Diaranson 17 Januari 2018 a tuma lugar e asamblea general di Aruba Wieler Bond. Un reunion cu a wordo guia pa e directiva temporario y e comision cu a prepara e parti di eleccion pa un directiva nobo cu lo dirigi e federacion durante 2018.
For di un principio a duna di conocer cu e personanan interesa den un funcion den e directiva 
di Aruba Wielerbond, por a postula nan mes. A logra ricibi postulacion di un candidato pa e puesto di presidente. Asina mes a laga e opcion habri pa aseptacion di postulacion durante e reunion general. Esaki a conduci na cuater postulacion adicional. Di e forma aki a jega na e cantidad mínimo cu mester según e Statuut di AWB pa por forma un directiva.
E sala di reunion a conta cu un bon participacion di e clubnan miembro cu excepcion di cuater. Despues di firma e lista di presencia, a start cu e reunion general. E directiva saliente a trata e temanan riba agenda. Despues di e parti general, e comision a tuma encargo di e parti di eleccion y a guia esaki den un forma structura. Después di a presenta e postuladonan, a elige e directiva por medio di aclamación.
E directiva di Aruba Wieler Bond 2018 ta como lo siguiente:
Presidente: Randy Wilson
Secretaris: Zaida Everon
Tesorera: Jessica Koolman
Comisario: Silvhyanne Vrolijk & Gerald Rasmijn
AWB ta gradici tur hende cu a asisti na e asamblea y cu a copera cu e comision di elecion dirigi pa Charles Vis, Charmaine Ruiz y Andre Koolman. AWB ta desea tur su miembronan tur clase di éxito den e temporada di ciclismo cu ta start e weekend aki cu e prome careda di MTB.
