Friday, 31 October 2014
Minister Richard Visser hopi entusiasma cu e proyecto: Diadomingo awo ta celebra apertura di Linear Park Un proyecto cu ta promove mas movecion den pueblo Print E-mail
Friday, 15 March 2013 16:53
DSC_2063
Ta habri fase uno di Linear Park oficialmente diadomingo awor. Minister di Salud y Deporte, Dr. Richard Visser ta invita comunidad henter pa ta parti di e tremendo acto di apertura oficial diadomingo awor 17 di Maart.

Minister Visser ta masha entusiasma ya cu esaki ta un otro proyecto, un joya di proyecto, cu ta keda introduci door di Gobierno, cual ta bira un espacio diferente cu cual kier contribui na salud di nos hendenan door di brinda e oportunidad di crea un ambiente pa haci movecion y practica diferente actividadnan deportivo como di entretenimento.

E mandatario a laga sa cu esaki ta un tremendo proyecto cu Aruba henter lo usa y ademas ta dedica na nos turistanan tambe. Banda di esey, "nos ta wak e beneficionan cu e tin pa nos salud, pa nos hendenan cu ta us’e, canamento cu ta bay tin akiriba, coremento di bais. E ta echt cambia e medio ambiente pa un ambiente saludabel".

Linear Park ta bay ta conecta cu e proyectonan di infrastructura cu ta bay sigui te Baby Beach San Nicolas (Vierbaansweg)y sigui bay abao te na Arashi. E kioskonan lo cuminsa habri pa e comunidad por haci uso di e parke mas efectivamente. Ta bay tin basta espacio pa organisa eventonan deportivo, social y ta fisicamente activo.

Banda di esaki ya caba ta observa un gran cantidad di hende ta haci uso di e strip pa cana, core, keiro y core bicicleta cu e muchanan.

E actividadnan specifico cu ta bay tin na Linear Park riba dia 17 di maart, dia di e apertura oficial, ta bay ta hopi varia, Minister Visser a laga sa. E actividad lo cuminza 10'or di mainta y lo tin 44 tent di Santa Rosa cu productonan local cu cuminda, benta di mata, artesania, productonan cu hende ya caba ta custumbra cune.

Pa 11'or lo tin un acto protocolario y pa 11:45 lo tin un caminata organiza pa Aruba Bank. E Bus di Salud lo ta presente pa haci chekeo di peso, sanger y presion. Personal di IBiSA lo tey tambe.

E mandatario a splica cu lo tin diferente federacion deportivo cu lo tey pa duna demostracion di diferente deporte manera Tai Chi, Zumbathon, Schermen, Hapkido, Capoeira, Cross Fit, Beach Volleyball, voetbal, y hopi mas. Tur actividad deportivo lo ta un demostracion di e tipo di actividadnan cu lo por tuma lugar na Linear Park.

Esaki lo ta un dia completo yen di actividad, pero un dia di celebracion pa algo cu ta bay cambia e medio ambiente na Aruba y e cara di nos salud. "Pesey e gobierno aki ta hopi orguyoso di e proyecto aki", el a expresa.

Finalmente, Minister di Salubridad y Deporte ta invita henter comunidad pa diadomingo 17 di Maart pasa un dia alegre y bin celebra e momento bunita aki na Linear Park.

Comentarionan (0)Add Comment
Duna Comentario y/of Comparti riba Social Medi
 
  smaller | bigger
 

busy
 

Connect with Us

Newsletter