Den comunidad ta reina un disgusto y nan ta comenta riba libertad cu un pedofil a haya, na momento cu minister di husticia a pone su firma, kisas sin analisa bon, kico tabata e motibo cu un di e presonan ta cera. Aparentemente KIA ta yen.
Reginald Danies, kende ta un persona cu activamente ta vocifera contra di esaki. E ta comenta cu esaki ta contra politiek. Tin biaha bo ta tende hendenan ta bisa riba voogdijraad.
Danies a splica cu Voogdijraad no tin culpa, pasobra nan tin cu traha a base di ordo. Pa ora nan tuma un cierto medida, nan tin cu warda ordo. Pesey hopi biaha casonan ta tarda.
Danies mes no tin problema cu Voogdijraad.
Papiando di e caso specifico aki, Danies a splica cu tin ora e ta sinta pensa cu e hendenan aki nan mester por a wak e documento cu e persona su nomber. Ora cu mira bon, den KIA ta un trein a pasa y esey nunca lo bay cambia. KIA ta yen, mester saca hende. E minister por a haya un carta for di reclassering. Tur e hendenan aki ta traha cu reclassering. Reclassering tin cu manda tur e nombernan cu Ministerio Publico a pidi pa duna nan nan libertad. Por ta e minister por a yega coy papel firma. Si mira bon, den KIA tin luganan special pa pedofil. Ta imposibel cu tin 15 pedofil cera, net eyden cu net e luga di e homber tabata tin mester.
Danies ta haya esaki hopi straño. Tur aña trein ta core. Esta nan ta laga preso bay. Ta algo cu ta pasa semper y no por kita esey.
Separacion
Segun Danies, pedofilnan tabata wordo cera antes cu e otro presonan. Nan tabata un gang den KIA y tabata contra pedofil. Ta full un hala y eynan a bin cu e wega cu ora cu haya sa cu tin un preso ta un abusado di mucha, nan ta maltrata e personanan aki. Mirando e fenomeno aki, nan a dicidi e ora pa apart e hendenan aki. Ta casi 7 pa 8 aña pasa a cuminsa aleha e pedofilnan.
A sali liber prome cu su tempo
VI ningun hende no por kit’e. Pero pa e sali prome cu su VI, ta un fout den maneho. Den un sistema gubernamental y uno hudicial. E sistema gubernamental a faya. Nan mester a haya e documento di e sistema hudicial cu tal y tal nomber nan kier pa bay. Pero nan, esta e sistema gubernamental, por bisa cu nan no kier pa e bay y cu e mester sinta full. Nan a yega di haci esey cu otro casonan.
Maneho di husticia
Segun Danies, nada no a cambia awo cu tin un otro constelacion di minister. Ora cu Danies a sali for di KIA, el a haya problema, mirando cu el a wordo pinta den otro color. Aunke e por bisa cu el a sali brabo y ta acusa tur hende. Pero el a ripara cu e problema ta mas leu y e sa unda e ta sinta.
Caba cu e problema
Reginald Danies ta un persona cu ta bringa contra pedofilnan. El a bisa cu e lo susha muraya, nan a atende cun’e riba dje. Mientras tanto, cosnan ta sigui. Danies a splica cu periodistanan ta pinta e cos manera cu nan kier. Nan a atende cun’e, pero e no a haya boet, e no a haya nada. Pesey tur biaha e ta splica ora cu wak e grafitti, tur hende ta papia en contra. E mes ta bisa, cu e no a haya husticia. Su yiunan no a haya husticia. E homber ta afo keto bay. Pero si Danies mat’e, nan si lo bisa cu e victima ta un bon metsla, pero Danies mes ta criminal. Awo e mes ta keda riba dje keto bay, aunke e tin su problemanan cu e tin cu resolve. E lo sigui bringa contra pedofilia. Aunke, el a splica cu e ta bin mas sabi. Por ehempel ora cu e pint’e riba muraya, nan ta bis’e cu e ta daña Aruba su turismo, etc. E tin 4000 flyer caba pa parti pa turista, pa nan yiunan no bay yega na e gameroom por ehempel. Poco dia pasa tabata tin un suceso den un gameroom relaciona cu pedofilnan. Awo ta cuminsa cuida turistanan y nan yiunan. E ta sinti cu nan no ta proteha ora cu un pedofil mishi cu e muchanan. Si e ta susha muraya, e ta cuminsa parti flyer na e turistanan. Cuminsa proteha e yiu di e turistanan.
Wak si esey por cambia tambe. Esey ta su plan nobo. E tin cu resolve su propio problemanan, pasobra e sa cu husticia lo bay traha cun’e.
Kico mester cambia
E castigo, segun Danies, ta masha bon. Pero nan kiermen cu falta di placa etc. Danies no kier mete den tipo di cosnan ey, pasobra no ta su asunto. E no ta politico.
Ora cu e mucha yega na Kinder en zedenpolitie, e ta duna un declaracion. Nan ta coy esey y mande pa Ministerio Publico. Djey nan ta busca y cera e abusado. Pero ora cu yega den corte, hues ta wak cu no tin rapport di psicologo, ni di psikiatra, of otro. E ora ta bisa cu ta warda e caso un rato y ta bay bin despues di un luna pa trata esaki. Y kier pa e victima bin cu un rapport di psicologo, etc. Ora cu e victima haci esaki, ta bay ripara cu locual cu el a bisa na KZP, ta diferente. Pero un psicologo ta mas sabi y e por papia otro cun’e. Eynan ta caminda por bay bin cu dos declaracion y esey ta e problema grandi cu tin. Danies a bin dilanti pa su yiunan y a bin haya su mes cu yen di cos.
