Djaweps último 5 di yüli promé minister Eugene Rhuggenaath a risibí di bishita sr. Henry González, Manager International Talent Development, di Major League Baseball (MLB). Sr. González tin na su enkargo aktualmente e proyekto di MLB Élite Development Program (EDP) na Kòrsou. E proyekto aki di MLB, sostené pa instansianan lokal Curaçao Baseball Development Foundation (CBDF) i Curaçao Tourism Board (CTB), ta dunando training intensivo na un grupo selektá di 35 pelotero hóben (13 – 18 aña) konsiderá e mihó talentonan di baseball lokal. Sr. González a informá promé minister Rhuggenaath ku Kòrsou tin e ‘momentum’ den baseball awor aki i ku MLB ke establesé su mes permanentemente riba nos isla i kontinuá ku desaroyo di nos hóbennan den un proyekto ku lo kore henter aña.
Pa promé minister Rhuggenaath e notisia aki ta sumamente positivo ya ku e ta mira deporte komo un instrumento importante pa desaroyá i eduká nos hubentut. Ademas deporte ya a demostrá su balor pa promové nos isla, unifiká nos pueblo i fortalesé nos norma i balornan. Ta bon pa informá ku ya kaba 3 pelotero ku tabata forma parti di MLB su proyekto aki riba nos isla a firma profeshonal pues den apénas un par di luna ya kaba e proyekto a mustra kon eksitoso e por ta pa nos hóbennan. Ta bon pa remarka tambe ku den e dos selekshonnan di Kòrsou ku a kaba di partisipá den e torneo di Senior League di Karibe, kaminda e selekshon di Pariba a titulá kampeon den un forma dramátiko, tin vários hóben ku ta train den e proyekto di EDP.
Aparte di ta train i forma e hóbennan pelotero MLB ke forma tambe coach i dirigentenan lokal ku lo por sigui engrandese e deporte di baseball na Kòrsou. Sr. González a ilustra komo ehèmpel e hóben Giuliano Salazar kende ta fungi komo asistente lokal di MLB pa e proyekto aki. E hóben Salazar, ku a hunga béisbol te ku Senior League na Korsou, a traha anteriormente pa e proyekto di Curaçao Baseball Week di Hensley ‘Bam Bam’ Meulens i pa medio di intervenshon di sr. Meulens a keda introdusi na e proyekto di MLB. Sr. González a bisa ku MLB ta hopi satisfecho ku su desaroyo i su manera profeshonal di traha i ta dunando tur nan asistensia pa e hoben aki sigui forma su mes komo un dirigente den e mundo di deporte profeshonal. E hóben Salazar tin plania pa bai Merka pronto pa kuminsa ku su estudio den Sports Management.
Por ultimo sr. González a komparti un nota interesante kaminda e la informá promé minister Rhuggenaath ku nos Ozzie Albies, segunda base di Atlanta Braves, ta e promé pelotero ku a pasa via di un asina yama ‘showcase’ di MLB pa skoutnan na Repúblika Dominikana ku a keda selektá pa hunga den All Star Game 17 di yüli próksimo. E echo aki lo keda selebrá pa e staf den ofisina di scouting di MLB enkargá ku Amérika Latina.
Promé minister Eugene Rhuggenaath a informá sr. González ku Gobiernu di su banda lo sigui duna sosten na e éksito di MLB su proyekto aki na Kòrsou i ku lo papia tambe ku otro koleganan den konseho di minister pa di tur banda duna sosten i fasilitá e establesimentu di MLB su operashonnan riba nos isla. Ta e deseo di promé minister Rhuggenaath pa e proyekto ta un éksito na Kòrsou i pa den futuro nos tin mas pelotero lokal ta militá den ekiponan profeshonal den MLB i ku pronto nos por ‘brand’ nos mes komo ‘Curaçao the Island of Baseball’.
