Saturday, 30 August 2014
Gabinete Mike Eman y artista Daan Roosegaarde kier trece mas interaccion social den barionan Print E-mail
Monday, 04 February 2013 17:55

Front roosegaarde 002 IMG 0500

E artista Hulandes renombra kier traha cu Aruba pa trece tecnologia y hende mas cerca den barionan y centro di ciudad. Esey a keda anuncia ayera durante un conferencia di prensa ofreci dor di Gobierno di Aruba caminda Daan Roosegaarde a duna un presentacion di e obranan cu e ta exhibi rond mundo y cu ta combina arte, tecnologia y interaccion di hende. Prome Minister Mike Eman a splica cu despues di a mira su produccion den diferente media na Hulanda, nan ta combenci cu tin un potencial grandi caminda Aruba por beneficia di e manera con e artista ta conecta e dimension di creatividad cu e desaroyo humano. E enfoke principal, segun Eman, ta pa crea diferente espacionan bunita y luganan publico unico. Artista y innovador Daan Roosegaarde ta explora e inicio di un genero nobo cu ta evoluciona for di innovacionnan tecnologico. Cu proyectonan cu ta varia for di moda pa arkitectura, e ta crea diseñonan inteligente y social cu di manera instintivo ta interactua cu zonido y movecion. Su trabounan remarcabel ta funcion como un exploracion di e relacion dinamico entre arkitectura, hende y tecnologia. Su diseñonan manera ‘Dune’, ‘Intimacy’ y ‘Smart Highway’, ta ambientenan tactil di tecnologia halto caminda e persona y e espacio ta bira uno so. E conexion aki, establechi entre ideologia y tecnologia, ta resulta den loke Roosegaarde ta yama 'poesia tecnologico'. Pesey a invita Daan y wak kico gobierno ta haciendo pa loke ta trata renobacion di bario y centro di ciudad pa e por ripara e atencion cu ta wordo duna na e creacion y mehoracion di espacionan publico caminda hende por bini hunto y tin un miho contacto social. “E renobacion di un bario ta bay semper mara na e participacion di e ciudadano y e necesidadnan di e area y ora nos renoba un bario, nos kier crea espacionan publico caminda hendenan ta haya nan mes bon bini y encurasha pa tene contacto, cu awendia hopi biaha no ta sosode mas dor di nos oranan largo di trabou y tur e aspectonan di e bida diario,” Prome Minister a splica. E diseñonan di renobacion di bario cu gobierno ta ehecutando actualmente tin hopi atencion riba por ehempel, e creacion na Juana Morto di un gazebo caminda e biciñanan por bini hunto den dianan di fiesta, dia di mama of tene un competencia di domino. Mescos ta conta pa e proyecto di renobacion di centro di ciudad. Gabinete Mike Eman kier crea hopi plaza cu sombra caminda hende por bin sinta, trottoirnan mas hancho unda hende por cana trankil y tambe por desaroya terasnan chikito, tur den un concepto caminda kier trece un sfera positivo hunto cu e desaroyo di Aruba. Roosegaarde ta sumamente interesa pa traha cu nos isla pero no solamente pa produci instalacionnan cu ta reenforsa e vision di e renobacion di bario y centro di ciudad, pero tambe ta pone e prome stap den e caminda unda Aruba kier bira un ‘gateway’ entre Hulanda y Suramerica. “Nos kier mustra for di Aruba e conocemento, creatividad y know how Hulandes cu por ta hopi interesante tambe pa ciudadnan manera Sao Paulo y Medellin cu tambe ta trahando riba e renobacion di nan barionan cu e intencion di hisa e calidad di bida di su habitantenan,” asina Prome Minister Mike Eman a comenta na prensa local. “Dia nos a wak e creacionnan di Daan, nos a mira un conexion directo cu loke nos kier haci aki y loke Daan ta haci na Hulanda caminda pa medio di luz, ta haci interesante pa hende bini luganan cu por ta antes no tabatin ningun atencion, pero cu di repente ta haya un dimension mas humano.” E artista tin algun dia caba na Aruba caminda el a bishita diferente bario y luganan publico. Roosegaarde a gana e premio Charlotte Köhler, dos premio di Diseño Hulandes, e premio Media Architecture, Design for Asia y China su Most Successful Design Award. E ta e punto di atencion na exhibicionnan na e Tate Modern, Museo Nacional na Tokyo, e Victoria y Albert Museum na Londres, y varios espacio publico na Rotterdam y Hong Kong. Daan tambe ta un invitado frecuente di e programanan di television ‘De Wereld Draait Door’ y ‘One Minute Wonder.’ Prome Minister Emana bisa adicionalmente cu e ‘lista di ciudadnan na mundo cu lo tin hopi gana di traha cu Daan ta enorme, pero Daan a sinti cu tin algo ta pasando na Aruba cu e kier contribui na dje apesar cu nos no ta un ciudad mundial, pero si tin oportunidad interesante pa ofrece.

album album  

Comentarionan (2)Add Comment
wakebon
February 05, 2013
201.229.35.155
Votes: +3
...

Danki Mike pa e sosten na nos artistanan local!!!!

Erik Martina
February 05, 2013
201.229.127.52
Votes: +8
...

Cu tur respet, pero mas makamba? Di tur e Arubianonan cu a studia y ta studiando na Hulanda, no por a haja ni 1 pa e project aki?

En bez di duna e makamba ki miles di florin, invest den un jiu di tera!

Duna Comentario y/of Comparti riba Social Medi
 
  smaller | bigger
 

busy
 

Connect with Us

Newsletter