Monday, 21 April 2014
Parlamentario Donny Rasmijn: Aña 2013 ta hopi importante y interesante riba tereno economico pa Aruba Print E-mail
Wednesday, 02 January 2013 14:27
DSC_2063
Donny Rasmijn ta desea henter comunidad Arubano un felis aña 2013 cu Dios por drama su bendicion den abundancia riba tur persona y familia riba nos pais. Aña pasa tabata uno di Gobierno internacionalmente cu efectonan grandi y e aña aki lo ta un aña di progreso den tur sentido. Nos a experencia cosnan grandi tanto local y internacional. Tabata tin eleccion na paisnan manera Merca, Venezuela, Hulanda y Corsow.

Paisnan cu nos tin hopi laso cu nan y nos relacion cu e paisnan aki ta di suma importancia. E pueblo Mericano y Venezolano a re-elegi nan president. President Obama a hereda un pais cu tabata den un recesion economico y a sa di pone e economia crece bek despues di a inverti hopi placa. Especialmente e industria di auto a haya ayudo substancial y Obama a duna lus berde pa intensifica produccion di petroleo y gas riba e pais. Pero e prome reto cu e presidente tabata tin ta pa preveni cu Merca lo a cay den e asina yama ‘Fiscal Cliff’ unda cu si gobierno no subi belasting y no reduci gasto, e pais lo cay den un resecion enorme cu e consecuencia cu hopi hende lo keda sin trabou y ayudo social. Dia promer di januari marduga senado di Merca a aproba un ley pa subi belasting riba personanan cu salario halto y asina evita un desater economico na Merca.  Apesar di ta combatiendo e malesa di cancer, President di Venezuela a hiba un campaña cu exito y a wordo re-elegi pa su pueblo. Actualmente e situacion di Hugo Chavez a empeora cu e no por eherce su trabou como president. Segun e constitucion Venezolano, si pa dia 10 di januari, Chavez no por asumi su puesto, mester bin un eleccion nobo dentro di 30 pa 90 dia.  Ya pa varios aña gobiernonan di Hulanda y Corsow no tabata pasa nan periodo di gobernacion completo. Na Hulanda tabata tin 4 eleccion den un periodo di 10 aña y pais Corsow ya tabata tin 2 eleccion den apenas 2 aña. E instabilidad den gobernacion di Hulanda y Corsow ta afecta un bon gobernacion di un pais.

“Ta di spera cu pronto mas pais den reino por tin un gobernacion mas stabil manera cu nos pais conoce”, Rasmijn ta bisa. Na Aruba lo tin eleccion parlamentario den september 3013. Nos pais ta experenciando un di tres periodo completo di gobernacion cu ta haci Aruba e pais cu gobernacion mas stabil den reino. Despues di a pasa dor di diferente pruebanan manera, recesion economico den aña 2009-2010 y ciere di refineria Valero na 2012, Gobierno di Aruba a sa di inverti den diferente proyectonan importante pa e pais creando trabou pa hopi mama cu tata di famia. E inversionnan aki lo cuminsa duna nan fruto den aña 2013. “Un reto grandi cu nos ta experencia actualmente ta pa crea trabou riba un nivel mas halto pa ex-trahadornan di refineria”, Donny ta bisa. Mientrastanto, PDVSA di Venezuela a bishita e refineria na diferente ocasion y e posibilidad pa nan cumpra e refineria y pone den operacion ta keda. Compania REPSOL ta bay cuminsa pronto cu estudionan seismico pa determina si nos tin petroleo of gas den nos awa teritorial. Si resulta cu nos tin rikesa natural den nos awa teritorial, e posibilidad ta grandi cu e refineria lo conoce un re-apertura. “E proximo operacion di e refineria mester ta cu diferente inversion y uno hopi estricto riba proteccion di nos medio ambiente”, segun Rasmijn.

Aruba a firma un acuerdo cu Carbon War Room (CWR) na Rio de Janeiro aña pasa unda cu Gobierno di Aruba hunto cu CWR, lo haci nos pais 100% dependiente di energia alternativa manera solo, biento y lama. Re-apertura di refineria, produccion di petroleo of gas natural y aplicacion di energia alternativo, lo crea trabou pa acapara e ex-trahadornan di Valero y futuro profesionalnan Arubano. Banco Central a pronostica un crecimento economico real di 5.6% pa aña 2013 basa riba nos industria turistico cu ta sigui crece y e inversionnan grandi cu Gobierno ta bay haci den 2013. “Cu tur locual cu ta na caminda, Aña 2013 ta hopi importante y interesante riba tereno economico pa Aruba!”, Rasmijn ta termina.

Comentarionan (1)Add Comment
RSA
January 03, 2013
201.229.13.94
Votes: +2
...

Bon, pueblo di Aruba tambe sa lesa noticia internacional; bo no a trece nada nobo padilanti y bo expectativanan pa Aruba ta nada mas cu deseo , pasobra no tin nada concreto menciona( puro scuma).

Duna Comentario y/of Comparti riba Social Medi
 
  smaller | bigger
 

busy
 

Connect with Us

Newsletter