| Minister dr. Richard Visser cu elogio y palabranan di animo pa e "super club" Brazil Taekwondo |
 |
 |
| Friday, 28 December 2012 11:47 | |||||||||
 Minister di Salubridad Publico y Deporte, dr. Richard Visser e siman aki a celebra e triunfo internacional di Brazil Taekwondo hunto cu e deportistanan y e lidernan di e organisacion aki. Durante un bishita na su oficina, e mandatario a expresa palabranan di elogio y animo pa e club di arte marcial.
Coach y tesorero di Brazil Taekwondo Stichting, Robert Giel a comenta cu ta pa prome biaha cu un T5 internacional a wordo organisa pa e categoria di edad di e atletanan hoben presente, kende cu a sali campeon absoluto na Corsou. Usualmente atletanan di taekwondo ta participa como atleta individual den campeonato, pero un T5 ta un competencia pa teamnan consistiendo di cinco atleta cada uno. Minister Visser a felicita e hobennan y nan lidernan cu e logro grandi. E titular di deporte cu entusiasmo a categorisa Brazil Taekwondo como un "super club". El a reconoce nan spirito di deportista y a anima nan pa nan sigui cu nan esfuersonan den beneficio di hubentud di Aruba, nan enfoke y e forma organisa cu nan ta train. Giel a splica cu Aruba tabata hopi bon prepara pa e competencia contra e teamnan di Surinam, Corsou y Venezuela. Esaki tabata resultado di trainingnan duro y preparacion bon delinea cu metanan fiho cu tabata tumando luga for di cuminsamento di aña, el a añadi. Asina Brazil Taekwondo ta prepara pa tur torneo, cu metanan poni nan dilanti y un bon schedule di training. Minister Visser a subraya cu a inverti hopi den arte marcial e ultimo aña aki na Aruba, particularmente den taekwondo, treciendo e World Championships Aruba. Tanto e inversion den e campeonato como den e federacion di Aruba tabata decisionnan di maneho hopi consciente, pasobra taekwondo ta e arte marcial mas grandi na Aruba y ta contribui inmensamente den e crecemento, desaroyo y formacion di nos hobennan.
|
Mustra/Kita e formulario di comentario
