Tin un situacion caminda cu gobierno Venezolano a vocifera na cuminsamento riba cierto contrabanda di cierto materialnan cu dado momento a duda cu si nan ta papiando ta berdad. Pero finalmente a duna nan rason despues cu nan a bay, cu a haci un hayasgo na Aruba di e cantidad di oro, etc. Na Corsou tambe esaki no a pasa, segun prome minister di pais Corsou, Eugene Rhuggenaath. A base di nan propio responsabilidad a pidi pa haci investigacionnan. Eseynan ta andando pa wak si esaki ta tumando luga, pasobra den ningun forma kier pa e islanan keda uza como trampolin pa traficacion di productonan na un manera cu no ta cuadra cu ley y no ta cuadra cu normanan internacional. Pesey a cumbini cu Venezuela cu lo traha hunto riba esaki y algun paso manera Aruba a tuma. Corsou tambe ta prepara pa tuma esaki. Por ehempel productonan, tin cu verifica si nan tin e certificacion pa e keda exporta for di Venezuela.
Pa loke ta berdura, tin procesonan caba pasobra tin cu mira e parti cu Douane ta atende cun’e, pero tambe e parti di salubridad publico cu tin cu verifica cu no solamente productonan a sali for di Venezuela, pero tambe cu ta cumpli cu exigencianan pa loke ta higiena y pa locual ta salubridad (voedselveiligheid), tey caba. E controlnan ey ta keda, pero e parti di contrabanda, specificamente a palabra cu lo fortalece e controlnan y tambe, manera Venezuela a pidi, ta bay wak pa productonan, manera oro, cu nan ta considera materia prima di balor strategico, con esaki por keda repatria. Naturalmente manera cu minister presidente di Aruba tambe a duna di conoce, tabata tin un caso, manera cu sa, cu a intercepta un lote di oro cu a pasa via di Aruba, cu esaki ainda por bisa ta den investigacion. E oro ta eynan ainda, como parti di e investigacion cu ta andando. Esey ta un parti legal y nos bisiñanan di Venezuela por respeta esey. Awor aki, despues cu a firma e acuerdo, e comision mixto cu ta existi riba papel, si por bisa asina, for di aña 2016, mester bay reuni pa toca diferente tema, manera e acuerdo ta bisa, di interes comun. Ta e parti di Douane, e parti di traficacion di productonan ilicito, manera droga y arma, pero tambe intercambio comercial, turismo, etc. Tin algun desaroyo potencial, positivo tambe cu ta bay tin cuponan di trabao.
Esey no lo nifica cu e acuerdo aki, cu dialuna mainta nos lo mira un boto drenta haf di Corsou, cu material, por ehempel fruta, pisca, etc. of na Aruba. Por conclui cu esey no ta e caso. Tin cierto documento cu tin cu keda presenta pa verifica prome. Por spera si, awo cu e situacion a normalisa, pasobra esey ta algo cu sigur gobernador di Falcon a papia riba dje tambe na Venezuela y tin combersacion pendiente cun’e tambe como Corsou. Tin bishita pendiente di Gobernador di Falcon pa papia riba intercambio mas amplio economicamente y di parti di Corsou a bisa cu ta hopi habri papia di esaki, cu unabes e relacion normalisa, por spera cu e barconan lo bin.
Di parti di Corsou tin cu bisa, cu nan posicion tabata cu no lo laga e barconan di fruta y berdura drenta mientras cu fronteranan ta cera. Awo cu frontera habri, e posicion ey no ta relevante mas. Pero Corsou tin su conocido floating market, nan mercado flotante, cu ya a tuma un decision cu kier bay bin cu un producto nobo. Un producto cu ta actualisa, cu tin un producto turistico di mas calidad y cu ta representa cultura, artesania, etc. di Corsou. Un producto turistico mas genuino cu tabata te awor aki.
Esey no ta nifica cu nan ta habri pa e parti di importacion di fruta y berdura for di Venezuela. Al contrario, pasobra esey ta cumbini e consumidornan, pero kier organisa esey di un otro manera. Esey ta trabaonan cu lo bay cuminsa awor aki.
Con hopi Corsou a keda afecta
Na Aruba tabata tin un temporada cu tabata tin scarsedad y na momento cu a logra stabilisa e situacion, e prijsnan a subi y hopi. E ta hasta impagabel pa cierto grupo di hende. Segun prome minister Rhuggenaath, nan team cu ta cay bao di coordinacion di directorado di maneho di riesgo y calamidad, a vigila diferente area. E area di comestibel, e area di suministro di combustibel por ehempel, e parti economico tambe. E parti di conectividad, entre otro, pa wak kico e impacto tabata. A sinti naturalmente e parti di conectividad, Corsou sigur a sinti un impacto unda cu a perde completamente conexion cu Venezuela. Comestibel, mesun cos cu Aruba, nan tabata tin scarsedad di cierto producto. Eynan por mira sector comercial rapidamente busca e productonan aki for di otro mercado cu consecuencia cu pa cierto producto nan tabata tin prijs mas halto. Pero manera cu tin di compronde di consumidornan tambe, cierto producto tabata tin calidad hasta mas halto, pa papia di banana pa hasa, platano. Nan tabata di calidad mas halto, prijs mas halto. E consumidor al final ta dicidi, pero no tabata tin scarsedad di comestibel di tal indole cu por a papia e ora di un crisis alimenticio. Scarsedad tabata tin, prijsnan cu a subi, sigur. Y nan tabata tin controlnan intensiva di parti di ministerio di desaroyo economico y tabata tin impacto sigur pa e haf. E haf a mira menos actividad, por ta esey ta relaciona cu e situacion di PDVSA mes. Aeropuerto obviamente eynan a haya un impacto caminda cu no tabata tin vuelo mes. E jet semper cu tabata ekipa pa ricibi y procesa vuelonan di jetnan priva. Esaki si a haya un impacto enorme. 80 pa 90% di jetnan tabata bin for di Venezuela. E impacto tabata tey, pero segun e prome minister, a sobrevivi esey. A mustra e fortalesa tambe di e comunidad. E mandatario ta kere cu locual cu a siña for di esaki ta, cu tin cu sigui haci un esfuerso pa bira menos dependiente di Venezuela, sigur pa locual ta comestibel. A mira tambe mas agricultornan local tabata organisa mercadonan pa bende nan productonan y esey ta un desaroyo cu sigur lo kier mira.
