Den conferencia di prensa di ayera mainta, e lider di e fraccion di AVP, Rene Herdé, a mustra su desapunto cu algun di e partidonan di oposicion te ainda no ta of no kier realisa cu e relacion entre Aruba y Hulanda a cambia definitivamente. E relacion bieuw di dependencia entre Hulanda y Aruba, den cua Hulanda tabata duna placa pa desaroya proyectonan, traha scol y cayanan, tabata uno cu tabata causa tension continuamente entre e dos paisnan.

Aruba tabata sinti cu e tabata depende di loke Hulanda dicidi. Na Hulanda nan tabata sinti cu Aruba y e otro islanan tabata tuma mucho di nan atencion y no tabata haci cosnan riba nan mes. Na aña 1999 gabinete Henny Eman di AVP a pone un fin definitivo na e relacion aki. E relacion cu tabata wordo domina pa financiamento di proyectonan door di Hulanda a yega su fin. A dicidi pa lanta e “Fondo pa Desaroyo”. Aruba y Hulanda hunto a pone placa den e fondo aki pa financia desaroyo riba cinco area crusial di nos pais. Na aña 2009 e acuerdo aki tambe a yega su fin. Aruba (specificamente AVP) mes a scohe pa termina e relacion di dependencia y cuminsa uno nobo.

CAMBIO NA HULANDA
Na Hulanda mes tambe e forma cu den pueblo y den politica ta wak Aruba y e otro islanan a cambia. Tin un majoria bou pueblo hulandes, den parlamento y gobierno hulandes cu ta prefera pa pone un fin na e relacion estatal cu Aruba y e otro islanan. Nan kier pa e islanan bira paisnan independiente y completamente los di Hulanda. Simpelmente bisa, nan ta prefera di no tin nada mas di haci cu e islanan den Caribe. Hulanda kier concentra tur su atencion y recursonan na su posicion den Europa. Nan no kier tin cu kita atencion di nan problemanan economico, financiero y social grandi, pa mester atende cu e islanan Aruba, Corsou y Sint Maarten mas. Hunto cu esey tin e discucion den parlamento hulandes riba e responsabilidad cu Hulanda tin pa e islanan di reino den Caribe. Den Statuut e responsabilidad aki ta wordo menciona y entre otro ta ensera cu Hulanda tin responsabilidad pa sigura asuntonan manera bon gobernacion, maneho di finansa responsabel, respet pa derechonan (humano) riba e islanan. Pa hopi politico hulandes e responsabilidad aki (“waarborgfunctie”) ta un problema, pasobra e ta nifica cu por sosode cu Hulanda lo mester interveni den gobernacion di un of otro di e islanan aki, pa segura e asuntonan aki. Nan no kier esey!

POLITCA ANTIGUA
Bez tras bez politiconan hulandes ta bisa bon cla cu nan no kier haya nan mes den e situacion di mester mete den asuntonan interno di nos pais. Durante di e dos bishitanan e aña aki so caba, di e senadornan di parlamento hulandes y di e minister Plassterk e siman aki, por a tende nan mes bisa bon cla, cu nan ta masha interesa den desaroyo di nos paisnan, pero cu nan no kier tin nada di mete den nos asuntonan interno. Nan ta aplaudi e iniciativanan positivo cu nan ta wak cu gobierno di Aruba ta tuma pa desaroya nos pais den un forma habri y husto. Pero ta netamente e politiconan tradicional, manera tin den MEP y sr. Booshi Wever, ta sigui wak e relacion cu Hulanda for di e relacion di dependencia y di temor of deseo pa intervencion. Ta pesey nan ta kere cu nan mester informa e politiconan hulandes riba asuntonan interno, comosifuera cu e hulandesnan no sa of no tin e informacion aki. Den combersacion cu e politiconan hulandes, e politiconan tradicional di MEP ta sinti e necesidad di expresa nan mes den forma negativo over di Aruba, den speransa (falso) cu e hulandesnan lo dicidi di mete den asuntonan di nos pais. Y nan como oposicion lo por saca beneficio politico di esey. E siman aki nos a bolbe wak y tende esey di e lider di MEP y di sr. Booshi Wever. Loke nan no ta realisa ta cu nan ta duna e politiconan hulandes e impresion cu nan no por atende nan propio asuntonan interno y ta pidi pa hulandes pa interveni manera den pasado.

