Prome Minister ta reuni cu presidente di Costa Rica riba varios temanan

Prome Minister Evelyn Wever-Croes a duna un relato amplio riba su biahe recien pa Costa Rica na unda cu el a wordo invita pa representa Reino durante e traspaso di mando di Presendente Luis Guillermo Solis pa Presidente Carlos Alvarado.

A tuma luga un ceremonia hopi bunita y emotivo na unda cu por bisa cu Aruba y Reino henter tawatin un luga hopi prominente no solamente den e celebracionnan sino tambe den importancia pa Costa Rica na unda presencia di Prome Minister a wordo hopi aprecia.

Aparte di e trasapso di mando y inauguracion di President Nobo, Prome Minister a probecha pa atende cu cierto temanan cu pa nos pais ta hopi importante. Entre otro e Premier di Aruba a reuni cu President y Vice President Nobo. Den e reunion cu President Carlos Alvarado y Vice President Epsy Campbell a wordo trata varios tema di importancia pa Aruba.

ARUBIG:

Un tema sin duda cu a haya su debido atencion ta tocante nos studiantenan cu ta studia na Costa Rica kendenan nan titulo no ta wordo reconoci aki na Aruba despues cu nan gradua. Prome Minister a sigura nan cu Gobierno di Aruba ta trahando y haciendo e esfuerso maximo pa finalisa e tramitenan pa soluciona e problema aki.

Den e proceso aki, Aruba mester ainda e asistencia di e Gobierno di Costa Rica pa motibo cu tin algun asuntonan di acreditacion cu mester wordo crarifica pa asina nan bay segun ley ta stipula. Segun ley, si un studiante di medicina a studia na Hulanda y tin un registracion di BIG e ta wordo permiti pa eherce e profesion aki na Aruba. Nos ley ta stipula tambe cu si un studiante ta cumpli cu un otro rekisito cua ta AruBIG, e lo por traha na Aruba.

Prome Minister a indica cu Minister di Salubridad, señor Dangui Oduber ta den e proceso pa fiha e condicionnan cu AruBIG por traha na Aruba. Den e cuadra aki Costa Rica ta hunga un rol importante. Presidente Alvarado di su banda a duna su palabra cu e lo brinda e cooperacion necesario pa yega na e informacion cu mester pa yena e parti di acredidacion aki. Esaki probablemente lo wordo acopla na e sistema nacional di instituto di acreditacion di Costa Rica.

COOPERACION ECONOMICO:

Otro tema di interes cu tawata hopi intenso tawata e tema di mas cooperacion economico. Importacion di fruta y berdura mirando cu Costa Rica ta posee hopi fruta y berdura cu ta asina barata cu a trece e pensamento si lo ta posibel pa importa fruta y berdura for di eynan. E rutanan di transporte naturalmente ta un poco complica. E ruta awo aki di Costa Rica pa Aruba casi ta solamente via Miami cu ta haci esaki un poco complica. Sinembargo, Prome Minister ta indica cu si tin mas volumen y cooperacion como tambe palabracionnan e ora esaki por bira interesante.

TURISMO:

E mandatarionan di Costa Rica a pidi pa Aruba yuda nan riba e tema di turismo. Nan a pidi pa nos experticio. Nan ta desea di desaroya nan waf, Puerto Limon, como un destinacion pa turismo crucero. Y ambos partido a duna nan palabracion cu lo traha hunto riba esaki.

Prome Minister ta bisa cu e reunion cu Presidente y Vice Presidente di Costa Rica tawata uno hopi fructifero pa ambos pais. Lo sigui mantene e relacion entre Costa Rica y Aruba pa asina yega na sigui papia riba e temanan y palabracionnan haci.