Thursday, 21 August 2014
Prome Minister Mike Eman: Cifranan ta refleha efectividad di vision di Gobierno y bon trabou di Ministerio di Turismo, ATA y aeropuerto Print E-mail
Tuesday, 12 February 2013 18:35

otmar 1Cuminsando un siman nobo, Gabinete Mike Eman ta sigui cu miras riba diferente aspecto di nos pais haciendo bon trabou, pero mas importante ainda, ta cosecha e frutonan di e bon trabou ey. Cu hopi satisfaccion, Prome Minister a habri e conferencia di prensa diamars mainta pa felicita e socionan di turismo pa cifranan sumamente positivo pa loke ta trata e pilar principal di nos economia.

“Gobierno a scoge pa tin un crecemento di nos economia y di nos turismo a base di calidad cu e meta di trece un relacion mas directo entre e crecemento economico y e bienestar general di nos pueblo,” Prome Minister Mike Eman a cuminsa na bisa.

El a indica cu constantemente Gobierno ta purba di limita construccion di camber nobo, pa asina pone enfoke riba e aumento di ocupacion y mehoracion di e producto Aruba. Esaki consecuentemente ta traduci su mes den un aumento di loke e turista ta gasta riba nos isla, kier men loke e ta laga atras. E mehoracion di producto Aruba tin como obhetivo cu por pidi un prijs mas halto pa camber y asina haya un turista di entrada mas halto, loke ta nifica mas entrada. Atrobe, esaki ta haci posibel cu e crecemento economico di e isla ta dirigi na e bienestar general di su habitantenan.

“Esaki ta un filosofia cu nos tur por ta di acuerdo cune, pero e trabou ta sinta den haci’e un realidad,” Prome Minister Eman a comenta. El a splica cu nos tabata conoce un pais cu pa hopi tempo a crece cada bes den cantidad di turista y hunto cune e cantidad di camber di hotel. E gobierno aki a reconoce cu e momento a yega pa Aruba tin un turismo mas sostenibel. E punto clave tabata hisa e nivel di ocupacion y e entrada pa turista.

Awor cu di manera constante y consistente Gabinete Mike Eman, pa medio di Minister di Turismo Otmar Oduber ta logrando esey, por bisa cu ta logrando e obhetivo, pero semper por miho. E prueba ta den e cifranan cu e Minister hunto cu director di Aruba Tourism Authority y director di Aruba Airport Authority N.V. a anuncia na prensa. Prome Minister a felicita nan pa e bon trabou “Un pabien ta bay pa Minister Otmar Oduber, ekipo di ATA lidera pa Ronella Tjin Asjoe-Croes y e maneho di aeropuerto encabesa pa Peter Steinmetz.”

Prome Minister a bay over na menciona cu pa loke ta luna di januari 2013, e cantidad di turista a aumenta cu 5.2% compara cu e mesun luna di januari di 2012; e mesun estadistica a crece cu 9.4% si ta compara esaki cu luna di januari 2009 cu ta e aña cu Gabinete Mike Eman a asumi e responsabilidad di mando di gobierno. “Un crecemento di casi 10% mientras cu no a aumenta e cantidad di camber,” Prome Minister Eman a remarca. Mira for di e punto di bista di ocupacion, e Occupancy Rate ta registra actualmente na 78%, compara cu 73% na 2012. Claramente por mira cu e cifranan ta cuadra. E oferta den cantidad di camber a keda mescos, sin embargo tin mas turista kedando na hotel y gastando mas na Aruba.

Pa loke ta cifranan di crucero, e sector aki tambe a conoce un aumento, pero ainda mas drastico, yegando na 26% na luna di januari.  “Un crecemento importante cu ta traduci su mes den mas entrada pa tur esnan cu ta depende di trabounan cu ta sirbi e turista crucero y como pais e ta nifica un entrada mas grandi den reserva nacional,” Premier Eman a splica.

“Den e proceso aki nos a bisa cu Aruba ta bay concentra riba calidad pa nos tin un miho producto pa esnan cu ta bishita nos y tambe pa nos hendenan. Un producto cu ta ofreciendo fuera di hotel di nivel, su hendenan hospitalario y tambe su aeropuerto excelente.” Na e momento aki Prome Minister a haci mencion y felicita Aruba Airport Authority pa e premio cu nan a ricibi recientemente como “Miho Aeropuerto” den e categoria di facilidadnan cu ta ricibi 4 miyon di pasahero of menos pa aña. E distincion aki a bin for di e organisacion internacional ‘Routes.’ Na opinion di Prome Minister, esaki ta e refleho di e profesionalismo, di su gerencia, su personal, y e sociedad Schiphol. “Tur hende cu bishita Aeropuerto Internacional Reina Beatrix por mira e mehoracion.” Mas aserca e mandatario a bisa cu aeropuerto ta uni na e vision di concentra riba calidad den tur aspecto; for di infrastructura, den bario, hotelnan, como tambe den e capacidad di tur esnan cu ta traha den turismo. “Tur ciudadano di Aruba cu ta haci di e pais e destinacion cu tur dia ta acaparando mas curazon rond mundo,” Premier Eman a conclui.

Comentarionan (1)Add Comment
johan tromp
February 13, 2013
201.229.16.11
Votes: -1
...

Pabien na nos Minister Otmar Oduber, un hoben super dynamico trahando i contagiando tur hende cu ta trahando cune cu su dynamismo. Tur cartera cu e tin den su man ta funcshonando tremendamente. Tanto turismo como Agric*ltura cria i pesca ta e hitnan di mas grandi.E ta pone nos corda arriba quepd. Daniel Leo, cu tambe tawata hasi e trabou aki cu hopi amor. Sigui asina Minister bo ta demostra cu Otmar ta traha pabo.

Duna Comentario y/of Comparti riba Social Medi
 
  smaller | bigger
 

busy
 

Connect with Us

Newsletter