Wednesday, 16 April 2014
Rene Herdé: Renobacion di barionan ta essencial pa mehoracion di calidad di bida v Print E-mail
Friday, 01 February 2013 21:40

renobacion

“E miho experiencia y recuerdonan di nos infancia ta den e cas y barionan cu nos a lanta. Ami a lanta den Companashi. Un bario chikito cu relacionnan entre famianan hopi sera. Pa mi e miho recuerdonan tabata cu mi amigonan den e bario aki. E recuerdo y experiencianan den Companashi ta keda cu mi pa semper.”

Rene Herdé, lider di e fraccion di AVP a invita miembronan di prensa pa pensa riba e bario cu nan a lanta y puntra nan mes con e bario ey tabata. Esey djis ta pa ilustra e importancia di e condicionnan fisico y social den cua nos ta lanta como mucha y cu nos ta cria nos jiunan awe. Cu e conocemento aki den mente y e peticion continuo di pueblo rond di nos isla, pa drecha e barionan y crea barionan bunita, sigur y nobo, partido AVP a pone den su programa di partido y di gobernacion, cu mester renoba nos barionan. Mester renoba e caracteristiconan fisico: e cayanan, e acera, lusnan, espacio pa para auto y espacio pa muchanan hunga. Rene Herdé: “ Nos ta convenci cu ta miho pa biba den un bon cas y un bario bunita, limpi y sigur. Barionan manera nos a conoce den pasado. Ta p’esey nos a pone tanto atencion na mehora e condicionnan fisico y social di e barionan. A scohe pa cuminsa, 21 bario rond di nos isla y nos a cuminsa drecha e casnan, e cayanan, manera a pinta den mapa y plannan. Awe por wak e prome resultadonan. Barionan manera Juana Morto Complex y De Vuyst ta den ehecucion. Mescos cu barionan manera Yara, Mabon y Madiki. Loke Bo ta wak ta djies e aspecto fisico.”

RENOBACION SOCIAL

E renobacion di barionan sinembargo no ta solamente fisico, aunke e renobacion fisico ta masha importante. Ken no kier biba den un bon cas, limpi y cu e condicionnan fisico pa biba trankil? E renobacion social tambe ta tuma luga. A trece e habitantenan mes hunto pa nan maneha nan propio bario. Gobierno t’ey pa yuda y sostene cu e ayudo di FCCA, trahadonan social di gobierno y por ehempel polis di bario. Rene Herdé : “Pero lo mas importante ta cu e habitantenan di e bario mes uni y organisa actividadnan pa cuida nan bario, tene limpi y sigur. Ya nos ta wak bon ehempelnan di esaki na Juana Morto Complex y De Vuyst. Habitantenan di otro barionan tambe a pidi pa siña di e bon experiencianan di e dos barionan aki.”

CONFIANSA

Un aspecto hopi importante pa partido AVP segun Rene Herde, ta e echo cu hopi hende a perde confiansa den politica. Pa partido AVP e mal experiencia bou di gobierno anterior tabata motibo pa pone den e programa di campaña, cu restablece confiansa den politica mester a bira un meta importante. Rene Herdé: “Un di e formanan pa restablece confiansa den politica, ta door di cumpli cu loke como partido Bo ta propone of priminti. Awe pueblo por wak cu loke nos a priminti di haci pa mehora bida den nos barionan, ta birando realidad. Wak con a cambia e barionan di De Vuyst y Juana Morto Complex y awor Yara, Mabon y Madiki. Nan ta solamente e prome barionan den e prome fase di 21 bario. Tur bario di Aruba mester bira asina. Y no tin ningun motibo pakico esaki no lo por. Nos ta probando cu si por.” Cu potretnan di con e barionan tabata prome bou di gobernacion anterior y con e mes un caya den e mes un barionan ta awe, Rene Herdé a ilustra su ponencianan: renobacion di barionan ta importante y cumpli cu loke Bo priminti ta importante pa restablece confiansa den gobierno y politica na Aruba. E ilustracionan cu Rene Herdé a presenta tabata di berdad impresionante. Ela invita tur hende pa bai wak e renobacion di e barionan aki pa nan mes y wak con por mehora bida di un comunidad di berdad.

Comentarionan (0)Add Comment
Duna Comentario y/of Comparti riba Social Medi
 
  smaller | bigger
 

busy
 

Connect with Us

Newsletter