Tabata dia 13 di juli ultimo, cu e compania Caribbean Forensic Services a conduci un investigacion riguroso internamente den nos compania nacional di distribucion di coriente, N.V. Elmar, relaciona cu sospecho di fraude y corupcion den e departamento di “Magazijn”. Den e proceso a investiga y a interoga e supervisor di e departamento, Mirlanda Maduro y su colega Jenny Donata. Ambos a admiti nan culpabilidad, sea parcialmente of hasta completamente durante interogacion, cu tabata conduci pa dos empleada di e compania di investigacion forensico.
E rapport preliminar ta den man di gerencia y Hunta di Supervision di N.V. Elmar. E rapport final sinembargo lo drenta den algun dia mas, cla pa bay Ministerio Publico pa un investigacion penal riba fraude den compania estatal.
E “modus operandi” di e duo aki ta bastante similar na e caso den Setar N.V., unda e empleado cu ta haci compras pa e compania, ta envolvi sea directamente of indirectamente cu e proveedor. Claro cu bisti completamente cu un bachi di conflicto di interes, e empleada ta suministra informacion confidencial di N.V. Elmar na e proveedor pa garantisa cu e ta gana tur “bid” pa servicio of producto di e compania. Di e forma aki e proveedor ta haya un ayudo for di paden pa semper su prijsnan ta skerpi y mas abou cu tur otro.
Pa e “fabor” aki, e proveedor ta paga 10, 15, 20 of tin biaha hasta 25% di e suma total na e empleada di N.V. Elmar. Den e caso specifico aki, e compania bou investigacion ta procedente di Merca y yama Silkac Utility Group, aunke tin mas nomber menciona.
Pero e fraude miyonario aki no ta sinta solamente na Merca, sino aki na Aruba tambe ta sospecha cu e compania ULS Unlimited Logistics Solutions & Services, situa na Balashi # 62-A di ta envolvi. E compania ta existi na Camara di Comercio desde 12 di december 2014 y for di e tempo ey N.V. Elmar ta e unico of un di e unico clientenan di e compania. Pa “casualidad” e directornan di e compania, pasobra a cambia varios, tur (of mayoria) ta sobrino(a)nan di e Supervisor di e Magazijn di N.V. Elmar.
E compania aki ta maneha mayoria carga y trabounan di logistica pa N.V. Elmar, pasobra semper su prijsnan ta resulta mas abou. Ta sospecha cu Mirlanda Maduro mes ta doño di e compania aki y ta uza famia como “front”. Di acuerdo cu e filenan di e investigacion preliminar, tin momento cu e Director di ULS tabata un sobrina di apenas 18 aña di edad, studiando na Hulanda, cu riba papel tabata Director di ULS na Aruba! Ora a sinti cu gerencia di N.V. Elmar a cuminsa haci preguntanan, a core cambia e Director dia 10 di april 2018, pues 3 luna pasa.
Mientrastanto ambos empleado di N.V. Elmar ta na cas, cu un prohibicion di entrada pa e oficinanan di N.V. Elmar. Di nos informe, parce cu tin hopi presion politico riba e caso aki y un interes enorme pa manda e investigacion “doofpot” pa cual mester vigila e caso masha di cerca. Ley di fraude mester conta mesun cos pa tur hende, pa tur compania estatal y pa tur departamento di Gobierno, no obstante famia di ken Bo ta of conoci di kende(nan) Bo por ta.
