Friday, 31 October 2014
Discurso di Mike Eman a enfoca riba logronan y expectativanan pa futuro di Aruba Print E-mail
Wednesday, 02 January 2013 18:05

PromeMinisterSpeech

Discurso di fin di aña di Prome Minister Eman a inicia cu e paisahe bunita di Aruba den combinacion cu e cancion di The Cats “One way wind” cu a wordo skirbi despues di nan bishita na Aruba den añanan 60. Impresiona cu e biento fuerte y constante y e matanan cu ta crece segun e biento ta supla, The Cats a skirbi e cancion aki cu a bira un hit. Prome Minister a uza e metafora, esta e mata di Divi Divi cu ta crece segun e biento ta supla den un solo direccion, pa siña nos acepta y traha cu e forsanan di naturalesa, di loke nos Creador a duna nos.

E icono di nos flora, e mata di Divi Divi ta siña nos esey. Apesar di secura, e biento fuerte y e solo cayente e ta keda para firme y orguyoso. Den retrospectiva Eman ta enfoca riba e rescate di Aruba na comienso di e gobernacion di su Gabinete den tur sentido di palabra. Aruba tabata den deterioro. A sali den buskeda di harmonia y trece dialogo den e pais. E union tabata bisto mesora. Un union cu a keda demostra den e trabou grandi cu a wordo haci dor di boluntarionan den restauracion di e edificio di gobernacion. A reestablece e relacionnan cu Reino y otro partnernan. Tur esaki na bienestar di Aruba y su hendenan. Cu e crecemento economico ta evidente, no cabe duda, pero e realidad ta cu e crecemento aki a duna muestra di un contraste grandi entre hotelnan di 5 strea y barionan deteriora, di scolnan den mal estado, centronan di ciudad, casnan di anciano, edificionan historico y asina por sigui. E contraste aki a pidi pa un reflexion mas profundo riba sostenibilidad y con traduci e progreso economico den bienestar general, con percura pa un desaroyo cu oportunidadnan nobo den tecnologia y ciencia. Pesey, asina Eman a bisa, a concentra esfuersonan no simplemente riba locual ta laga e economia crece, pero cu ta mehora tambe e calidad di bida di henter e comunidad. E acercamento di gobierno tabata basa riba e pensamento simpel pero importante cu un Aruba cu ta un luga special pa biba pa nos hendenan, ta un Aruba dushi pa bishita, pasobra na final di dia prosperidad ta surpasa placernan material. E ta supera preocupacionnan materialistico. E vision di un Aruba cu un desaroyo sostenibel y duradero ta acopla na e bienestar general di e comunidad. E equidad social ta esencial y pesey a haci un empeño grandi den cuminsa na recupera e poder di compra di e pueblo. A inicia cu e Dialogo Social pa riba un plataforma amplio yega na consensus riba temanan cu ta regarda henter pueblo di Aruba. Eman cu masha orguyo a papia di e inicio di un epoca nobo den democracia di Aruba, e responsabilidad comparti cu gremionan sindical y empresarial. Den e Dialogo Social a yega na acuerdonan firme manera entre otro rescate di e fondo di Pensioen di empleadonan publico, introduccion di e reparatietoeslag, reduccion di tarifa di awa y coriente, introduccion di un pensioen general pa tur empleado na Aruba, Flex pensioen y hopi mas. Asina a yuda hisa e poder di compra di e ciudadano manera cu tabata e intencion. E recuperacion di Aruba den tempo cortico ta bisto y ta cosecha admiracion di mundo henter y ta sirbi como un inspiracion pa otronan. E harmonia ta bek den e pais, relacionnan cu Reino a mehora, turismo a crece, e atencion social t’ey bek, revitalisacion di centronan di ciudad y renobacion di bario, scolnan y infrasctura. E conexion entre e progreso economico y social ta un realidad na Aruba. Tirando un bista den loke por spera Eman a bisa cu 2013 ta bay ta un aña di mas progreso ainda. Trabounan den infrastructura ta continua. Varios proyecto ta wordo ehecuta den 2013, manera e vierbaansweg entre Playa y San Nicolas, mudamento di waf di container pa Barcadera, e expansion y renobacion grandi y necesario di hospital, construccion di ringweg rond di Oranjestad, ta bay construi 5 Centro Multifuncional. E di tres pilar economico a cuminsa caba cu establecimento di entre otro TNO, GasUnie, Rietveld Academie. Aruba ta enfoca den bira e prome economia sostenibel na mundo y pa realisa esaki Aruba a bira partner cu institutonan renombra manera Carbon War Room, Harvard University, TU Delft y The New America Foundation. E potencial funcion di gateway di Aruba ta haya su contenido den un Conferencia na nivel mundial na mei na Aruba, “Europe meets the Americas”. Aruba ta canando cu pasonan firme den e bon direccion.

Comentarionan (3)Add Comment
kiko ta su logronan?
January 03, 2013
201.229.78.228
Votes: +9
...

Sin politiek, kiko Mike a hasi?
Kiko e a logra?
Cua compania, departamento, negoshi a crese of progresa cu Mike, sin politiek?
Mike ta NADA sin politiek?

... Low-rated comment [Show]
... Low-rated comment [Show]
Duna Comentario y/of Comparti riba Social Medi
 
  smaller | bigger
 

busy
 

Connect with Us

Newsletter