Pa loke ta e prome permisonan, di parti di Dimas nunca prome permiso tabata on hold segun e directora Kathy Paskel.
A trata diferente tipo di permiso. Tin permiso di studiante, tin permiso di rentenier, di trabao, di famia. Cada un cu nan rekisitonan. Si ta e parti di trabao, Dimas ta mantene su mes na e checklist y si e hende ta cumpli cu documentonan cu ta poni riba dje. Un di nan ta un declaracion di un DPL pa loke ta mercado laboral. Esey ta un rekisito pa e persona y si e tin’e, por pone den tramite pa procesa. Esey no a cambia, segun Ruiz-Paskel.
Tin custumber caba di atende a base anual, rond di 15 mil peticion. Si djis coy e cifranan di acerca cu ta September aña pasa te cu 9 di Augustus, tin 12.616 peticion atendi den e sistema. Locual cu ta mustra e aña aki y e cantidad pa aña lo bira tiki menos cu 15 mil. Esaki ta cifranan di 9 di Augustus. Tin algun luna mas pa cera e 12 lunanan. Pero e ta un volumen grandi. Ta un volumen cu Dimas ta atende cun’e, no for di awo, sino desde semper. E no ta algo particular cu e ta asina hopi pa e departamento.
No mester bandona Aruba pa warda permiso
Tin un grupo cu minister a defini cu no necesariamente mester bandona e isla. Si nan mester percura pa nan extende nan estadia turistico. Si ta papiando cu ta tramita un peticion den un luna, ta nifica cu den e periodo si e ta como turista, lo dun’e un contesta si of no. Ta un maneho provisorio. E ta algo temporal y e ta vigente for di December cu e minister a anunci’e, y lo ta valido te cu dia 1 di December proximo.
Dispensacion
Dispensacion ta un termino cu a crea den e sentido cu nan ta adresa na e minister, pidiendo despensa pa a keda ilegal, of cu a drenta ilegal. Segun Ruiz-Paskel, loke cu a wordo publica, minister tabata hopi cla cu e grupo cu el a defini segun maneho. Nan por spera nan permiso na Aruba. Cu esey tambe, e ta bisa demas e otronan cu no ta fit e scope, cu en principio nan y tur otro e maneho regular ta vigente. Esey ta nifica cu e prome permiso mester wordo spera den exterior y Dimas, na momento di toets un peticion lo controla si esaki ta e caso y si constata cu e persona ta na Aruba, Dimas lo nenga e permiso tambe pa motibo di e estadia ilegal, si e no ta fit e scope cu e minister a defini. E regla general ta vigente y e excepcion cu ta duna ta na un grupo specifico segun definicion di e minister.
