Diamars gobierno di Aruba a wordo informa cu Venezuela a prolonga den cual e ta cera tur trafico aereo y maritimo entre Venezuela cu Aruba. E noticia aki naturalmente a cay den masha mal tera pasobra cu Gobierno tabata tin e speransa cu tabata un medida realmente pa 72 ora so. Mientras tanto tin awor aki 187 pasahero cu paspoort Hulandes cu ta pega na Venezuela y cu no por bin bek. Gobierno a expresa su lamento pa e decision aki di gobierno Hulandes, atrabes di consul general di Venezuela y diamars prome minister Evelyn Wever-Croes a tene un combersacion cu canciyer Areaza di Venezuela, kende ta encarga cu asuntonan exterior di Venezuela. A splik’e cu e decision aki ta afecta e pasaheronan severamente. El a pidi pa cooperacion pa traha mas duro riba tema di contrabando mirando cu desde 2016 Gobierno di Venezuela ta pidiendo atencion riba gobierno di Aruba riba e problema aki, pero e gobierno anterior di Aruba no a haci caso di Venezuela su decision.
Cu tabata tin contrabando pisa desde e tempo ey caba, pero e gobierno anterior no a haci caso di esaki.
A splica e canciyer cu Gobierno tin apenas 6 siman den gobierno y combatimento di ilegalidad, di contrabando. di corupcion, di criminalidad ta un prioridad halto riba agenda, pa duna nan e tempo pa por haci esaki.
El a compronde esaki. E ta dispuesto pa traha cu gobierno di Aruba tambe pa por yega na un solucion. A splik’e cu den nomber di conseho di minister, awe mainta den ministerraad a tuma e decision pa prohibi importacion no certifica di koper. Kiermen tur hende cu kier importa koper, mester tin documentonan di origen, di certificacion, si bo kier importa nan pa Aruba. Si bo no tin certificadonan di origen, bo no por importa nan. Consecuentemente esnan cu ta horta koper na Venezuela, ta saca nan ilegalmente for di Venezuela y purba di importa nan na Aruba, tambe pa doorvoer, no ta wordo permiti mas entrante inmediatamente.
E medida aki ta un medida cu Gobierno Venezolano a aprecia y a pidi e ora pa diabierna, durante di un reunion cu lo tin na Aruba, sigui elabora riba e detayenan di areglo. A bisa cu esey por, pero prome minister kier awor aki si, cu ta pone un punto final pa tene nos hendenan pega na Venezuela y kier nan na Aruba prome cu diabierna.
Riba esaki e canciyer tabata tin cierto sugerencianan con por trece e pasaheronan bek, cu Conviasa. Ta den contacto cu colega prome minister di Corsou Rughenaat tambe, pa mira con conhuntamente por trece pasaheronan cu ta pega na Venezuela. Ohala cu por logra, pero ta bolbe haci un apelacion riba tur hende. Si bo no mester bay Venezuela, no bay. Si bo ta eynan y bo tin cu bin bek Aruba, purba toch via di otro destinacionnan pa bin Aruba. Di parti di gobierno ta haciendo tur lo posibel pa trece nos hendenan bek, pero e no ta facil. Ta deal aki cu un situacion, un problema existente pa hopi aña cu lamentablemente e gobierno anterior di Mike Eman a neglisha por completo. Nan tabata sa caba cu e cos aki por a escala di e forma aki, pero no a worry pa haci nada. Awor aki e gobierno ta sinta cu e problema. Ta sinta cu tur e 187 personanan pega na Venezuela y ta haciendo tur cos na nan alcanse pa yega na un de escalacion y un solucion pa e problema aki y cu ohala por trece nos hendenan Aruba bek sano y salvo y pronto. Si bo no mester bay Venezuela, no bay Venezuela.
Pa loke ta importacion di fruta y berdura, ya caba cu ta den consulta cu esnan cu ta importa fruta y berdura, cu por trece nan for di otro destinacion. Ta trahando riba esey pa no sinti e scarsedad. Asina ta bay atende cu e tema aki cu lamentablemente tin cu bisa, otro sorpresa mas cu gabinete anterior di Mike Eman no a atende cun’e, pero e gobierno ta bin y atende cun’e, poniendo e ser humano central, poniendo e bienestar di pais Aruba na prome luga, pero di nos hendenan cu ta pega na Venezuela tambe. Esaki ta un update y e prome minister lo tene comunidad di Aruba informa di cualkier desaroyo cu por tin.
