Saturday, 19 April 2014
Baluarte di Dakota: Cu un sonrisa grandi Cecilia a ricibi su reconocemento for di Prome Minister Mike Eman Print E-mail
Monday, 24 June 2013 14:33
DSC_2063
Den e bario di Dakota e nomber di señora Veneranda Franken-Kock, miho conoci como Cecilia ta resona cu hopi cariño. Prome Minister Mike Eman ta extende un palabra di respet enorme na un mama di 14 yiu, 13 na bida. Señora Cecilia, un señora masha amabel y caluroso, su nomber di cariño ta ‘mama’ pa hopi bisiña cu semper ta bon bini na su cas.

Señora Cecilia a nace na 1924 y a bay Maria College y despues di klas 7 el a bay traha na ‘Casa Matias’, net pariba di Bata den Caya Grandi e tempo ey. Amor di su bida ta Francisco Kock (q.e.p.d.), cu kende e la haya 14 yui y nan legacia ta 33 nietonan, 28 bisanieto y 2 tataranieto.

Cecilia tin 66 aña bibando na Dakota, di locual 53 aña na Mangostraat caminda ainda e ta biba cu hopi satisfaccion. Dakotero masha stima, cu cas semper habri pa tur bisiña; pa duna un conseho positivo, scuchando y yudando su prohimo resolve problema y respetando privacidad di cada un. Cecilia ta bay haci 89 aña y tin hopi bon memoria di tempo cu e tabata biba na cuminsamento di Rondweg, cerca di unda antes Aruba Gas Supply tabata situa. Señora Cecilia a mira con Dakota a wordo construi, e mes ta un di e prome 3 habitantenan di e bario. Dakota ta resalta pa su trankilidad, nan mes tabata organisa teamnan manera “Dakota p’ariba” y “Dakota p’abou” cu tabata hunga contra otro den forma amistoso. Cecilia ta corda tambe cu den Dakota tabatin un bisiña cu un 'kota' cu tabata haci rol di referee; ora e muchanan ta hunga futbol riba caya, e kota ta nara wega y ora bala drenta net hasta ta canta goal!

Tempo cu e misa di Dakota ainda mester a wordo traha, Señora Cecilia, kende ta un persona hopi religioso, a yuda realisa e proyecto aki. Mucho placa no tabata tin y pa recauda fondo, Cecilia hunto cu un grupo di hende, a cera cabes y a bin cu e idea di pasa na e casnan di famia cu e imagen di Birgen di Fatima. Esun cu tabata kier pa e imagen keda na su cas pa un cierto tempo tabata paga un contribucion chikito y e grupo tabata bin resa tambe na cas. Asina Señora Cecilia a aporta na construccion di misa di Fatima. Diadomingo semper tabata un dia special pa Cecilia, el a siña traha pan for di su casa Chico. Tur diadomingo tabata dia special pa traha pan y tambe tert. For di tur skina di Dakota e parokianonan tabata bin cumpra, otro tabata keda saboria su pan of tert cu un kopie koffie na cas di Cecilia mes. Diadomingo tabata transcuri den un forma masha ameno.

For di tur skina di Dakota, ora cu a cuminsa busca nombernan pa baluarte di e bario, Cecilia su nomber tabata resona. Ta hopi evidente cu e stimacion y e aprecio cu bisiñanan tin pa Cecilia ta hopi grandi. A toca Prome Minister Mike Eman e honor pa diahuebs mainta pa reconoce e bida y trabounan di Cecilia pa y na Dakota. Cu un brasa Prome Minister a felicita Cecilia entregando e un obsekio chikito, den forma di un plakkaat na su nomber.

   

Comentarionan (0)Add Comment
Duna Comentario y/of Comparti riba Social Medi
 
  smaller | bigger
 

busy
 

Connect with Us

Newsletter