Despues ku mas ku tres siman kandidatonan pa èksamen na Kòrsou a traha nan èksamen, e tenshon aki a kulminá dia 14 di yüni i pa algun skol dia 15 di yüni anterior, despues ku 2317 kandidato a risibí nan resultado di èksamennan final.
E periodo di èksamen sentral ta tras di lomba i den luna di yüni 2018 despues ku skolnan a risibí e normanan di èksamen di parti di Sentro di Ekspertisia pa Prueba & Èksamen (ETE) di ministerio di Enseñansa, kandidatonan, a risibí nan resultado di èksamen.
Resultado èksamennan final despues di e di dos periodo E resultado di èksamen despues di e di dos periodo ta mustra ku pa PBL (Trayekto edukativo Profeshonal Práktiko) 80% a slag, pa PKL (Trayekto edukativo Práktiko pa formashon di Kader) 79% i TKL (Trayekto edukativo Teóriko pa formashon di Kader) 75%.
Kompará ku aña pasá e resultado di PBL i TKL ta un krenshi (1%) mas mihó e aña aki.
Resultado di PKL a bai atras ku 5%.
Pa HAVO i VWO e resultado ta mustra ku pa HAVO 71% a slag i pa VWO 82%. E resultado di HAVO kompará ku aña pasa ta supstansialmente mas mihó, 12% mas, i pa VWO esaki a baha un tiki ku 4%.
