Tuesday, 21 October 2014
Booshi Wever: Maneho eratico di Mike de Meza ta keda kibra nos sistema di belasting y ta dirigi riba privilegiamento di esnan yega na su persona y AVP Print E-mail
Tuesday, 22 January 2013 21:23

Booshi Wever008

Cu inmenso dolor nos di UPP por a tuma nota cu e maneho eratico di Mike de Meza ta sigui kibra nos sistema autonomo di belasting aki na Aruba. Apesar cu ningun instancia aki na Aruba no ta habri nan boca y mustra preocupacion p’esaki, como ciudadanonan di e pais aki a bira tempo pa nos habri nos wowonan y mira ki un desaster ta wordo cometi.

UPP sa cu “belasting” riba su mes no ta un topico popular bou di pueblo, pero e ta un di e pilarnan importante den e area di entrada pa pais, y mester ta algo cu ta completamente los for di politica. Loke a bin ta sosodiendo desde fin di 2010, ta un maneho di liquidacion sistematico di e departamento autonomo cu ta belastingdienst, cu e simpel meta pa sirbi interes partidario di e minister. Promer tabata pa comerciante yega na e partido cu di un manera of otro a wordo privilegia, na e toma di poder dor di AVP na 2009, y poco poco a sigui tambe esnan cu manera un kleconchi of carpata a pega na minister di Finanzas djis pa por haya cierto beneficionan. Tur esaki sin tin experiencia, sin tin e preparacion of estudio necesario. Mientras cu no tin motibo valido pa un eliminacion di e Direccion di Belasting, nos por saca for di un Landsbesluit di dia 7 di januari, conteniendo yen di contradiccion, erornan y un falta di splicacion concreto di motibo pakico mester a yega na tal decision. E unico deduccion cu nos por tin for di den prensa ta cu minister, pa cumpli cu su promesanan haci na sindicato di Douaneronan, ta bai over na separa e dos entidadnan aki for di otro, y ta awor ta bai wak con ta bai yena e structura nobo aki. Den e nieuwsbrief di minister di Finanzas nos por mira cu ainda no tin un "stappenplan", mientras ta presentando un "verbetertraject" tanto pa Douane como pa Servicio di Impuesto. Pues gobierno y minister de Meza, ta elimina un instancia, creando dos nobo, pero sin presenta e cambionan real. Unico cos cu a resulta, ta cu a crea mas posicion, mientras a kibra e parti di e Direccion di Belasting, pasobra aparentemente eseynan lo ta forma un estorbo pa e minister. Na momento cu bo tin pensa mes di haci cambio, lo bo mester na prome lugar determina kico ta loke bo kier bai cambia, pakico lo bo kier haci e cambio y presenta e solucion na pueblo, Parlamento y na e trahadornan. Nos por scucha di Minister de Meza cu e trahadornan ta satisfecho, pero ken a bisa cu loke ta e producto final aki un aña por ehempel ta algo cu e empleadonan lo por acepta? Pa colmo nos por mira den prensa a sali riba 5 di januari 2013 cu Mike de Meza, ta bisa cu e proceso di separacion di Douane y di departamento di impuesto por dura hopi aña. Mas tristo ta cu e mesun placa di belasting cu ta wordo cobra na pueblo, sea via di Douane of Belastingdienst, ta wordo malgasta pa asina paga compinchinan. Banda di un director di belasting (Directie) y un hefe di belastingdienst, y un hefe di Douane, awor nan ta paga pa dos biaha un Algemeen Directeur, un Operationeel Directeur y un Financieel Directeur. Defacto a bin 5 posicion halto mas, banda di e dosnan cu ta wordo paga caba. Y mas tristo ta cu cada uno sin wak nan preparacion, experiencia, conocimento y studio; sigur di 5 di e 6 nan por tin hopi “vraagtekens”. Mientras tambe parce cu tin den nan cu den pasado a haci malo y awor ta wordo recompensa, y otronan ta wordo manda cas. Y ainda nos por tende na fin di aña un parlamentario di AVP, esta Juan David Irausquin, bisa cu no ta e cantidad di hendenan ta aumenta, sino e costonan. Aki claramente nos por mira net lo contrario: ta wordo crea extra posicion, mientras cu apesar ta bisa ta manda e otro empleadonan sea pa Belastingdienst of Douane, cierto ta cu ta na cada banda mester bin e mesun funcionnan. Pues no ta solamente e dos biaha tres directornan lo bai tin, pero tambe 2 biaha di diferente funcionnan necesario pa run cada departamento separadamente. Y pa colmo dos di e funcionnan aki lo wordo carga pa un zogenaamd interim-directeur, cu ta pensionado. Incapacidad di e hendenan y e organisacion cu minister a crea aki, ta sali claramento tambe for di e hecho cu pa e trayecto di servicio di Douane un consultancy, den e caso aki DELOITE, ta wordo busca pa yuda cu preparacion, y na otro banda, esta pa Servicio di Impuesto a busca Ernst & Young. Tur e cambionan aki cu a bin ta tumando lugar, ta sin e presentacion na Parlamento di e plan, corda na e pueblo. Y mientras cu ta sigui den jungle aki cu ta wordo crea, patronahe, vriendjespolitiek, preferencia y persecucion ta na ordo di dia. Cada ken ta haya loke ta pidi. Tur esaki mei mei di show y fiesta, pa asina keda kita e atencion.

Comentarionan (2)Add Comment
Ban serio
January 24, 2013
201.229.26.38
Votes: +0
...

Boosji ta papia di NOS ta ken mas ta riba e lista ey??????

R.R. Ras
January 23, 2013
201.229.91.143
Votes: +1
...

Previlegio ta loke a sosode bao di mando di MEP y Booshi mes como minister e tempo ey y awor kier busca pa medio di politica di yora pa mustra dede ariba otro. Please grow up!

Duna Comentario y/of Comparti riba Social Medi
 
  smaller | bigger
 

busy
 

Connect with Us

Newsletter