Tuesday, 29 July 2014
Werksternan di Gobierno hopi contento y orguyoso di Prome Minister Mike Eman Print E-mail
Friday, 16 August 2013 18:38

20130816 Werksternan di Gobierno hopi contento y orguyoso di Prome Minister Mike Eman

Diaranson ultimo Gobierno di Aruba a firma cu sindicato SEPPA e acuerdo caminda ta introduci un sistema nobo pa hisa entrada di e empleado di mantencion den aparato publico y fundacionnan subsidia pa gobierno. E sistema aki ta basa riba nan añanan di servicio y ta un logro grandi pa e sector aki cu tabatin mas cu 20 aña sin conoce un aumento di salario.

Na e acto di firma cu a tuma luga na sede di SIMAR na Sabana Blanco tabata presente un grupo grandi di e trahadonan balente aki. Cu hopi entusiasmo y satisfaccion nan a expresa nan gratitud na Gabinete Mike Eman kende finalmente tabata esun pa reconoce e necesidad di atende cu e asunto y pone tur empeño pa concretis’e lo mas pronto posibel. Un di e werksternan cu a expresa su alegria ta Sra. Ana Dirksz, kende pa mas di 16 aña caba ta traha na Censo. El a conta di e caminda difícil cu a cana pa yega na e logro aki. “Nos a lucha semper y nunca nos a logra haya nada. Semper e werksternan tabata wordo wanta abou. Dios a corda di nos cu nos Prome Minister a bin, cu a logra yuda nos,” e señora a bisa. Mescos cu otronan den su profesion, e ta gradici pa loke e gobierno aki a haci. “Ami ta weit’e asina y nan tambe, esta cu mi coleganan ta hopi contento y orguyoso cu Minister President a corda riba nan tur, paso ningun otro gobierno a corda riba nan.” Otro bunita ehempel di e bon cu e acuerdo aki ta nifica pa e trahadornan aki ta e caso di Sra. Josefa Wernet, kende ta fungi como werkster na Hulpbestuurskantoor San Nicolas ya pa 13 aña. E ta bisa “Mi ta masha contento cu loke gobierno ta haciendo. E unico cu ta trahando cu pueblo y esun cu kier pa tur su hendenan bay dilanti. Sra. Wernet a splica cu e entrada adicional ta cay den hopi bon tera y lo sirbi pa yud’e yega na su propio cas. “Mi ta trahando mi cas. Awor e ta na ringbalk y mi ta bay sigui cune. Awo mi ta pagando hopi na huur. Riba mi propio forsa lo mi caba cune.” Sandra Jones di su banda, ta spera cu e bon trabou cu Gabinete Mike Eman ta haciendo, por continua ora cu e ta bisa “Mi ta hopi contento cu loke Gobierno a haci pa nos y pa e proximo cuater aña nan por sigui bay dilanti,” asina e werkster na SIAD a indica. E mehoracion aki den nan posicion huridico ta representa un adelanto den nan poder di compra, pero ta nifica tambe cu como empleadonan satisfecho, nan lo ta mas stimula y productividad ta aumenta. “Nos ta hopi feliz como colega, cu nos a bay dilanti, cu nos contract y cu nos por haci mas cu nos placa. Mi ta hopi feliz cu e aumento y awo mi ta bay wak kico mi por haci.” Werksternan ta representa den e aparato publico un grupo di mas o menos 300 empleado humilde pero balente cu ta haci un trabou importante pa percura cu e ambiente di trabou ta uno limpi y agradabel. Den e acuerdo nobo tur ta ricibi un aumento cu por yega na casi 500 Florin pa luna extra, depende di e cantidad di aña di servicio.

Comentarionan (0)Add Comment
Duna Comentario y/of Comparti riba Social Medi
 
  smaller | bigger
 

busy
 

Connect with Us

Newsletter