| Minister Michelle Hooyboer-Winklaar ainda evaluando futuro den politica |
 |
 |
| Wednesday, 13 February 2013 11:21 |
 "Mescos cu mi a tuma mi tempo pa evalua na aña 2009 prome cu mi a drenta arena politico, mesun cos lo mi tuma mi tempo awor pa mi evalua si mi ta sigui pa un periodo mas", asina Minister Michelle Hooyboer-Winklaar a duna di conoce durante e conferencia di prensa awe. For di Prensa a sali e pregunta cu si e ta evaluando pa sigui of pa e bandona politica.
Minister Michelle Hooyboer-Winklaar a tuma su retiro como Gerente General di Digicel Aruba na aña 2009 y asina a drenta arena politico riba number 7 riba lista di AVP. Den apenas algun luna di campaña, el a logra 1078 voto riba su nomber y asina a keda nombra como Minister di Asuntonan Economico, Asuntonan Social y Cultura. Durante e conferencia di prensa a puntr'e cu si e tin problema cu politica engeneral, pa e forma con duro tin biaha sa ataca otro, el a contesta cu esey ta depende con abo mes ta hiba politica. E entodo caso no sa tin e problema ey pasobra su forma di hiba politica tampoco ta inlcui atakenan personal riba ningun otro persona of politico.
Na final, el a subraya cu no tin eleccion mañan, pues tin tempo ainda pa pensa y evalua prome cu dicidi cu si e ta sigui of si e ta bandona politica pa sigui su carera profesional den sector comercial, for di unda el a bin prome cu el a participa den eleccion na aña 2009 y despues nombra como Minister di nos pais. Michelle Hooyboer-Winklaar tin 43 aña di edad, ta casa y ta mama di un yiu homber y un yiu muher chikito ainda. |
Mustra/Kita e formulario di comentario
