Saturday, 01 November 2014
Partido MEP ta desea e pueblo di aruba un prospero y felis anja 2013, yena cu hopi bendicion Print E-mail
Thursday, 03 January 2013 12:01
DSC_2063
Partido Movimiento Electoral di Pueblo MEP ta mira atras riba un anja hopi exitoso, un anja den cual a restructura e partido y a cuminsa duna e partido un cara nobo. Durante Congreso 2012 e structura nobo a keda aproba, caminda a bin cu directivanan di districto y lidernan di bario.
Segun lider di MEP e structura aki ta duna MEP e structura di mas fuerte cu cualquier partido politico na Aruba tin. Tambe a lansa e logo nobo, un logo fresco y moderno pa campanja 2013. Partido MEP a conose dos candidato nobo, hoben y prometedor, cu ya caba a bishita varios cas, y a duna discursonan den diferente reunionnan publico. Den 2012 partido MEP a tene varios reunionnan di contacto cada luna, bishitando asina tur districto na Aruba, caminda e candidatonan di e barionan a trese nan punto di bista padilanti, y kiko ta e solucion cu MEP lo trese. Candidatonan di MEP a bira mas activo tambe via programanan radial. E presencia di e candidatonan a wordo mas sinti den 2012, y den 2013 lo bira hopi mas.
 
YEGA
Partido MEP a haya tambe su hala hubenil nobo, YEGA, cu den poco tempo a contribui na obranan importante pa nos pais. YEGA a participa na accion di limpiesa, pa asina demostra e compromiso na nos medio ambiente. YEGA a participa na accion social pa yuda alegra pasco pa famianan den necesidad, asina demostrando e compromiso cu nos hendenan.
 
2013
Anja 2013 ta un anja crucial pa Aruba. Esaki ta e anja den cual cada cuidadano por expresa su bos, sea di aprobacion of di desaprobacion pa locual e gobierno na mando ta hasiendo. Anja 2013 ta un anja tambe di retonan financiero gigantesco pa nos pais, cu ta para na borde di un bancarota. Un debe nacional nunca antes bisto, y deficitnan presupuestario demasiado halto structuralmente. Pa prome biaha pais Aruba a haye den problema cu su balansa di pago, bow mando di gabinete Mike Eman. E gobierno aki a perde contacto cu pueblo, y a lubida na caminda riba e ser humano. A inverti demasiado den beton, klinker y asfalt, creando asina debenan gigantesco. Y a lubida cuanto famia ta pasa anochinan largo sin coriente, y dianan si awa. Sin por pone cuminda riba mesa pa nan yuinan. Sin por haya un trabow. Pesey anja 2013 ta crucial, e anja den cual nos lo cambia e rumbo di nos pais. Pa hiba nos pais den rumbo di prosperidad y bienestar pa nos pueblo, no mas den klinker y asfalt, sino inversion den e ser humano y pa pone e ser humano central bek. Inversionnan di desaroyo di nos economia pa crea empleo pa tur esnan cu ta biba na Aruba y no tin empleo. Inversion den husticia, pa combati criminalidad y pa hasi Aruba un pais mas sigur. Inversion den ensenjansa pa brinda nos muchanan un calidad mas halto di ensenjansa. Duna prioridad na fortifica e nucleo familiar, pasobra si e nucleo familiar ta fuerte, e fundeshi di nos pais ta fuerte. "Den nomber di partido Movimiento Electoral di Pueblo MEP mi ta desea abo y bo famia un felis y prospero anja 2013, yena cu hopi dicha y bendicion, y den cual tur bo deseonan por keda cumpli", lider di MEP Evelyn Wever-Croes a finalisa.

dowers dowers  

Comentarionan (0)Add Comment
Duna Comentario y/of Comparti riba Social Medi
 
  smaller | bigger
 

busy
 

Connect with Us

Newsletter