Wednesday, 03 September 2014
Minister Arthur Dowers: Proyecto John F. Kennedyschool ta apoya desaroyonan pa loke ta calidad di enseñansa y servicio Print E-mail
Monday, 12 August 2013 17:23

DSC 7383

Centralisacion di tur servicio brinda di parti di Ministerio di Enseñansa lo duna realse na e experiencia pa tur grupo di interes, esta maestro, mayor, alumno y otro stakeholders cu un of otro relacion cu e ramo di enseñansa na Pais Aruba.

Ademas di mehora e eficiencia den brinda servicio na nos comunidad, e proyecto aki lo yuda baha gasto di huur di edificio cu 160 mil florin pa luna pa e presupuesto di Ministerio di Enseñansa. Minister di Husticia y Enseñansa, mr drs Arthur Dowers ta sumamente contento cu e decision pa dedica e complex di ex-John F. Kennedyschool na enseñansa y pa trece aki hunto tur servicio. E servicionan aki ta encera entre otro Departamento di Enseñansa, Inspeccion di Enseñansa, como tambe e oficina local di UNESCO – United Nations Educational, Scientific and Cultural Organization. Minister Dowers a expresa cu aki por mira un otro proyecto tangibel, cu no ta keda na papia, pero unda cu ta tuma accion pa realis’e. E edificionan di John F. Kennedyschool a keda para bashi y a deteriora despues cu e scol a muda pa un otro localidad y awendia ta parti di EPB, pero e edificio tabata bon traha y stabil y ta un bon base pa crea e complex dedica na enseñansa. Cu e restauracion y renobacion di diferente edificio, incluyendo Corte di Husticia, gobierno ta dunando balor na e historia y cultura di Aruba y respet na tur e generacionnan kende a traha pa construi y desaroya nos pais. Gabinete Mike Eman ta poniendo e edificionan aki na disposicion di nos comunidad, cual ta un decision cu ta hayando bon sosten for di nos comunidad. Minister Arthur Dowers a expresa elogio pa e vision di Prome Minister Eman pa loke ta trata e renobacion di Pais Aruba, unda cu e parti di infrastructura y estado fisico di edificionnan historico ta hayando su debido atencion. Minister Dowers a añadi cu e ta orguyoso di ta parti di un team cu no ta papia, pero ta traha duro pa realisa locual nan a pone nan dilanti; proyectonan y decisionnan enfocando riba e mehoracion di bienestar general y e progreso y desaroyo di e ser humano. Dialuna mainta a reuni cu prensa dilanti e edificio unda trabaonan preliminar ta tumando luga, Minister Presidente Mike Eman, Minister di Infrastructura Benny Sevinger y Minister Arthur Dowers. E ministernan a pone asina enfoke riba e proyecto pa cual tur mapa ta cla caba, incluyendo cambionan cu mester wordo haci pa via di un candela cu a tuma luga den un parti di e complex algun siman pasa. E proyecto lo wordo ehecuta cu supervision di Dienst Openbare Werken (DOW), den colaboracion cu Monumenten Bureau pa loke ta trata e parti monumental di e complex. E proyecto, cual ta presupuesta na 18 miyon florin ta cla pa bay destaho publico na luna di november 2013 y e trabao ta calcula di tin un duracion di 16 luna. For di momento cu e gobierno nobo a sinta na fin di 2009, Gabinete Mike Eman a traha riba mas di 87 proyecto, segun Minister Sevinger. Esaki ta inclui proyectonan cu a wordo completa y otronan cu ta den ehecucion y preparacion.

Comentarionan (0)Add Comment
Duna Comentario y/of Comparti riba Social Medi
 
  smaller | bigger
 

busy
 

Connect with Us

Newsletter