Saturday, 25 October 2014
Democracia real ta lansa su candidato di mas nobo: ingeniero Alonso 'Ali' Tromp Print E-mail
Thursday, 04 July 2013 08:47
DSC_2063
Alonso ‘Ali’ Tromp no ta ningun persona desconoci mirando su trayectoria unda tur el a lanta na Aruba, profesion cu e ta eherece y ambicion semper latente pa politica. Tur esaki banda di su caracter semper sincero y agradabel cu e ta conoci p’e.

Un introduccion chikito di Alonso (48 aña) ta cuminsa cu su prome añanan den e bario di Tanki Leendert. E ta e mayor di tres ruman hunto cu su mayornan unda cu di Tanki Leendert, e famia a muda pa Madiki den cual bario Alonso a biba te cu su 14 aña y despues di eynan su añanan di adolecencia el a biba y forma su mes den Sorsakastraat na Dakota. Eynan den cas di pueblo, el a lanta den un famia humilde unda norma y balornan tabata e plato principal di tur dia. Alonso a forma su mes y siña tuma oportunidad positivo den su bida cu dos man pa hiba su mes dilanti. Despues di a caba su John F Kennedy school, el a dicidi pa sirbi dienst den Mariniers Kazerne na Aruba, unda e por a intensifica e balornan cu semper e tabata identifica su mes cune manera ta e parti di organisacion, respet y husticia pa tur hende, sin importa clase ni rango social. Cu su 21 aña despues di a sirbi dienst, Alonso a haya e oportunidad biniendo di un famia simpel, pa toch bay studia na Hulanda. Na Hulanda el a termina su estudio di MTS como installateur cu exito y bek na Aruba, el a sigui studia den su oranan di anochi su estudio riba nivel di HTS y termina su estudio como Ingeniero via Saxion Hogeschool di Enschede. Estableci ya na Aruba, cu su famia chikito di un yiu muher, Alonso a cuminsa pone su meta den duna bek na su pais, invertiendo su profesionalismo bek den comercio di Aruba.

Na 1994, e mucha homber humilde cu a forma su mes entre Tanki Leendert, Madiki y Dakota a lanta su mesun compania Altrec, cu a logra emplea no menos cu 37 empleado Arubiano, entre cual, varios tabata haya e oportunidad pa studia tambe bou gasto di e compania. Sinembargo na 2001, Alonso a cuminsa sinti e resultado di mal maneho di gobierno cu no tabata atrae inversionistanan, esaki cu tur su efectonan negativo pa economia di Aruba. Hunto cune, afectando directamente e klein en midden bedrijf, den cual sumes y hopi negoshinan di Arubianonan tabata cay aden. Mi tabata mira con e blokki ijs grandi tabata simplemente smelt dilanti wowo di tur hende bayendo cu tur loke b’a traha p’e. Pa Alonso, esaki tabata e prome momento cu el a sinti e yamado pa drenta politica y actua. Su pensamento firme semper tabata cu e grupo di negoshi aki ta e weso di lomba di nos economia y ta importante pa gobierno mira, realisa y actua riba esaki. El a pone su negoshi riba non-actief, percura pa tur su trahadornan a haya nan pagonan na e forma corecto aceptando su responsabilidad como doño di negoshi na un manera ehemplar. Alonso Tromp no ta core pa su responsabilid, Alonso Tromp ta para pa su responsabilidad. Despues di a keda motiva pa mas hende pa lanta su mesun partido of drenta den politica, Alonso a uni su mes cu mas persona na crea e structura, manifiesto y statutonan pa partido Alianza. Sinembargo manera ta pasa hopi biaha, algun persona a cuminsa desvia di e base riba cual e partido a keda funda locual a haci cu Alonso a distancia su mes di e partido den su fase inicial. Mi ta un persona cu ta guia mi mes riba rectitud, orden y respet y na e momento ey mi a mira cu no tur e personanan riba e lista tabata riba e linea aki. Sinembargo e yamado pa politica no a calma.

Awor na 2013 Alonso ta sinti cu Aruba a bay bek den tempo. Nos a progresa pero awor nos a cay bek manera un baksteen 12 aña patras. Mi yiu awe tin 13 aña y mi no kier p’e bay studia y bolbe bek mayan sin por haya un trabou y mi tin cu bise, mi yiu Aruba no ta mescos mas y e na su turno cuestionami dicon mi no a haci nada pa yuda nos isla. E situacion financiero di Aruba ta asina precario cu nos tin un economia debilita afectando e klein en midden bedrijf y gobierno tin cu asumi su responsabilidad y actua. Mi no por djis para na banda sin pone di mi parti den trece solucionnan efectivo pa nos Aruba.

