Friday, 31 October 2014
Lider di MEP Evelyn Wever-Croes: Refleccion riba dia internacional di hende muher Print E-mail
Friday, 08 March 2013 09:40
DSC_2063
Dia 8 di maart nos ta celebra dia internacional di derecho di hende muher. Nos ta para keto un rato pa observa e desaroyo di derechonan di e hende muher den ultimo siglonan, di un ser sin derecho di expresa su bos, pa un ser cu derecho di determina bos di otro. Un desaroyo impresionante, cu nos ta hopi orguyoso di dje.

Sinembargo tin un aspecto cu ta fundamental den esaki, e respet pa e hende muher. Lamentablemente, tambe akin a Aruba, nos no ta na e nivel cu nos kier ta. Nos como hende muhernan ta duna respet pa nos haya respet, y si nos no logra haya e respet cu nos merese, nos tin cu sigi trata cu respet. Asina mes tin biaha esaki no ta suficiente.

Aki mi ta referi na e problema di violencia domestic y violencia contra hende muher. Riba un dia manera awe nos no por keda sin para keto na e problema aki.

Mas especifico mi pensamento awe ta bai na sra. Chaldira Vis cu a bira victima di violencia domestico  grave, y casi a perde su bida. Mi a bishita Chaldira siman pasa na Hulanda y mi a keda hopi impresiona pa su determinacion pa lucha y rehabilita. Ora mi a puntra Chaldira kiko nos mester hasi pa evita casonan asina den future, Chaldira a urgi pa nos protehe hende muhernan cu ta den situacion di abuso mucho  mas mihor.  Pa nos por yuda nan, na tempo. Pa nos hasi algo na e leynan pa proteccion di hende muher den situacion di abuso, y tambe pa hasi algo na e castigonan cu ta wordo impone den casonan asina.

Sinembargo nos ta gaña nos mes si nos considera violencia contra hende muher como un problema di hende muher so. No, sigur cu no. Pasobra den e gran mayoria di cada caso di violencia contra hende muher, tin un hende homber involucra.

Ami ta boga pa nos atende e problema di violencia contra hende muher como un problema di famia. Mientras nos pais a desaroya riba e tereno material, den infrastructura, nos a neglisha e aspectonan imaterial. Como pais nos a neglisha e nucleo familiar.

Mi ta urgi tur mandatario y esnan cu por hasi un diferencia, pa enfoca riba e NUCLEO FAMILIAR. Si nos duna mas atencion na e famianan cu mester di sosten, y nos concentra mas riba fortifica nos nucleo familiar, nos por cuminsa atende e problemanan di violencia contra hende muher y contra violencia domestico mas efectivamente.

Mi ta urgi pa tur mandatario y esnan cu por hasi un diferencia basa tur accion riba RESPET. Pasobra ta solamente dor di e duna e ehempel di trata otro cu RESPET nos ta duna e señal fuerte na nos comunidad cu tur hende mester trata otro cu RESPET.

Y por ultimo mi ta urgi tur mandatario y esnan cu por hasi un diferencia pa nos tuma accion HUNTO, pasobra ta solamente HUNTO nos por brinda cabes na e problema serio di violencia contra hende muher.

Mi ta felicita tur hende muher riba e dia aki, y mi ta gradisi tur hende homber cu ta duna nos RESPET y OPORTUNIDAD pa nos por sigi desaroya nos mes.

Comentarionan (0)Add Comment
Duna Comentario y/of Comparti riba Social Medi
 
  smaller | bigger
 

busy
 

Connect with Us

Newsletter