Monday, 24 November 2014
Booshi Wever (UPP): Presupuesto 2013, basa riba suposicionnan dudoso y/of no realisa ainda, ta irrealistico y ficticio Print E-mail
Thursday, 06 June 2013 19:41
Comparti

Booshi Wever008

Presupuesto 2013 a resulta di ta e presupuesto mas irrealistico y ficticio desde nos Status Aparte na 1986.  No obstante rapportnan alarmante, cu casi ta adverti contra un kiebra di nos finanzas publico, e gobierno aki ta keda pinta nos situacion bunita, un segundo Disneyland, pues un Emanlandia.

Juan David Yrausquin kende a vota contra presupuesto 2012, pasobra esaki tambe tabata irrealistico y ficticio, e biaha aki SÍ a vota na fabor di e presupuesto 2013, pero esaki pa motibonan personal cu bista riba eleccion venidero. Si cos ta “color de rosas” manera minister presidente ta pretende,
- pakiko anto a, of kier para promocionnan, periodieken, indexering?
- pakiko anto nos tin un desempleo di 10%?
- pakiko anto 13 trahador di casino di Holiday Inn mester a bay cas?
- pakiko anto Mike Eman y tocayo Mike de Meza ta papia scondi cu IMF pa discuti e

medidanan cu sin duda lo bin, manera e BTW di 15%?
- pakiko anto cada siman bo ta weita tanto cas na vindishi?
- Di con anto tin tanto criminalidad, atraco, etc.?
- Di con anto e lista di hende cu mester wordo yuda cu cuminda, ta keda crece?
- Di con anto cada dia un ambulante ta subi e lista di choller?

Ora nos weita e maneho di e gobierno di AVP y e acontecimentonan actual na pais Aruba, y ponenan banda di nos situacion financiero/economico, e comparacion cu e disaster di e crucero “Titanic” ta hopi remarcabel.
Mientras cu “Titanic” tabata hundiendo, e banda tabata sigui toca.
Na su turno, pais Aruba tambe ta hundiendo cu su debe di 67% di nos GDP, cu un criminalidad alarmante, un desempleo di 10%, unda negoshinan ta cera, pero unda gremio- y sindicatonan ta keda “muisstil”, y prensa comprometi ta sigui manipula y
tambe ta pinta tur cos “a color de rosas”, manera e patron ta manda!
Gobernantenan y nan sostenedornan ta sigui fiesta, sin importa nan un bledo e necesidadnan di tur e 6 mil famianan di kende meter di corriente a wordo corta, ni
di e 4 mil trahadornan di Valero cu a perde trabao, ni di e empleadonan di hotel cu ta perdiendo dianan di trabao, banda di e 13 empleadonan di casino na Holiday Inn Hotel menciona ariba, pa no lubida e debe enorme cu e gobierno aki a crea riba nos futuro generacionnan.
E procedura di rescate riba “Titanic” tambe por ser compara cu e situacion na Aruba.
Titanic no tabatin suficiente botonan salbabida. E rescate a concentra su mes na prome lugar riba e pasaheronan den primera clase, esta esunnan mas rico. E botonan salbabida NO a wordo yena na nan full capacidad, locual a stroba di salba mas hopi bida posibel.
Ademas di esey – di acuerdo cu e relatonan scirbi y riba pantaya - cada ken tabata busca pa scapa nan propio peyeho, y no tabata importa nan un bledo pa ni sikiera saca un man pa yuda salba otro bida. Un egoismo total a apodera di nan.
E pelicula “Titanic” na final ta bisa cuanto bida den e anochi fatal di april ey, a bai perdi, y cuanto bida por a wordo salba si esunnan den botonan salbabida, sikiera a corda riba nan prohimo y a extende un man auxiliador. Pero no, egoismo a vence y esey ta e legado cu a keda pa historia!
Aki na Aruba no ta mucho diferente!
Mayoria di nos ta realisa cu berdaderamente cosnan tá malo, y cu Aruba ta den un situacion deplorabel. Otronan tambe ta presinti esaki, pero nan ta prefera di wanta na saya di e gobierno y/o partido cu nan ta kere cu tin un chens grandi di por ta den e siguiente gobernacion.
Pakiko? Pa asina nan por scapa nan mesun peyeho, pa nan SI tin nan trabao of contrato sigura, sin importanan e dolor y e sufrimento di e resto di nos comunidad.

Na final ta bon pa recorda locual Bijbel ta siñanos, esta cu riba pregunta di Su Apostelnan, Hesus a contesta cu mandamentonan principal di Dios ta “Stima Dios riba tur cos”, y “Stima bo prohimo mescos cu bo ta stima bo mes” !
Reflecciona riba e palabranan aki den e siguiente dianan bo dilanti, y especialmente riba 27 di september 2013, prome cu bo bai vota. Lo bo mester por realisa cu bo no ta bay vota pa bo so, pero pa bienestar di bo prohimo tambe!

Comparti
Comentarionan (3)Add Comment
Wichie
June 07, 2013
201.229.72.109
Votes: +1
...

Ta e "meneer" Booshi aki ta irrealistico y ficticio! smilies/angry.gif

Yuuup
June 07, 2013
74.82.64.21
Votes: +2
...

Ki dia bo gobierno a entrega un presupuesto realistico? Cua anja? Bo por contesta esei? Cu ki intenshon bo persona a saka e clausula for di e huur contract nan cu awe no por stop di paga e hendenan aki? Bosa cu esei ta algo di mala fe contra e pueblo aki? Miho cos bo hasi ta retira paso e pueblo ki no kier wakbo ni den parlamento mas, corda como Minister. Bo ta un traidor di e pueblo aki. Bo a abusa di e pueblo aki su confiansa, kk mas bo kier? Sigi djo djo riba costia di e pueblo ki? E pueblo ki nota kens Sr Wever, asina ta stop di tuma e pueblo ki hasi. Bo a hasi basta danjo caba contra e pueblo kinan. Please, bai foi politica y no bin nunca mas. Bota dune hende asco ora hende sinta pensa cuanto danjo bo a ocasiona na e pueblo ki.

De Waarheid
June 06, 2013
201.229.66.115
Votes: +4
...

Tur ora nos wak bo cara e lo corda nodid e 23 million cu abo pesonalmente a tira afo
Un suma asina grandi nunca a bai perdi den histroria di Aruba.
Netamente abo no tin nungun derecho di papia di presupuesto.

Duna Comentario y/of Comparti riba Social Medi
 
  smaller | bigger
 

busy
 

Connect with Us

Newsletter