Dicon Democracia Real:

Alonso a papia riba su decision pa drenta politica na prome lugar cu su famia. Despues di a haya nan aprobacion, Alonso tabata mas firme cu nunca, cu 2013 ta su aña pa tuma e paso aki. Mi a combersa cu diferente partido den cual DEMOCRACIA REAL tambe tabata un di nan. Na ultimo momento mi a sinti cu e relacion entre DEMOCRACIA REAL cu mi persona tabata uno di respet, seriedad unda cu mi ta mira cu e partido ta hoben y dinamico cu locual mi ta indentifica mi mes. E partido a compronde mi gana y abilidadnan pa contribui na mi pais. Cu DEMOCRACIA REAL no por papia di un partido chikito mas, sino di un partido competitivo unda nos ta bay competi cu otro partidonan den siguiente eleccion. DEMOCRACIA REAL ta un partido cu ta LIMPI y cu no ta bay basa ni argumenta su puntonan riba insulto y/of bay bou di nivel. Politiconan awe kier culpa hobennan pa tur cosnan negativo mientras cu nan mes cu mester ta e ehempel, ta comporta den un forma bergonsoso y mahos. Añanan ta pasa, pero e acusacionnan ta keda mescos, unda bo por coy un tape di 2001 y compar’e cu awe, tur cos ta mescos. Mi ta di opinion cu como lider y politico mester mustra cu nos ta hende cu caracter, recto y drechi na lugar di usa politikeria como estilo y nivel di argumenta. Nos lider di DEMOCRACIA REAL, Andin Bikker, a demostra den su casi 4 añanan su so den parlamento, cu e por a semper keda balansa y tuma su decisionnan sin ningun influencia di otronan. Ningun hende por nenga cu ya caba den oposicion DEMOCRACIA REAL a logra hopi, imaginabo kico DEMOCRACIA REAL por haci ora e ta den gobernacion.

Kico votadornan por spera di Ali:

Pa e grupo di comerciantenan, mi ta comete mi mes pa traha fuertemente pa leynan cu ta dunanan derecho y incentivonan di belasting pa nan por desaroya nan negoshi positivamente y mas eficientemente. P’e trahador humilde y comunidad en general, nan ta merecedor di un bon salario y beneficio pasobra e ta un hecho cu ningun producto por keda poni disponibel sin e esfuerzo di boso. Mi kier pone enfasis pa cada empleado ta contento cu mihor salario, e chens pa un mihor educacion pa yega na e efectividad aki. Aruba mester por tin diferente nivel di enseñanza disponibel aki mes na cas unda nos comunidad por prepara nan mes pa yega na un mihor situacion propio.

Mi no ta kere den casualidad.

Ami semper a kere cu tur loke mi a pasa aden, con mi a crece, ta cosnan cu mester a pasa pa yega unda mi ta awe. M’a haya oportunidad di studia, ma biba cu mi hendenan humilde y mi sa cu nos Arubianonan ta hendenan gentil, positivo y amabel di naturalesa pero awor e situacion tin nos tur preocupa. P’ami gobernacion di berdad ta mescos cu dirigi un compania bon unda bo shareholders ta bo pueblo di Aruba y como gobierno bo tin cu responsabilisa bo mes cu bo shareholdersnan. Alonso Tromp no ta core pa responsabilid, Alonso Tromp ta para pa responsabilidad.

Awe Alonso lo lansa su mes oficialmente riba partido DEMOCRACIA REAL desde su cas situa den curason di Madiki, Madiki # 4 cuminsando desde 7’or te cu 10’or di anochi cu banda Rincon Boys. E pueblo votador ta keda invita pa sera conoci cu Alonso, scucha su motivacion, plan y asina intercambia hunto cune riba un nivel di respet y aprecio ideanan nobo y efectivo.

Comentarionan (1)Add Comment
... Low-rated comment [Show]
Duna Comentario y/of Comparti riba Social Medi
 
  smaller | bigger
 

busy
 

Connect with Us

Newsletter