RELACIONNAN NOBO
Contrario na e relacion di dependencia di y temor pa e hulandesnan cu miembronan di oposicion ta sigui demostra, tin e relacion nobo cu Hulanda, cu AVP ta sigui traha cun’e. E ta un relacion den cua ta trata otro den un forma habri y igual. No uno di depende di otro, pero di busca mas y miho forma di traha cu otro na interes di tur dos. Como partnernan cu interesnan comun. Den e relacion aki Hulanda no ta e partner cu ta duna placa manera den pasado. Pero e partner cu bon nomber y tremendo relacionnan tur rond di mundo, cu Aruba por haci bon uso didje. Por ehempel den converti Aruba den e porta di negoshi enter Europa y Sur America. Den esey Hulanda ta beneficia. Un relacion di “win-win”.

Comentarionan (3)

Mustra/Kita comentarionan

...

Un cos ta sigur, e no a cambia pa mihor. Stop di pinta tur cos bunita eyfo. Si bo ta un persona cu un tiki skol y inteligencia anto bo por realisa cu e debe di pais Aruba ta precupante. Y si bo sa esei y no ta hasi nada como parlamentario, bo ta actuando di mala fe y no ta fiel na bo votadornan. Boso ta e partido politiko di mas kens cu mi a jega di conose. Ta serca pueblo bo ta hanja bo voto, no na Hulanda ni Haiti. Ta e pueblo bo mester pamper y no malgasta nos plaka y hinca nos den mas debe manera boso ta haciendo ultimamente. No kere cu boso lo gana eleccion e biaha aki atrobe cu ganjamento.

asina mes , January 23, 2013

• 
• +1
• 
• 

...

Meneer, bo ta scirbi; "Pa hopi politico hulandes e responsabilidad aki (“waarborgfunctie”) ta un problema, pasobra e ta nifica cu por sosode cu Hulanda lo mester interveni den gobernacion di un of otro di e islanan aki, pa segura e asuntonan aki. Nan no kier esey!" ..... Pero meneer, alavez nan lo ta implica cu -mihor boso no haci cu nan (gobierno di Reino) lo MESTER interveni aki na Aruba.......of no?

The Observer , January 23, 2013

• 
• +1
• 
• 

...

Aunque e gobierno/parlamento aki tin hende cu e capacidad, y mas importante ainda, e bon bolundad, toch mester lamenta cu e tin hende cu ta carece principalmente di e bon boluntad. Un ta daña pa otro. Ta parce cu lo tin un role model robez den cabez di algun of hopi, cu ta den conflico cu virtud absoluto, den conflico cu bondad. Nos por haci tur cos cu nos kier, pero nos mester para responsabel pa e consecuencianan di nos actonan den bida. Y, ta nos tur un dia lo mester muri den e bida aki... Laga nos no descubri te cu e ora ey, cu nos alma ta maligno den bista di e Dios Tata di Cristo Hesus Su Yiu. “Bida” no ta caba ora esun di e mundo aki termina...no... Wowo di hende no ta capaz pa mira tur cos... Parlamento di Aruba lo mester cuminsa duna nos pueblo e respet debido...

The Observer , January 23, 2013

• 
• +0
• 
• 

Duna Comentario y/of Comparti riba Social Medi

Mustra/Kita e formulario di comentario

Nomber

Email

Comentario

smaller | bigger

Subscribe via email (registered users only)

I have read and agree to the Terms of Usage.

Duna Comentario y/of Comparti riba Social Medi