Wednesday, 30 July 2014
Michelle Winklaar a lansa campaña den forma sano Print E-mail
Monday, 24 June 2013 16:37
DSC_2063
Memey di un grupo di participante, Michelle Hooyboer-Winklaar a lansa su campaña politico pa e siguiente eleccion, cu un caminata den parke nacional Arikok cu a sali diadomingo 6or di mainta. Mirando solo sali, scuchando splicacion di e Park Rangernan di nos flora y fauna, e actual Minister di Asuntonan Economico, Asuntonan Social y Cultura a anuncia oficialmente cu su campaña “Profesional cu curason” ta start.

“Cuater aña pasa mi a lansa mi mes den arena politico, den un tienda cu na e momento ey tabata cera den caya grandi. Mi a scoge pa inicia mi campaña eynan pa asina demostra e vision di partido AVP pa cambia e rumbo di no solamente e centro di ciudad, sino di henter nos isla”, asina Michelle Hooyboer-Winklaar a bisa durante su discurso den Parke Nacional Arikok.

"E dia ey tabatin mas o menos 20 hende pa lansamento di mi campaña", asina Michelle Hooyboer-Winklaar ta corda ainda. Awor na aña 2013 a lansa su campaña cu un grupo grandi di persona presente, locual sin duda ta yena e politico cu masha orguyo.

Cuater aña pasa el a sali for di sector priva, e tabata masha bon y confortabel, pero a haya un peticion pa join e partido. “Mi a papia cu varios hende y mayoria a desconseha mi. Tur tabata bisa mi pa no haci'e, no pasobra a pensa cu mi no tabatin e calidad pa haci e trabou, sino mas bien pasobra nan kier proteha mi di e cosnan menos bon cu politica sa trece cune”. Asina mes el a pens’e bon y na final a dicidi di drenta arena politico. “A sosode hopi den e ultimo 4 añanan, hopi proyecto a wordo ehecuta, no di mi so sino tambe di tur mi coleganan y henter e ekipo grandi di AVP”, di acuerdo cu e mandatario.

“Mi tin cu admiti cu den e ultimo añanan tabatin momentonan tambe menos bunita, pero esey ta bin semper den politica, e peso y sacrificio pa mi y mi famia tabata hopi grandi. Mi mester a pensa hopi kico mi ta bay haci, si mi lo sigui of no. Mi a bay bek na mayoria di esunnan cu mi a papia 4 aña pasa, pa evalua mi decision di sigui of no. Contrario na 4 aña pasa, e biaha aki tur a conseha mi pa sigui, pa caba cu e trabou andando y ehecuta e plannan cu tabatin y ainda tin riba mesa”, asina Michelle Hooyboer-Winklaar a bisa.

Pa loke ta e motibo di sigui pa un periodo mas, Michelle Hooyboer-Winklaar a bisa esunnan presente cu el a topa hopi hende den e ultimo 4 añanan, masha hopi hende mes, cu hopi storianan hopi inspirativo. “Esunnan mas vulnerabel den nos comunidad, mi a realisa cu mayoria di nan ta esunnan mas fuerte den nos comunidad, pasobra nan ta lucha. Apesar di tur obstaculo den nan caminda, nan ta sigui bay. E mama soltera, cu a sali for di un situacion di violencia domestico, ta demostra cu un hende por benta bo abou, pero cu bo ta lanta y para bek riba pia y ta sigui. E empresario cu kier habri un negoshi chikito cu hopi pasion, dedicacion y sodo pa su idea por bira exitoso”, asina el a conta di experiencia propio despues di 4 aña den funcion.

“Tin asina hopi storia y de facto, esey ta e motibo cu mi a dicidi pa sigui. Pasobra si personanan asina por demostra cu nan tin e forsa cu nan por cambia nan bida, nan por contribui na un miho Aruba, anto sigur ami tambe mester haci di mi parti. Di otro banda, separa di e grupo ey, mi ta sigui tambe danki na Boso, pasobra mi ta ripara cu mi por conta cu Boso sosten. Mi ta conta cu Boso sosten di awor pa dia 27 di september, caminda un biaha mas Aruba ta mustra cu nan ta uni den nan pensamento cu Aruba mester sigui bay dilanti”, asina Michelle Hooyboer-Winklaar a duna di conoce.

Na final el a bisa cu “Mi style di politica kisas no ta usual, hopi biaha hendenan sa bisa mi cu mi mester ta hopi mas agresivo, cu mi mester ataca mas. Pero pa mi, esey simplemente no ta ami y mi ta sigui hopi locual mi mayornan a siña mi na cas, y esey ta trata hende manera bo mes kier wordo trata. Y den esey mester por trece un opinion padilanti sin mester insulta, sin mester baha na un otro nivel, ami en todo caso ta kere hopi den esey”, asina Hooyboer-Winklaar a bisa memey di hopi aplauso di su siguidonan y simpatisantenan.

Michelle Hooyboer-Winklaar a sigura cu lo tin mas di e tipo di reunionnan y eventonan asina, for di awor pa eleccion den cual e lo kier conta mas di su vision y plannan pa e periodo di gobernacion nos dilanti.

dowers dowers dowers
dowers dowers dowers
dowers dowers dowers

Comentarionan (1)Add Comment
dog
June 24, 2013
201.229.9.30
Votes: +4
...

Ta pesey mes mi tin un aprecio pa Michelle, pa e manera cu bo ouders nan a lanta Michelle, hopi profecional y cu hopi respet pa cu tur hende. Hende nan manera Michelle nos mester pa goberna e dushi pida baranca aki.

Duna Comentario y/of Comparti riba Social Medi
 
  smaller | bigger
 

busy
 

Connect with Us

Newsletter