Presidente di Cft Raymond Gradus: “Kontròl riba presupuesto i riesgonan relashoná ku esaki no ta sufisiente

Durante di su bishita na Kòrsou e Kolegio di supervishon finansiero pa Kòrsou i Sint Maarten a indiká ku mester di mas bista den i mihó guia den ehekushon di e presupuesto.

E situashon finansiero i e riesgonan ku esaki ta trese kuné pa Kòrsou ta motibu pa gran preokupashon pa Cft. Pa 2018 mester kompensá por lo ménos 1/3 parti di e défisit preliminar di 113 mion florin di 2017, i tambe mester evitá pa e défisit aki haña un efekto struktural. Pa logra esaki gobièrnu miéntras tantu a tuma sierto medida i a inkorporá esakinan den e adaptashon di presupuesto 2018, kual ainda keda aprobá pa Parlamento. E promé reportahe di ehekushon di 2018 no ta indiká sufisientemente kiko e efekto di e medidanan tumá ta. Ademas e reportahe di ehekushon ta mustra ku pa algun di e riesgonan, for di awor kaba medida adishonal ta nesesario, pa por logra evitá un défisit nobo pa 2018. Cft entre otro a pidi e Minister pa indiká promé ku 11 di yüli awor kua efekto e medidanan pa redusí gastu i medidanan pa mehorá kumplimentu ku deber di paga impuesto a trese kuné. P’esei eksplísitamente a pidi pa presentá medida pa por atendé ku posibel kontratempu i efektonan di riesgonan.

Durante di su biahe Kolegio a papia ku Gobernador, Konseho di Minister, Minister di Finansa, komishon finansiero di Parlamento i e Direktor i Supervisor Ministerial (Ministeriële Regisseur en Toezichthouder) di HNO. Mañan ta sigui un reunion ku Kontrolaria General.

Resultado di medidanan nesesario pa korekshon

Segun e informashon mas resiente e défisit preliminar di 2017 ta 113 mion. Konforme presupuesto 2018 e aña aki lo kompensá 48 mion pa medio di diferente medida. E promé reportahe di ehekushon di 2018 ta kontené muchu poko informashon tokante di e resultado di e medidanan aki, pero sí e ta mustra ku e impuestonan den e promé kuartal ta desapuntá. Durante su último bishita Cft a insistí pa gobièrnu traha reportahe mensual di moda ku e progreso di e presupuesto en general, i e kompensashon di e défisit en partikular lo por bira mas bisto. Esaki ta nesesario pa por hasi adaptashon na tempu, den un aña den kua e presupuesto ta bou di preshon i tin poko espasio pa por atendé ku kontratempu. Cft a indiká e Minister ku te ainda no tin sufisiente bista kon Kòrsou ta mantené kòntròl pa logra ku ehekushon di e presupuesto ta keda denter di e márgennan definí. Sin medida adishonal un défisit nobo ta parse inevitabel. Pa e motibu aki mes Cft a pidi Minister pa prepará medida pa por atendé ku posibel kontratempu. Mas aleu Cft a menshoná kon importante ta pa logra realisá un presupuesto balansá, den kuadro di kresementu ekonómiko. Invershonistanan ta balorá finansa públiko stabil ya ku esaki ta kontribuí na un klima di invershon konfiabel. Ademas, hasi fiansa bou di kondishonnan favorabel via di Hulanda ta solamente posibel si e presupuesto ta balansá.

Tradukshon di resultadonan análisis di riesgo den presupuesto 2018

Diferente riesgo tabata di gran influensia riba ehekushon di presupuesto 2018, di kua un kantidat ya ta materialisando. E riesgonan di Sehos, HNO i diferente dividendo di kompanianan di gobièrnu ku ta pendiente, por tin un impakto grandi riba e presupuesto i mester keda kontrolá aktivamente. Tambe tin riesgo den e ehekushon di e medidanan pa redusí gastu, den e medidanan pa mehorá kumplimentu ku deber di paga impuesto a trese kuné, den e kobramentu di impuesto i e situashon rondó di e refineria. Cft p’esei a pidi Minister komienso di e aña aki pa hasi un análisis di riesgo. Despues di risibí esaki, Cft a pidi pa elaborá mas ampliamente riba vários punto i tambe i supstansiá nan mas. Mester tradusí e resultadonan di esaki den e presupuesto 2018.

Suseshon

Gobièrnu ta na turno awor pa tuma akshon riba término korto riba e puntonan ku a keda tratá. A pidi Minister pa informá Cft promé ku 11 di yüli tokante di e kontenido i progreso di e konsehonan i preguntanan habrí. Cft a vosiferá ku esaki ta nesesario pa hasi e presupuesto kompleto, sufisientemente transparente, ordená i kontrolabel, konforme e Lei di Reino tokante di supervishon finansiero. ken.

Último biahe di kolegio di Sybilla Dekker i Maria Plantz

Durante e biahe aki ta tuma despedida di miembronan di kolegio Sybilla Dekker i Maria Plantz. Dekker ta baha 1 di yüli di e aña aki; e ta miembro di Cft for di verano di 2012. Sybilla Dekker tokante di su periodo den Cft: “Mi a eksperenshá e koperashon ku Kòrsou komo konstruktivo i mi ta spera ku e desaroyo ekonómiko – basá riba finansa públiko sostenibel – ta trese oportunidatnan pa Kòrsou”. Pa Maria Plantz tambe esaki ta su último biahe di kolegio, ya ku a proponé pa entrante 1 di òktober e bira miembro di Raad van State pa Sint Maarten. Entrante yüli 2018 Cft ta konsistí di Raymond Gradus (presidente), Gregory Damoen (Kòrsou) i Henk Kamp (Hulanda). Pronto lo bira konosí ken lo bira susesor pa Sint Maarten.