Persona a wordo tira mata den cas na Sero Largoweg

Tin un persona a wordo haya sin bida den un cas. E persona aki a wordo tira segun e prome informenan di Cuerpo Policial y tin un investigacion cu a cuminsa.
Vocero di Cuerpo Policial, Lito Lacle tabata tey presente y a conta kico ta e prome informe cu Polis a suministra riba e caso lamentabel aki.
El a splica cu pa 6’or y 29 melding a drenta via Central cu nan a bin haya un persona sin bida na Sero Largoweg. Ora cu patruya a yega, en berdad a bin constata cu e persona aki no tabata duna señal di bida y tin dos perforacion di bala. Asina cu e team forensico ta na e sitio pa haci nan investigacion pa purba haya mas spoor posibel, pa asina purba relacion’e kico a pasa na prome luga, despues ken a haci’e y despues purba di detene e persona.

Ken e ta
Lacle a splica cu ainda no a identifica e persona. Ta trata aki di un persona masculino cu ta huur un apartment ariba den e cas. Pero no ta sigur ainda si e persona drumi abao ta esun cu ta huur. Despues cu team forensico cla, e ora lo saca afo si ta trata di e mesun persona.

Yen di problema den e area
Ultimo dianan aki tin basta tiramento andando den San Nicolas. Polis ta constata esey den e mutatienan. Pero esey no ta nifica cu e ta relaciona cu e caso aki. Lacle tin confiansa den team di recherche cu lo bay cuminsa cu e investigacionnan aki y conhuntamente cu e team forensico, e prueba cu lo haya ter plaatse lo soluciona e caso aki.
Polis ta pidi pueblo for di awo, pa duna informacion via tiplijn 11141. Mas informacion haya, ta mas lihe por resolve e caso aki. Si wak bon, den ultimo temponan aki, ta haya bon cooperacion for di pueblo di Aruba, y sigur den e caso aki pueblo lo bay coopera tambe.

Bisiñanan
Team di Recherche ta haciendo buurtonderzoek y despues scucha e bisiñanan pa wak kico por a pasa.

Ya pa e ultimo dos pa tres dianan, na diferente occasion a scucha tiro den e area aki. Hasta na dado momento polis tabata duna un asistencia y a scucha tambe na momento cu a duna asistencia den oranan laat di anochi, na un adres cerca, tironan. Pero despues hasta a bin un testigo bin bisa polis riba e persona cu lo a los e tironan, den ki tipo di auto, etc. Pero polis no a topa cun’e. Esey no ta nifica cu e problemanan no a termina. E problemanan a continua den e area aki. Aparentemente cu lo ta un grupo cu lo tin problema cu otro y cu ta buscando otro pa likida. Pero esey tampoco no ta bisa cu esaki lo ta gelink na e caso aki. Investigacion lo duna resultado. Ki ora e caso a sosode, ningun hende no sa. Pero na momento cu a bay paden, a topa cu e persona aki. Aparentemente e cas aki no tin coriente. Esey ta informacionnan di parti di autoridad. E persona aki lo ta bibando su so den un apartamento cu e ta huur y a bin hay’e benta abao y na momento cu a mira cierto marcanan di sanger, etc. nan a hala afo y a bati alarma y pesey mes polis a yega y topa cu un situacion unda cu probablemente nan ta bisa cu e persona aki lo a ricibi un tiro.
Cu otro palabra, el a wordo likida na momento cu e tabata den e camber. Autoridad na e momentonan aki ta haciendo investigacion.