Permisonan pa animeermeisjes ta wordo pidi delanta

Peticionnan ta wordo haci di delanta pa Animeermeisjes. Na momento cu e cumpli cu e peticion y tur cos ta na ordo, siguientemente ta emiti un VTA, esey ta un Voorlopige Toelating tot Aruba.

Cu e carta ey nan ta hay’e na embahada segun Kathy Paskel directora di DIMAS. Esey ta un palabracion asina. E personanan ta bay acudi na e embahada, aunke cu no ta rekeri visa mas desde December 2015, pero mester bay embahada. Eynan ta sostene un combersacion cu nan pa sigura cu nan sa ki tipo di trabao cu nan ta bin haci na Aruba. Ora cu nan keda cla, nan ta biaha pa Aruba y na momento cu nan yega Aruba e fecha ey, mas tres luna, ta vigencia di nan permiso. Nan ta wordo controla semanalmente door di e departamento di Salud Publico y si tin cualkier iregularidad, esey lo wordo gemeld, e ora e periodo di tres luna lo wordo haci mas cortico y nan lo mester bay bek nan pais.

Ora cu e periodo di tres luna caba, pa un persuna di 365 dia, e no mag bolbe Aruba. Ta yam’e un cooling off period. Den e periodo ey e no lo por bin ni como turista Aruba. Si siguientemente nan lo kier aplica p’e, e lo mester ta despues di un aña.

Cuanto permiso pa aña

Bo por calcula e cantidad di e permisonan aki. E ta bay pa zona, ta cuater persona pa bar y ta pa cada momento di tempo. E barnan, cada biaha cuater y cada uno mag di keda tres luna. Dimas tin un lista di e barnan na San Nicolas, cual ta e zona specifico aki. Nan ta esunnan cu ta aplica pa e tipo di permiso aki cu ta un permiso temporal cual e persona por eherce e trabao pa un periodo di tres luna maximo.

Fayo

Den sentido cu tin un bon cooperacion cu e barnan, Dimas ta monitor e cantidad pa bar. Di fayo, si tin resultadonan no positivo pa e parti medico, esaki ta wordo comunica na Dimas y na e barnan. Segun Ruiz-Paskel, di parti di e barnan nan ta haya e cooperacion cu nan mes ta percura pa e persona bay aeropuerto pa nan bay. E control ta contrario na otro tipo di permisonan, cual solamente den e prome peticion ta haci un control y si esey ta bon e hende ta haya e permiso. Den e permiso particular aki, tin un control semanal y semanalmente por surgi algo y esey por interumpi e estadianan legal na Aruba, segun Kathy Ruiz-Paskel.