E siman aki a habri cu un discusion feros entre dos operado di Watersports dilanti Hyatt Regency Hotel. E discusion dado momento a pasa pa agresion te cu turistanan mester a interveni. Un rato despues un di e partidonan a yega cu mas hende pa regla cuenta….na final Polis a detene e conocido Rodney Ramazan, su ruman y su sobrino. Husticia ta acusa nan di menasa.
E problema aki ta data for di masha aña caba, for di tempo cu un di nan a haya un permiso pa establece su tent eynan for di defunto Minister Watty Vos den añanan 80. Claro cu a cuminsa cu un tent chikito pero cu aña e actividadnan a crece, a cuminsa huur stoel, palapa y asina por sigui menciona. Di un operado el a bira dos banda di otro, cu automaticamente ta traduci den discusion y “husstlemento” constante pa haya turista. Regularmente e discusionnan ta caba na pelea y a crea un cultura cu esun cu e boca mas grandi, semper ta sali gana.
AHATA y hotelnan na mas di un ocacion a bati na porta di Gobierno pa regula e permisonan di operacion cu a otorga e companianan aki. Di un banda e no ta husto pa e hotelnan cu si ta paga miles di florin pa aña na erfpacht, mientras Gobierno ta duna e hendenan aki permiso pa habri un negoshi den porta di hotel sin cu mester paga e mesun suma. Pio cu e nivel di servicio no ta alcansa standard di e hotelnan, causando cu regularmente ta horta turistanan of no ta cumpli cu e servicio priminti.
Polisnan di otro banda ta cu nan mannan mara pasobra cada un di e operadonan aki tin un permiso, sea cu nan a haye di un Gobierno di AVP of MEP. Ambos partido, cada un di nan forma, a aporta na e “desordo” cu tin awendia dilanti porta di e hotelnan High Rise di nos isla.
E trio cu a busca problema den siman mientrastanto ta permanece deteni. No ta conoci si Ministerio Publico lo pidi pa alarga nan detencion, pa manda un mensahe mas duro na tur cu ta pensa di bringa dilanti turistanan y mandando un señal masha mahos pa tur turista interesa pa bin bishita e isla mas “sigur” den Caribe.
