Sunday, 21 September 2014
Minister di Finanzas: Presupuesto 2013 ta cla y Aruba ta riba bon caminda pa un presupuesto balansa Print E-mail
Monday, 04 March 2013 18:28

Aruba on Track MG 0043

Manera a keda priminti apenas algun dia atras, Presupuesto Nacional di Aruba pa aña 2013 a keda cla. E titular di finanzas, Minister Mike de Meza a haci e anuncio ayera durante un conferencia di prensa expresando cu e retonan tabata hopi, pero e trabou duro ta dunando su resultado y e muestra ta e cifranan cu tin pa compara.

 E maneho di Gabinete Mike Eman no solamenteta logrando pusha e marcadonan economico den un area positivo pa e desaroyo di nos isla, pero tambe ta bahando e nivelnan di inflacion y desempleo, entre otro.  E gobierno aki tin un meta y ta riba e bon caminda pa na 2016 tin un presupuesto balansa y finanzas completamente sanea for di e desaster cu a haya na 2009.

Un maneho nefasto cu tabata descurasha tur inversion y a destrui e confianza den nos economia, a bay combina cu e efectonan di e crisis financiero internacional cu a afecta Aruba tambe. Na fin di 2008, mundo a keda confronta cu un situacion hopi dificil. Na 2009 tabatin un caida economico di mas di 9%. “Nos a keda confronta cu tur e detayenan cu nos no tabatin den oposicion,” de Meza a splica. Un ehempel di esey tabata e deficit di 800 miyon Florin den APFA.  Ora cu a asumi mando di e pais, a topa cu problemanan structural na APFA, SVB y AZV cu a bira e prioridad. Aki mester a tuma decisionnan importante. “Lastimamente gobierno anterior no kier a atende cu e puntonan aki. Situacion di nos turismo, di nos economia tabata den pleno crisis,” e titular di finanzas a indica.

E prome stap di Gabinete Mike Eman tabata pa controla y baha gasto publico, sigui pa yuda esnan cu menos entrada, crea cupo di trabou y trece confianza bek den economia. “Sumamente importante tabata pa drecha e relacion den Reino y cu e partnersnan strategico. Tabatin un relacion deficiente cu e gremionan comercial y sindical refleha den discusionnan fuerte tur dia,” Minister de Meza a recorda. 

Financieel Kader cu a wordo aproba dor di Parlamento a habri caminda pa e dia di awe caminda “Nos ta sumamente contento y orguyoso di por entrega un prespuesto cu ta bay tin un tekort di 4.6%.” Ora ta wak e crecemento economico, Gabinete Mike Eman a percura pa recupera y sanea e finanzas publico di Aruba. “PBP pa 2014 entre 3 pa 3.5% na 2015 na 1% y na 2016 lo tin un ‘Balanced Budget’.” E Minister di Finanzas pa medio di graficanan a cuminsa mustra na prensa e cifranan di e ultimo añanan ademas di e proyeccionnan pa esunnan nos dilanti.

Entre otro a menciona e Financieringstekort cu na aña 2010 tabata di 407 miyon Florin, sigui na 2011 pa 340 miyon Florin y na 2012 ta di 272 miyon Florin. Den prespuesto  2013, esaki ta baha na  223 miyon Florin, mientras cu e proyecto pa 2014 ta 172 miyon sigui pa 51 miyon Florin den 2015 y apenas 16 miyon na aña 2016. Banda di esaki, a indica cu e aflossing di pais Aruba a aumenta na 2010 te 154 miyon Florin; na aña 2011 e tabata di 124 miyon mientras cu na 2012 el a subi 216 miyon y den 2013 e ta sigui subi cu 242 miyon. E pronostico pa 2014 ta di 161 miyon Florin y 113 y 151 pa e dos siguiente aña respectivamente. E crecemento economico di e pais a registra na 2009 un porcentahe di 9.4% sigui na 2010 di un porcentahe negativo di 3.7%. Na aña 2011 a bin bek cu un crecemento di 8.5%, y aña pasa, esaki tabata 3.5%. Na 2013 ta papia di un crecemento di 3.5%, sigui na 2014, 15 y 16 di un 4.5% como pronostico. Di otro banda por bisa cu inflacion ta bahando consistentemente. Na 2009 e nivel di desempleo tabata 10.1% ora cu Gabinete Mike Eman a cuminsa haci inversion pa crea cupo di trabou.

Na 2011 ta haya e ultimo cifra caminda esaki a baha na 7.9% y ta evaluando ainda kico e  ta bira 2012.

Algun di e logronan mas remarcabel ta e independisacion di ATA. Den e area di turismo, a conoce resultadonan hopi beneficion manera e cantidad di stay over visitor cu a subi como tambe e cantidad di placa cu e turista ta laga pa camber bayendo for di 130 pa 175 Dollar. “Esaki ta algo sumamente importante pa economia di Aruba,” Minister di Meza a splica. Otro decisionnan cu a hunga un papel importante ta e introduccion di beneficionan social pa esnan di menos recurso manera e ouderenaftrek, gehandicaptentoeslag y kinderentoeslag; tur resultadonan di Dialogo Social.

Comentarionan (0)Add Comment
Duna Comentario y/of Comparti riba Social Medi
 
  smaller | bigger
 

busy
 

Connect with Us

Newsletter