Sunday, 26 October 2014
Minister Dr. Richard Visser ta topa cu Prome Dama di Merca Michelle Obama Print E-mail
Sunday, 10 March 2013 19:34

front-obama003

Minister di Salud y Deporte Dr. Richard Visser tabata invita pa asisti na e conferencia “Building a Healthier Future” esta construyendo un futuro mas saludabel organisa pa P.H.A “Partnership for a Healthier America”. Organisacion di cual e prome dama di Merca, Michelle Obama ta e presidente honorario. E conferencia su enfoke tabata pa reuni un cantidad grandi di grupo y individual nan cu ta comprometi pa resolve e epidemia di obesidad infantil na Merca.

“E ta sigur un reto pa tur hende laga nan agenda atras, pone diferencianan un banda y traha riba strategianan pa mehora e salud di e hobennan di nos pais esaki ta” asina PHA a splica. E conferencia aki a tuma luga entre dia 6 pa 8 di maart den e “Grand Hyatt Resort, Washington D.C.” Notabel tabata cu Aruba y Canada tabata e unico invitadonan internacional. Riba dia 7 di Maart Minister Visser tabata un presentando den e sesion di e conferencia “Working Across Borders to Improve Health” modera pa Dr. Nils Daulaire, secretario suplente pa Asuntonan Global di e Departamento di Servicio y Recurso Humano di Salud Mericano. Formando parti di e panel distingui aki Minister Visser a contribui grandemente na e discusionnan cu ta regarda obesidad infantil global. E sesion aki a discuti programanan y leynan cu a drenta na vigor pa atende cu e preocupacion creciente riba nivelnan internacional di e problema di salud aki. Minister Visser, den un forma masha elocuente a describi e situacion na Aruba exponiendo riba e cambionan grandi cu a tuma caba y ta tumando luga ainda. El a describi e progreso significativo den e porcentahe di actividad fisico, conscientisacion di salud y e mehoracion den estilo di bida cu ta tumando luga. E cantidad di cambionan experencia aki ta debi na proyectonan increibel y programanan diseña y estableci pa Gobierno di Aruba pa sigui contribui pa e isla bira mas saludabel y activo. Aruba a registra un aumento di actividad fisico significativo di 6% pa 39% den un temporada di 6 aña, cu ta un indicacion cu Aruba ta riba e caminda corecto pa alcansa estilo di bida saludabel. Un honor grandi a wordo duna na Aruba na momento cu e representante di PAHO (Pan American Health Organization) y experto na PAHO su “Pan American Action Forum riba NCD’s esta Non – Communicable Diseases”, kende a comparti e mesa di panelistanan, explicitamente a menciona e rol di liderazgo cu Aruba a mustra den e combatimento di obesidad infantil den region. Sra Cunn a indica cu durante di aña pasa tabatin un aumento significativo di iniciativanan pa combati Obesidad Infantil den region y cu e eventonan di PACO organisa na Aruba a sirbi como catalisado y guia pa hopi pais den region, incluyendo Brazil, Colombia y Mexico entre otro. E rol increibel cu un pais asina chikito manera Aruba a hunga den move continentenan pa tuma accion den un reto global di salud ta remarcabel. A clausura e sesion cu un presentacion special di e presidente honorario di PHA, esta e “primera dama” di Merca, Sra. Michelle Obama. El a enfoca riba e importancia di bin hunto pa combati e problema di obesidad infantil; Ta necesario e compromiso di mayornan, maestronan, industria, profesionalnan medico y henter e comunidad pa cambia e curso y pa crea un futuro mas saludabel pa tur. Despues di e discurso di Michelle Obama, Minister Visser a haya e oportunidad pa combersa cu e prome dama Mericano. Minister Visser a keda sorprendi ora cu Sra. Obama a menciona cu e ta admira e trabounan cu a y ta realisando na Aruba y a enfatisa riba e importancia di colaboracion internacional. Michelle Obama tabata debidamente informa pa un miembro di su staff (Dr Shellie Pfohl) cu a colabora cu PACO (Pan American Conference on Obesity), IBiSa y otro proyectonan, for di dia cu Minister Visser a bishitanan pa e programa di “Lets Move” na Cas Blanco. Minister Visser a tuma e oportunidad pa atende varios otro sesion importante entre otro “Active Schools” cu tabata modera pa Dr Shellie Pfohl. E sesion aki tabata di interes particular pa Minister Visser ya cu e ta encera campañanan di salud similar na esunnan cu Gobierno di Aruba a inicia y a cuminsa implementa riba nos isla. E iniciativa di “Scolnan Saludabel” un programa piloto ta canando y denter di algun luna lo introduci “Kleuterklas Saludabel” cu ta conta cu e participacion di tur kleuterklas riba nos isla. Tambe Minister Visser tabatin e oportunidad pa intercambia di idea cu Dr James Whitehead Vice Presidente di “American College of Sports and Medicine” relaciona cu e programa nobo cu a keda presenta na Aruba cu ta “Exercise is Medicine” y cu lo keda introduci na luna di juni. Pa minister Visser e tabata un honor di por a participa na e conferencia 2013 “Building a Healthier Future” organisa pa PHA. Cu plannan pa pa sigui cuida y fortalece e colaboracion entre cantidad di organisacionnan renombra cu di berdad ta trahando duro pa crea programanan excepcional pa muchanan na Aruba, Caribe y Latino-america y e resto di e region creando partnership pa medio di liderazgo.

gallery1 gallery1 gallery1
gallery1   

Comentarionan (0)Add Comment
Duna Comentario y/of Comparti riba Social Medi
 
  smaller | bigger
 

busy
 

Connect with Us

Newsletter