Thursday, 27 November 2014
Minister Michelle Winklaar a enfoca riba loke “ainda falta” Print E-mail
Sunday, 25 August 2013 19:55
Comparti

front

Algun mil hende a aglomera den Aruba Entertainment Center pa atende e Congreso 2013 di Partiso AVP. Separa di e candidatonan y Parlamentarionan, e Ministernan cada un a repasa nan maneho den e ultimo 4 añanan y cu un indicacion cla riba e “ainda falta” den e siguiente periodo di gobernacion.

Minister di Asuntonan Economico, Asuntonan Social y Cultura, Michelle Hooyboer-Winklaar, a sigura cu AVP tin un plan cla, yena di detayenan di tur locual nan a a atende, e papia cu expertonan y cu e pueblo, riba aspectonan social, economico y cultural. “Durante e ultimo 4 añanan, nos tabatin e privilegio di topa hendenan extraordinario riba nos dushi isla. Nos a haya oportunidad di combersa cu hopi di nan den diferente area y asina haya sa un tiki mas di loke nan kier mira y ta desea pa Aruba. Apesar cu na hopi luga cu nos a bishita, nos ta tende bon trabou, nos ta consciente cu di berdad ainda falta.”, asina e mandatario a cuminsa su discurso. Minister Michelle Hooyboer-Winklaar a resumi tur unda el a traha pa bienestar general di nos pueblo y tambe a enfatisa na cada aspecto cu ainda falta pa eherce hopi trabou. “For di nos artistanan y nos artesanonan, cu pa añanan largo a lucha pa haya reconocimento pa nan valioso trabou, cu no ta solamente importante riba e aspecto di cultura, pero tambe economicamente, ey ta unda ainda falta! Nos a implementa e stempel di ‘Traha na Aruba’, pa duna nos artesanonan local e balor cu nan merece y crea mas oportunidad economico pa nan. E personanan cu ta stima nos naturalesa, nos Parke Nacional Arikok, nan a bisa nos cu nan kier wak mas proteccion pa nos Flora y Fauna y eynan ta unda ainda falta! P’esey mes nos ta introduciendo e ley, unda e shoco ta bira nos simbolo nacional, pa asina nos nunca lubida nos beyesa di naturalesa. E empresarionan nobo, cu tin ambicion den nan wowonan y cu ta cla pa contribui cu economia di Aruba, pero tin biaha ta pasa dificultad pa haya prestamo. Ey ta unda nos trabou ainda falta! P’esey nos ta bin cu e programa di ‘micro finances’ pa duna acceso na credito na tur esunnan cu kier habri un negoshi chikito, of tambe p’esunan cu kier expande nan negoshi chikito y haci nan soño bira realidad. Nos companianan local, cu a lucha den un crisis economico, pero nunca a ‘give up’ y awo ta mirando un cambio y nan tin confianza den nos economia, cu ta mas grandi cu nunca y ta invertiendo den nan propio pais y hendenan, cual riba su mes ta impresionante, pero ainda falta! P’esey nos ta trahando riba e di 3 pilar economico, pa asina crea mas oportunidad pa nos companianan local. Nos hende muhenan cu a bisa nos cu nan kier mira igualdad riba nos isla, pero mas ainda, nan kier biba riba un pais unda cu violencia domestico ta algo di pasado y no ta existi mas, esey ta; e ainda falta! Nos kier sigui kibra tur e silencio di tur tipo di maltrato y abuso, tanto di hende muhe como di mucha, biniendo cu e programanan pa sigui conscientisa nos hendenan tocante tur tipo di abuso y maltrato pa asina preveni abuso y maltrato. Nos no por lubida e grupo di nos grandi nan, cu ta e personanan cu a construi e Aruba, cu nos conoce awe. Nan a traha incansablemente pa cria e generacion actual. Nan merece un bida di trankilidad y cu cuido optimal, p’esey nos a introduci e ley di reparatietoeslag y lo introduci e ley cu ta regula tur cas di cuido, pa sigura cu nan tin cuido di calidad. E mandatario tabata ricibi aplauso y apoyo for di e publico na momento cu e tabata menciona cada aspecto di trabou y unda nan kier sigui traha riba dje. Loke a impresiona mas, tabata ora cu el a menciona e dama, Desiree di 23 aña, cu tin e malesa MS, cu ta un malesa di musculo, cu a pone cu awe no por cana mas y ta den rolstoel. E tin deseo pa traha, pero tur caminda cu el a bay solicita, nan a neng’e trabou, pasobra e personanan no ta realisa cu su aparencia fisico no tin nada di haber cu su capacidadnan. Pues mester sigui conscientisa nos pueblo riba tur e derechonan humano, specialmente esunnan cu limitacion, pa asina integra nan den nos comunidad y crea oportunidadnan husto y igual, pa nan tambe contribui. “Tur hende cu ta biba na Aruba merece un bida di felicidad, p’esey partido AVP kier sigui traha riba tur e aspectonan cu ainda falta, pero nos mester di boso sosten dia 27 di september pa transforma e ‘ainda falta’ pa ‘Nos a logre hunto’, asina Michelle Hooyboer-Winklaar a termina bisando, meymey di aplauso y banderanan di AVP den halto, apoyand’e pa e sigui traha duro pa cumpli cu tur locual AVP tin poni den su programa di partido.

gallery1 gallery1 gallery1
gallery1 gallery1 gallery1

Comentarionan (0)Add Comment
Duna Comentario y/of Comparti riba Social Medi
 
  smaller | bigger
 

busy
Comparti
 

Connect with Us

Newsletter