Tuesday, 23 September 2014
Control den centro di Oranjestad ta sigui Print E-mail
Thursday, 15 August 2013 17:30

DSC 8146

Diahuebs mainta Minister di Husticia Arthur Dowers, hunto cu Alto Comisario Richardson y Hoofdagent Ras, a bishita e parkinglot patras di Caya G.F. Betico Croes unda cu adictonan ambulante ta causando molester na e comerciantenan como tambe cliente y bishitantenan di nos Caya Grandi.

Den e area aki tin entre otro Hotel Central y e edificio unda antes tabatin The Music Box, cual awo ta bashi y bandona y e adictonan ta uzando e edificio como dump y un luga pa drumi, entre otro. Dos siman pasa a cuminsa cu un accion grandi di parti di Cuerpo Policial pa avisa e adictonan cu nan mester bandona e area. Minister Dowers a splica cu e adictonan cu kier rehabilita y cambia nan bida lo ricibi ayudo y otronan cu ta cometiendo actonan criminal, ora nan wordo deteni lo wordo poni bao di curatela na momento cu e ley penal bay na vigor. Tambe, e mandatario a bisa cu e proceso civil pa pone adicto bao di curatela ta vigente semper y famianan por apela pa esaki wordo haci, unda cu nan ser keri cu a cay den adiccion por wordo admiti na un centro di rehabilitacion obligatorio. Na cuminsamento di e siman aki Minister President Mike Eman y Minister Sevinger a uni nan mes na accionnan di polis y a laga haci un parti grandi di e area aki limpi di tur desperdicio cu a wordo dedump, principalmente pa e mesun adictonan. E area tabata hopi sushi y ya despues di un dia por a nota un diferencia grandi. Mientras cu e area tabata cuminsa mustra miho, cu e limpiesa andando, diahuebs Minister Dowers a constata cu atrobe tin areanan unda cu desperdicio cu ta bin for di e tiendanan a wordo gedump. Manera e mandatario a subraya anteriormente, esaki ta inaceptabel y e ta ripiti su apelacion di ayera pa comerciantenan no laga e chollernan tira sushi afo pa nan, pero pa nan mes percura pa deshaci di esaki na un forma responsabel. Tin leynan y reglanan di higiena y medio ambiente na Aruba y ta wordo spera cu tur ciudadano di Aruba ta coopera, actua responsablemente y tene nan mes na esakinan pa un Aruba dushi, limpi y placentero pa nos tur. Tin un cantidad grandi di keho contra e adictonan pa e forma cu nan ta trata cu hendenan cu ta para nan auto den e parkinglot aki. Nan ta pidi limosna, pidi placa pa “cuida” e autonan y ta laba auto sin permiso di e doño pa despues exigi placa pa nan “trabao”, nan ta hasta menasa doñonan di auto cu nan lo baha nan taira si no paga nan, entre otro. E insiguridad den e area aki ta debi principalmente na e presencia di e adictonan y particularmente pa e forma cu nan ta actua, cual ta wordo determina pa e influencia di e substancianan illegal y toxico cu nan ta uza. Esaki no ta aceptabel y ta haciendo tur esfuerso di parti di Cuerpo Policial y otro departamentonan di Minister Presidente Eman, Minister Dowers y Minister Sevinger pa mehora siguridad y trece trankilidad bek den e area aki.

album album album
album album album
album   

Comentarionan (0)Add Comment
Duna Comentario y/of Comparti riba Social Medi
 
  smaller | bigger
 

busy
 

Connect with Us

Newsletter