Glenn Thode no solamente ta rector di Universidad di Aruba, sino tambe e ta presidente di Conseho Electoral. El a papia di e desaroyonan di eleccion. Practicamente tur partido a logra nan firma, faltando un so, cual ta leu ainda di yega na dje. E ta conta kico ta lo ultimo pa loke ta e preparacion pa eleccion.
Thode a splica cu manera ley ta perscribi, despues di e dia di postulacion di candidato, e partidonan cu a entrega lista cu kier bay eleccion cu no tin asiento den Parlamento, nan lo mester a haya firma di sosten. E biaha aki tabata 578 firma. Tabata tin un sistema moderno y electronico pa controla inmediatamente si un hende pa bin duna firma di sosten, si e persona aki ta cumpli cu e criteria di sosten aki pa por duna un sosten valido. Esey kiermen cu di biaha cu nan pone nan firma, esaki ta un firma valido. Por a tene e proceso hopi exacto pa yega na e 578 firmanan aki. En berdad, te awe, e informacionnan cu tin ta cu falta un solo partido cu a entrega lista pa haya e firmanan di sosten. E proceso a bay segun CSE, manera cu nan a premira cu e lo por cana, bastante soepel mirando e sistema di control cu tabata tin. Naturalmente tabata tin diferente comentario den comunidad, encuanto e manera cu e proceso aki a ser organisa. A purba di simplemente duna informacion cu esaki ta e forma cu esaki ta perscribi pa ley manera cu ta organis’e. Naturalmente ta scucha tur e hendenan cu tabata tin comentari y ora cu evalua henter e proceso, lo tambe tene na cuenta y procesa e diferente comentarionan cu a haya riba esaki tambe.
E otro trabaonan
Ta bay tin color di partidonan, e trahamento di lista, e partimento di carchi di voto. Thode a splica cu e proceso cu ta sigui awo, cu despues cu a acumula tur firma, ta bin un otro proceso di preparacion. Pa cuminsa analisa tur e rekisitonan cu mester cumpli legalmente pa ley pa por bisa cu e lista a ser entrega legalmente, cada candidato eyriba ta postula legalmente. E criterianan di sosten ta legalmente cumpli. Diabierna awo, Conseho Electoral lo tin un reunion. Den esaki lo haci loke nan ta yama pa ley un investigacion. Ta repasa e listanan aki pa mira si tin cualkier un verzuim pa ley tambe. Cualkier algo cu un di e criterianan cu no a cumpli cun’e completo, lo mester comunica na esun cu a entrega e lista cu falta un of mas criteria, por ta pa cumpli cun’e completamente, tin un periodo cortico pa coregi esaki. Despues cu e periodo ey a pasa, si no tabata tin tambe protesta of otro forma di desacuerdo encuanto esaki, lo por bay den reunion y e ora eynan ta stipula e listanan cu nan ta cumpli cu criteria legal. Despues di esey, den reunion mester mira tambe e secuencia cu ta bay riba e stembiljet, cu ta determina esaki nan tur. Despues e colornan tambe y e ora por bisa cu e proceso aki ta tras di lomba y por bay na e proceso pa prepara pa eleccion cu ta entre otro cu basta cerca di eleccion e comunidad, personanan cu ta forma parti di e electorado di Aruba, lo cuminsa ricibi nan carchi pa bin vota. E personanan cu ta bay forma parti di e stembureaunan lo ser entrena y naturalmente nan ta ser nombra despues. Tur e preparacionnan practico pa mira si en berdad por richt in, organisa tur e localnan caminda cu e stembureaunan ta bay ta ubica. Tur esakinan ta e proximo pasonan cu tin cu tuma. Naturalmente, dia 22 di September, e dia lo habri cu tin tur cos na nan luga pa e proceso di votamento por tuma luga e dia ey na Aruba.
