| Minister dr. Richard Visser: Lago Heights pronto lo tin un facilidad cu San Nicolas lo ta hopi orguyoso di dje |
 |
 |
| Friday, 28 December 2012 12:17 | |||
 Recientemente Minister di Salubridad y Deporte, dr. Richard Visser a bishita Centro di Bario Lago Heights unda cu e trabaonan di renobacion y construccion ariba e veld di baseball a cuminsa. E proyecto completo ta representa un inversion di mas di 400 mil florin, cual ta wordo realisa pa Minister Visser y su team, hunto cu Minister di Finansa, Mike de Meza.
Esaki no ta e prome proyecto cu Minister Visser ta inicia pariba di brug, pero si e ta un di e proyectonan cu lo tin un impacto hopi grandi ariba e futuro di e deporte di baseball na San Nicolas. Ademas e centro lo tin un impacto sigur ariba e desaroyo di e hobennan cu ta biba, recrea y bay scol den e barionan rond di Centro di Bario Lago Heights. Minister Visser a splica cu e veld di Lago Heights ta un di e cuater proyectonan unda cu ta invertiendo sumanan substancial den un tempo relativamente cortico. El a añadi cu e mesun contratista cu a gana e destaho pa e veld y e speeltuin, tambe a gana e destaho pa e upgrading di e veld di Pepsi Cola, cual lo cuminsa asina cu e proyecto di Lago Heights ta cla. Esaki ta algo hopi grandi pa San Nicolas, Minister Visser a bisa. E veld mes y e speeltuin lo wordo completamente renoba, lo construi dug out, tribuna y un muraya ful rond di e facilidad pa provee mas siguridad pa e muchanan por hunga den tur trankilidad, tambe lo instala score board y elementonan necesario, e mandatario a resumi. Minister Visser a bisa cu durante di un inventario di facilidadnan deportivo na San Nicolas a constata cu mayoria di esakinan no ta den un estado aceptabel pa uzo. Tambe a tene na cuenta e scolnan, clubnan y otro organisacionnan cu ta haci uzo di e facilidadnan y por bisa cu e veld di Lago Heights, hasta den e mal estado cu e ta, ta wordo uza bastante, pero sigur lo wordo uza hopi mas ora cu e trabao bin cla. Val Peterson, kende ta encabesa e programa di baseball di e Centro di Bario Lago Heights a bisa cu danki na gobierno y Ministerio di Deporte porfin "The nightmare is over!" y cu entusiasmo nan ta warda e dia cu e veld lo ta cla. Porfin baseball lo por conoce un desaroyo grandi atrobe na San Nicolas, e boluntarionan, kende ta traha duro incansablemente lo traha cu mas smaak ainda y hobennan, nan famianan y fanaticada lo por disfruta di un facilidad fabuloso y weganan bon anima. Sr. Peterson ta splica cu awendia asina mes cu e facilidad ta deteriora, boluntarionan ta sigui padilanti y muchanan ta bin train, aunke con dificil e situacion di training ta. Presidente di White Sharks, Raymond Kamperveen a splica cu entre 60 pa 80 mucha ta train ariba e veld y nan ta purba di motiva tur dia mas mucha cu ta biba den e bario pa bin train. Tin tres team; uno di 5 pa 6 aña, uno di 7 pa 8 aña y uno di 9 pa 10 aña ta train ariba e veld aki. Ademas tin un team di hoben mas bieu tambe ta train tur dialuna na Lago Heights, el a añadi. Sr. Kamperveen a expresa cu e proyecto aki no ta solamente importante pa e deporte, pero pa e comunidad y lo trece cun'e un cambio di mentalidad cual ta beneficia e hobennan y desaroyo di deporte. Representante di Minister De Meza, Ramon Arrindell tambe tabata presente na e ocasion aki y a splica cu durante campaña Sr. De Meza a papia cu diferente organisacion y Val Peterson tabata un di e personanan cu a keda tras di dje pa drecha e veld y esaki awo ta wordo realisa hunto cu y pa medio di Minister dr. Richard Visser. El a splica cu na Esso Heights tambe ta drechando e veld di basketball y volleyball y lo provee un cura pa e speeltuin.
Comentarionan (7)Mustra/Kita comentarionan ...
Henter Aruba ta den un renovacion positivo.
Minister Visser ta un motor grandi di e cambinan aki. Henter e deasaroyo den nos pais sigur lo duna su fruto pa nos pais den e siguiente anjanan. Pa bien !!!
,
December 28, 2012
...
Con a para cu e proyectonan bunita na Pos Chikito?
Pa capricho politico y berguensa boso no kier termina cu nan? Esta un berguensa bo(so) ta pa e cambio DIMES! Desiree Croes of di Sauce lanta for di sonjo y bringa pa bo bario y exihinan pa caba cu e proyectonan pa nos muchanan!
,
December 28, 2012
...
M'a tende cu como kraakdo di lomba bo twt mihor cu como minister? Kiko bo mes ta kere?
Save Aruba from AVP.
,
December 28, 2012
Duna Comentario y/of Comparti riba Social Medi |
Mustra/Kita e formulario di comentario
