Wednesday, 01 October 2014
Marisol Lopez Tromp: Tin casi 30 mil mucha na Aruba cu nan educacion ta depende di e aprobacion di e presupuesto aki Print E-mail
Friday, 07 June 2013 08:31
DSC_2063
E Presupuesto di Aruba di 2013 a keda aproba. Parlamentario Marisol Lopez Tromp a bisa di a sostene e Presupuesto aki apesar cu esaki a drenta laat Parlamento y Aruba ta den un situacion financiero dificil. Motibonan pakico el a vota pro pa e Presupuesto aki ta diferente.

Segun e Parlamentario, si mester bai laga e aprobacion di un Presupuesto depende solamente di un situacion financiero dificil, nunca lo por aproba ningun presupuesto y lo no por ehecuta ningun proyecto. Tin mucho mas factor ta hunga un papel na momento di aproba of desaproba un presupuesto. E Parlamentario tin ya 16 aña den politica sea como Parlamentario of Minister, pues el a para na ambos banda. Si bai tras di e sitacion financiero so, nunca por aproba algo. Como Parlamentario bo ta controla e maneho y cifranan di un Gobierno y como Minister bo ta percura pa ehecuta y cumpli cu e programa di Gobernacion cu b’a presenta na e pueblo. Como un politico cu a trata 16 presupuesto, e Parlamentario a splica pakico el a vota pro pa Presupuesto 2013.   Politiconan mester realisa cu ora bo ta vota pro of contra di un Presupuesto, bo ta vota pa consecuencianan cu ta regarda full un pais. Parlamentario Marisol Lopez Tromp a bisa cu el a basa su decision riba e echo cu un gran parti di nos poblacion ta consisti di muchanan entre 0 y 18 aña y pa exacto ta papia aki di un cantidad di como 27mil mucha cual ta 25% di nos poblacion. E muchanan aki kisas no por vota, pero imaginabo si esaki tabata e caso. Si nan por a bai e urna electoral, imagina kico lo tabata loke nan ta enfoca riba dje y kico nan lo a expresa. Den e caso aki, sosteniendo nos Presupuesto, e Parlamentario a bisa di ta sostene tur proyecto y tur loke ta na bienestar di e muchanan aki.

Esnan cu a vota contra e Presupuesto a vota contra tur loke ta e derecho di e muchanan aki cu ta hinca den e presupuesto y ta mara na un suma. Aki por pensa cu bo ta vota contra tur loke ta regarda Enseñanza cu ta destina pa educacion di nos yiunan y tur e muchanan aki na Aruba. Esaki kiermeen cu bo ta vota contra por ehempel implementacion di leerplicht. Si bo vota contra e Presupuesto, bo ta vota contra e placa cu mester bai pa e fundacionnan social na Aruba cu ta traha sumamente duro pa mehora y fortifica nos famianan y muchanan aki na Aruba. Si bo vota contra, bo ta vota contra e placa cu ta bai pa combati maltrato, abuso sexual, negligencia, rehabilitacion, pa menciona algun. Y no solamente esaki! Ora cu bo vota contra un presupuesto, bo ta vota contra pa tur ambtenaar ricibi un salario fin di luna paso tur e salarionan ta ancra den e Presupuesto aki. Si e Presupuesto aki keda sin pasa den Parlamento, esaki kiermeen cu e empleadonan cu ta traha den e aparato Gubernamental y tur fundacion rond Aruba cu ta depende di e Presupuesto, lo no por cobra mas te cu fin di aña paso e Presupuesto a wordo desaproba. Tabatin hopi discucion encuanto si e Presupuesto tabata uno realistico, si e tabata laat, si e ta confiabel. Tur esakinan a keda ampliamente discuti den Parlamento. Tambe dimes a discuti pa ken e proyectonan aki ta destina den nos comunidad. Den su caso Parlamentario Marisol Lopez Tromp a trece dilanti cu mester pensa y realisa cu aunke hopi di e discucionnan ta enfoca riba pasado y kico nan a haci of keda sin haci, e realidad ta cu ora di GOBERNA mester pensa riba futuro y mester wak padilanti. Un Presupuesto ta refleha e maneho di awor pa futuro. Si bai discuti solamente loke a pasa den pasado, nunca lo por aproba nada. No por discuti solamente politicamente so. Mester  wak kico ta esencial pa nos hobennan, famianan y nos muchanan y loke nan en realidad mester awe y den futuro.

