“Ta un hecho cu Gabinete Mike Eman cu maneho fatal a crea e crisis financiero. Esey ta un hecho! Pero si bin un KB of Aanwijzing, kende realmente ta haya esaki? Gabinete Mike Eman of e actual Gobierno Wever-Croes?”, asina e lider politico Benny Nisbet di Partido PPA ta puntra. El a splica awe cu constitucionalmente e fin di responsabilidad di Gabinete Eman a yega dia cu nan a baha.
“Nan por a causa e MEGA DEBE pero awor nan NO ta responsabel pa saca Aruba for di e crisis. Esun hibando e maneho financiero pa saca Aruba for di e crisis financiero ta nos actual Gabinete Wever Croes”, segun Nisbet. E politico veterano a enfatisa cu “Ta e maneho aki cu CAFT ta evalua, analisa y eventualmente conseha hasta demanda cambio! Ta e maneho aki cu por ricibi un AANWIJZIJNG/KB!!”
Benny Nisbet di Partido PPA a enfatisa, despues di a analisa e acuerdo riba mesa awor entre Gabinete Wever-Croes y CAFT, cu pa awor “Ta e maneho aki CAFT a caba di pone su condicionnan: Cu mester baha 12 miyon riba gastonan di personal na 2018. Y cu mester bay Parlamento pa e mayoria di MEPORED aproba mas medida!”
E lider politico di PPA a sigura cu “Ta bao di e condicion aki Gabinete Wever-Croes a scapa un aanwijzing/KB…Esey ta e realidad!”
Na final, Benny Nisbet (PPA) a bisa “Nos ta desea nos Gobierno exito cu su maneho…..nos ta condena esunnan cu a causa e Mega debe ….pero nos ta preocupa pa esunnan….ambtenaarnan….cu kizas lo wordo sacrifica den cualkier forma. What’s in a name y esaki nos lo keda proyecta conforme nos analisis y conforme locual pa nos ta e berdad!”
