Wednesday, 20 August 2014
Minister Sevinger: Gabinete Mike Eman ta mehorando producto Aruba den su totalidad Print E-mail
Monday, 11 March 2013 19:46

benny

Durante un conferencia di prensa dialuna mainta na bestuurskantoor, e Minister encarga cu e cartera di Infrastructura a duna un splicacion di e diferente proyectonan cu ta tumando luga rond di nos isla. E proyectonan aki ta un inversion den e producto Aruba, pero tambe ta un solucion riba largo plaso pa henter e comunidad di Aruba y riba diferente nivel.

Na Aruba a keda demostra cu placa inverti den infrastructura ta dunando su frutanan y esey no ta valido pa Aruba so, pero e ultimo temponan tambe por tuma nota di e mesun tendencia na otro paisnan rond di mundo, particularmente Merca ta un bon ehempel. Ta pesey cu Minister Benny Sevinger, esun encarga cu e cartera di Infrastructura, ta masha contento cu e decision cu Gabinete Mike Eman a tuma pa bay den e direccion ey, ora cu a busca un manera pa mehora producto Aruba den su totalidad.

For di tempo di oposicion, AVP, e partido cu e ta representa, a constata un “gap” entre e infrastructura banda di hotel cu esnan di resto di e pais, den tur area. A traha un plan pa inverti den esaki cu “a bira mas urgente ora cu e crisis economico a yega. Hopi pais a trata di haci esaki den mesun forma y e ehempel ta Merca. Tur experto a confirma cu e placa cu a wordo inverti den infrastructura na Merca ta dunando su frutonan,” Minister Sevinger a indica na prensa dialuna mainta. Cu e tipo di inversion aki, ta stimula e economia y e ta crea trabou pa e hendenan. “Nos ta contento di mira cu e plannan cu nos a bin ta implementando no solamente ta traha na Aruba, pero tambe na un pais grandi manera Merca, na unda a keda confirma cu esaki ta e direccion cu mester bay.”

Un lista grandi di proyecto cu a caba, ta andando of ta na caminda den tur skina di Aruba, a wordo presenta na prensa. Mientras cu na Merca ta inverti apenas 7% den infrastructura, na Aruba esaki ta na 10%, compara cu e 15% averahe na Europa.

Minister Sevinger a splica cu e proyecto di edificio di Corte cu a finalisa falta unicamente e fase di “inrichting” y reconstruccion di Plasa Alameda pa e wordo entrega bek na Corte pa e por bay den uzo.

Otro proyectonan cu a bini dilanti ta embeyecimento di centro di ciudad cu ta inclui 4 streetcar, cu Gobierno ta spera cu tur lo ta na Aruba na luna di juli y ta den uzo completo pa final di aña. Di otro banda e mandatario a splica cu pa loke ta e renobacion di centro, a palabra cu e dos contratistanan cu esaki mester ta cla na luna di juni.

Renobacion di centro ta bay den combinacion cu embeyecemento di varios “zijstraten” manera Hendrikstraat, yegando te den bisindario di Universidad di Aruba, Schelpstraat, Havenstraat y Weststraat. “Pues na momento cu e proyecto di renobacion di centro finalisa, tin mas proyecto rond pa caba cu nan,” e mandatario a bisa. El a agrega cu hunto cu e proyecto di Centro, construccion di e remise den cercania di waf di Paardenbaai. Esaki, segun e plannan, ta wordo entrega na luna di juli. Den e mesun plan di renobacion di centro di Oranjestad, a cumpra un parti di edificio di Nicky Habibe pa e tram por lora y na mesun momento traha un edificio cu lo bira sede di BID (Business Improvement District) cu lo maneha centro comercial di Oranjestad.

Welcome Plasa, cu ta forma parti di embeyecemeno di centro di Oranjestad, ta trece cune cu e entrada di waf lo wordo hala un poco mas pabou. E plasa aki ta den diseño, pero ta spera cu na luna di mei ehecucion di e proyecto ta cuminsa.

Algun otro proyecto cu e mandatario a papia di nan, proyectonan cu ta den ehecucion, ta Linear Park (fase 1 ta wordo entrega e siman aki); renobacion edificio ex-Havenkantoor y edificio di Zoutmanstraat; ex edificio di Belasting (cu ta bira DIMAS y DAO); Parkeergarage di Gobierno y priva; ex edificio di Valero Lagoen cu ta bira sede di City Inspector; Solar Park na aeropuerto; mudansa di waf pa Barcadera; embeyecemento di Rondweg y dilanti Bestuurskantoor; ta verf ex-edificio DOW cu lo bira sede di Censo; ta ehecutando e fase di embeyecimento di spiraalrotonde; renobacion edificio De Trupialen; Avenido Alo Tromp. Tin diferente sistema di rioolering cu ta trahando riba nan, cu mester ta cla e aña aki ainda.

Scolnan cu ta wordo renoba ta Antonius College; Bonifacius College; Arco Iris Kleuterschool y Mon Plaisir. Ta bay muda y drecha e Kite Surf Park; mehoracion di diferente beach tambe ta riba agenda e aña’ki. Ringweg 3, no falta mucho pa e por cuminsa; Green Corridor; ampliacion di Edward Cheung Innovation Center ta proyectonan cu ta den pipe-line. E lista cu e mandatario a presenta ta consisti di 68 proyecto di 2013 y algun cu a cuminsa na 2012 caba.

Na diferente ocasion e mandatario a indica cu e ta consciente cu cayanan cera ta un molester grandi pa automobilistanan. “E ta un molester, pero e ta necesario. Nos mester haci esaki pa keda cla cu tur e trabounan. E trabou ta inmenso. Nos ta haya hopi pregunta pakico tur pareu. Pero si nos no haci nan tur pareu, aki 20 aña ainda nos ta trahando riba nan. Nos mester cuminsa cu tur y e listanan di proximo añanan no ta menos cu esaki. Na final tin un producto di calidad cu nos tur ta orguyoso di dje. E lo stimula e hendenan, hisa calidad di bida y stimula economia,” Sevinger a duna di conoce.

Comentarionan (2)Add Comment
Ta Mi Hendenan
March 12, 2013
68.171.231.91
Votes: +0
...

MMMMMMOOOOOOOOEEEEEEEEEEEEEEEEE

!!!BERDAD!!!
March 12, 2013
201.229.124.207
Votes: +14
...

Ta manera cu Minister Zievinger ta haci DAMAGE CONTROL despues cu GOBIERNO a sera VALERO pa di 2 bez! Minister Sevinger kier pa PUEBLO GULI MANDA BOW, cu KLINKERS por drecha e PERDIDA di mas di 700 trahadornan y profesionalnan DIRECTO y un otro 700 contratistanan, y un otro 3000 mas indirecto! Y PUEBLO por ripara tambe cu GOBIERNO no ta ni BUSCA otro alternativanan pa e reapertura di e REFINERIA. Nan no ta ni mencione mes, pa no lanta un cacho DRUMI!

Duna Comentario y/of Comparti riba Social Medi
 
  smaller | bigger
 

busy
 

Connect with Us

Newsletter