Y si wak e aspectonan aki, e ora bo ta sostene e proyectonan na bienestar di nos muchanan. Den caso di Parlamentario Lopez Tromp, esaki ta e puntonan cu el a tene na consideracion na momento di tuma su decision. E no ta den politica pa su mes, sino pa sirbi esnan cu a pone eyden y tambe esnan cu no tin voz ainda y esnan vulnerable cu tambe nos ta representa. Si el a drenta politica pa su mes, e ora e lo no a sostene e Versoberingswet paar di aña pasa caminda el a vota pro pa corta den su mesun beneficionan di pensioen como politico, lagando asina mas cu 1,5 miyon florin den caha di pueblo cu segun e leynan di Bezoldiging e tabatin derecho riba dje si el a bai cu pensioen na edad di 45 aña. E por a bai cas trankilamente y goza di su pensioen pero e no a haci esaki. El a sostene e ley pa corta den su mesun beneficionan pasobra esey ta e pensamento: cu e prome yamanan pa yuda economisa ta e politiconan mes. E tempo ey el a kere cu e pensamento aki tabata cuadra cu e filosofia di e partido cu e tabata pertenece na dje y cu añanan largo a boga pa e homber chikito y a para bandi di e pueblo humilde cu ta cobra pensioen cu 60 aña. Como Parlamentario Independiente el a conta con tempo cu e mes tabata Minister e mester a lucha hopi duro mes den e 8 añanan ey pa por garantisa ehecucion di basta proyecto na bienestar di nos pais. Si mester a laga e tipo di desicionnan aki depende solamente si e parti financiero ta dificil of no, e ora nunca nada lo a keda realisa. Kemen mester lucha pa loke bo ta kere aden y na mes momento trata berdad di cumpli den margen di ley pa yega na un Balanced Budget pa bo pais y un situacion financiero sano. No obstante e criticanan cu e tin y puntonancu e no ta di acuerdo cune den e Presupuesto, Parlamentario Independiente Lopez Tromp ta mira pa kico e ta scohe y na bienestar di ken. Den su caso e ta scohe pa sostene e hobennan y muchanan di 0 pa 18 particularmente cu ta un gran parti di nos poblacion y ta depende di nos tur, no solamente como politico pero tambe como mayornan.

Comentarionan (7)Add Comment
safe aruba sin debe di avp
June 08, 2013
201.229.37.230
Votes: +2
...

marisol ta te awo despues di 3 presupuesto bo a ripara cu tin 30000 ta depende di e presupuesto?berguensa.

berdad dims
June 08, 2013
201.229.30.147
Votes: +3
...

ta kiko ta pasa super woman awor? busca e ta busca tuma hende hasi atrobe ? Dios libranos di dje. Esaki ta bai haya un lastra den e eleccion cu ta na caminda. Tur su votadornan ta bai keda cu MEP. Ken t bai vota p'e ? si ta business so e ta hasi cu su posicion, bai puntra e gainan grandi cuanto tereno nan a haya via E. Bai gaña.....

sss
June 07, 2013
84.85.56.241
Votes: -1
...

stoi smile pa camara y legaliza marijuana

Uncle Ed
June 07, 2013
201.229.6.201
Votes: +13
...

Come on Marisol,
Nos ta na mitar di anja caba, gobierno a traha sin presupuesto te awor. nan a sigi gasta na nan antoho, anto bo kier bisa mi cu 30.000 mucha ta wordu perhudica si e begroting aki no pasa? stop di tuma e pueblo aki di haci, please

Djaka
June 07, 2013
201.229.27.233
Votes: +14
...

Esaki yama para caba na nada!

Indian297
June 07, 2013
209.88.128.20
Votes: +19
...

Mi no sa mas ki pa pensa over di e muhe ki, awo cu campanja ta den porta e kier habri su boca, unda bo boca twt ta ora nan coy placa di enseyansa/education hinka den un projecto kens di tram? I pa colmo e skol cu nan twt di traha, ta den bo bario di noord cu semper a sostene bo nan twt di trahe i bo no a hasi nada over di esaki. Abo no conta mas cu e pueblo di noord den e campanja aki.

daniel1
June 07, 2013
201.229.41.237
Votes: +25
...

Bo tin 3.8 anja den parlamento y tbt sinta cu bo boca cera mientras gobierno tbt hasi y deshasi cu plaka pa educashon di nos muchanan. Hinca plaka di enseyansa den tram, muchanan ta bai drumi sin come, sin corriente y awa pa bebe. Mama y tatanan no tin trabow pasobra gobierno a pesta e luga aki cu stranjero. A pone leerplicht pero no tin cupo na scholnan. Bo sa tur esaki y tog bo no a sali na nan defensa. Unda tbt Marisol? Bo a lanta foi sonjo den porta di campanja?

Duna Comentario y/of Comparti riba Social Medi
 
  smaller | bigger
 

busy
 

Connect with Us

Newsletter