesto pa paga un suma, pero e ta haya 50 dollar absurdo pa un stoel muha. Polis ai ntermedia y e turista a paga 25 dollar. E chauffeur di taxi no por a compronde cu polis no por a forsa e turista paga e 50 dollar.
Windshield di auto a wordo kibra na Savaneta
SAVANETA – Diaranson, patruya di San Nicolas a wordo manda na un adres na Savaneta pa un caso di destruccion. Eynan a papia cu e dama H, kende a declara cu desconocidonan un biaha mas a kibra su auto. El a declara cu diasabra, pa mas of menos 7’or y mey di anochi, el a laga su auto na yabi para dilanti di su cas. Su casa a mira cu patras na e windshield di su auto tabata intacto. Ora cu el a bin cas despues di a sali, banda di 10’or y mey di anochi, el a mira cu e windshield tabata kibra. Keho a wordo tuma.
