Unda Aruba ta para cu exploracion. Esey ta un pregunta cu nos a haci na Armando Curret kende ta director di Compania Arubano di Petroleo. El a splica cu tin un contract cu Repsol y Total. Repsol ta e operator. E compania cu ta deal diariamente cun’e ta Repsol.
Ta conoci tambe cu na e momento aki ta encontra den e fase number 3 di e programa di exploracion di acuerdo cu e contract cu tin. Durante e prome fase sa cu tabata tin e sismica 2D. Durante di e di dos fase tabata tin e sismica 3D. Despues di esey a haci algun estudio adicional. Tabata tin estudio geokimico, heathflow. Recientemente, como parti di preparacion pa trabaonan di e di 3 fase, a haci un sitesurvey cu lo wordo incorpora den e estudio di impacto ambiental. Durante fase 3 cu tin un duracion di 2 aña y mey, cu lo caba medio 2019, tin obligacion di parti di e contratista pa haci un proefboring. Na e momento aki Repsol, hunto cu Total, ta haciendo tur e esfuersonan, tur e estudionan, tur e preparacionnan, manera e sitesurvey, pero tambe wellplanning design, tur e preparacionnan di logistica cu ta forma parti di un boorprograma. Nan ta trahando riba esey, cu intencion pa wak si den curso di 2018 lo haci e proefboring.
Na final di e di dos fase di exploracion, Repsol a pidi un extension di e di dos fase. Pero e fecha final di fase 3 a keda fiha, pa mita di 2019. Manera cu e desaroyonan ta bayendo awor aki, e ta bayendo di tal forma, cu ta como si fuera cu e extra rek cu a duna na final di e fase 2, como si fuera cu esey no a tuma luga. Por bisa cu e desaroyonan ta andando di un forma normal manera ta custumber durante di exploracion den un area nobo, cual ta e area cu tin panort di e isla. Por bisa cu tur cos ta bayendo satisfactoriamente na e momento aki.
E area
E area, segun Currett, cu tabata e contract area original den e contract, fase 1, ta un area bastante grandi cu tabata inclui e area bieu di añanan 1989/90. Cada biaha cu e contratista move di un fase pa otro, segun e contract, e tin cu duna bek 25% di e area di e restante di e area. Esaki a tuma luga dos biaha, na final di e prome fase y na final di e di 2 fase. Awor aki tin un area cu ta mas chikito y ta unda cu Repsol a identifica varios prospecto di cual dos di e momentonan aki ta di mayor interes p’e. Ta areanan cu ta keda panort di e isla den awanan toch un poco hundo.
Señalnan positivo
Tabata tin dos oportunidad cu e compania cu tabata tin un chens di go of no go, na final di e prome y na final di e di dos fase. Den tur caso e compania a dicidi di sigui pa e siguiente fase di e forma cu awor aki ta den e di 3 fase, unda cu tin e compromiso pa haci proefboring. Tur cos ta bayendo satisfactoriamente y normalmente, manera cu ta custumber den tipo di proyectonan asina.
