E “Hoofd Redacteur” di e corant Hulandes NRC Handelsblad a presenta un protesta na Minister President Evelyn Wever-Croes, despues cu el a bisa den varios medio cu e corant a cit’e eroneamente. NRC ta yama esaki “dañino y iresponsabel” cu e Prome Minister na e manera aki ta purba di hala su mesun palabranan aden. Ta trata aki di un entrevista relaciona cu e asunto di refugiadonan for di Venezuela y e rol cu Hulanda ta hunga den e asunto.
Den e entrevista Wever-Croes a bisa entre otro cu e ta haya postura di Hulanda riba e cuestion rond di e refugiadonan di Venezuela, iritante. Tambe el a bisa cu el a wordo invita pa un reunion na Caracas cu e Minister Hulandes Stef Blok, pero el a nenga di bay. “Mi no ta participa na ningun show”.
Awo e Prome Minister ta nenga di a bisa esaki. E corant no a haya ningun peticion rectificacion. Den e notanan di e entrevista, ta para preto riba blanco cu e Premier si a bisa esaki. Coresponsal Nina Jurna tin e reputacion como un periodista hopi precies.
“Aparentemente bo ta sorprendi pa e impacto di bo palabranan,” e redactor a skirbi e Prome Minister di Aruba den un carta. “Esey ta comprendibel, pero bo no por soluciona esey door di acusa nos den forma falso di ta suministra informenan poco confiabel. Nos ta pidi pa bo retira bo declaracion cu NRC lo a cita Bo incorectamente, di inmediato y publicamente“. Prome Minister Wever-Croes ainda no a responde na e peticion aki.
NRC ta asumi publico cu no lo tuma e negacion aki di Prome Minister Wever na serio y lo lag’e te aki.
