Friday, 19 December 2014
Minister dr. Richard Visser a haci entrega di un donacion valioso na umpirenan local Print E-mail
Monday, 12 August 2013 12:09
Comparti

L1020297

Recientemente Minister di Salubridad y Deporte, dr. Richard Visser a ricibi bishita oficial di e umpirenan local, esta "Aruba Local Leagues Umpires (ALLU), representa pa Sra. Idelle Orman-Hernandis, Nel Frank y Hendrik Leander.

E mandatario a probecha di e bishita aki pa entrega un check na Aruba Local Leagues Umpires y asina cumpli cu un peticion di parti di e umpirenan pa haya fondo necesario pa nan proyecto di upgrading. E contribucion aki di parti di Ministerio di Salubridad y Deporte lo wordo inverti den un programa di training pa nos umpirenan local. E umpirenan a keda sumamente contento cu despues di 12 aña, danki na e apoyo di Minister Visser, porfin nan por organisa un training atrobe. Aruba ta haciendo un tremendo trabao den baseball internacionalmente. Minister Visser ta sigui e desaroyonan y progreso di nos hobennan paso pa paso cu hopi orguyo patriotico y ta contento di por a combersa cu e umpirenan pa intercambia di idea y scucha nan consehonan. Den un combersacion hopi ameno e umpirenan a trece dilanti nan preocupacion pa cu desaroyo di baseball localmente. A papia tocante e importancia di consistencia den deporte y cu mester haci mas esfuerso pa mantene e calidad. Ademas e umpirenan a comparti cu falta disciplina riba veld, cual sigur ta un desbentaha pa e desaroyo di e deporte. E umpirenan a comparti cu Minister Visser cu Aruba tin hopi hoben cu talento pa baseball. Ta asina cu e hobennan geneticamente tin e "body type", o sea e tipo di fisico, cu ta bon pa baseball. Esaki, combina cu talento, lo tin su resultadonan hopi mas positivo si por introduci mas actividad fisico na scol, cual lo yuda aumenta e calidad di coordinacion motorico di nos hobennan. E umpirenan a expresa cu e proyecto di Minister dr. Richard Visser "Scolnan Saludabel" lo presenta oportunidadnan grandi pa nos futuro generacionnan, unda cu nos muchanan ta bira mas consciente di nan salud. E programa Scolnan Saludabel ta actualmente den su fase di proyecto piloto na cinco scol y ta dirigi na siña nos muchanan un acercamento total cu loke ta biba un bida saludabel. Guia psicologico ta importante pa ora nos muchanan ta participa den competencianan internacional unda cu ta rekeri miho dominio di situacionnan di stress, segun e umpirenan. Minister Dr. Richard Visser ta desea miembronan di ALLU hopi exito cu nan training y cu nan por sigui yuda deporte di baseball desaroya den forma positivo y crece mas na Aruba.

Comentarionan (0)Add Comment
Duna Comentario y/of Comparti riba Social Medi
 
  smaller | bigger
 

busy
Comparti
 

Connect with Us

Newsletter