E presidente di Peru, Pedro Pablo Kuczynski, a renuncia awe, diaranson, for di su cargo, durante un transmision televisa hunto cu su gabinete, segun CNN en Español.
E prome vice presidente, Martin Alberto Vizcarra Cornejo, lo asumi eventualmente e presidencia. Den e caso cu martin Vizcarra renuncia na e opcion aki, Mercedes Araoz, e di dos vice presidente, lo asumi e cargo. Den caso cu e dal un paso atras, ta coresponde na e presidente di e Poder Legislativo Peruano. E actual titular di Congreso, ta Martin Galarreta, parlamentario di Fuerza Popular, partido lidera pa Keiko Fujimori, yiu mayo di e ex presidente, Alberto Fujimori.
E luna aki a aproba, cu mayoria di e votonan den pleno di e Congreso, un mocion cu ta admiti e pedido di vacancia di e presidente di e Republica, pa incapacidad moral. Cu e procedimento aki di e Congreso Peruano, ta admiti pa di dos biaha e debate di e mocion di vacancia contra e presidente Pedro Pablo Kuzcynski. December ultimo, cu 79 voto na fabor, e Congreso Peruano a dicidi pa rechasa e declaratorio di vacancia contra e presidente.
Diaranson, legisladornan di e partido Fuerza Popular, a denuncia cu “e representantenan di e ehecutivo a acerca pa cumpra nan voto en contra di e vacancia di presidente Kuczynski.”
Congresistanan di e partido a difundi un serie di video graba cu camara scondi den reunionnan cu Kenji Fujimori y otro parlamentarionan di e bloke cu e ta lidera.
Un di e legisladornan, Moises Mamami a bisa cu “na December e gobierno a busca pa haci cambio pa e no den e vacancia” y cu desde e tempo ey tabata kier a purba di haya prueba cu “e gobierno ta cumpra congresistanan pa e por keda na poder.”
E supuesto pruebanan di esaki ta algun video unda cu Mamami ta aparece den diferente reunion cu perosnalidadnan cu ta haci’e un serie di ofrecimento riba obra y proyectonan.
E videonan di Kenji Fujimori reuni cu varios congresista ta parce ta extractonan di un mesun reunion unda tabata papia di varios tema, entre nan e cantidad di voto cu ta calcula cu lo duna na fabor di e vacancia di Kuczynski.
Den un parti por scucha Fujimori supuestamente puntrando Mamami “kico bo kier? Obranan pa bo region? Desaroyo? Progreso?” caminda cu Mamami no ta responde.
Den otro parti por scucha Mamami manifesta su temor na wordo persigui pa e Fiscalia, unda cu Kenji lo a responde: “Pakico Fiscalia lo bay persiguibo? Si lo bo tin gobierno di bo banda.”
Den declaracionnan na TV Peru, Kenji Fujimori a bisa di ta lamenta cu su ruman Keiko y Fuerza Popular “ta presta pa practicanan delincuencial y cu ta buscando pa tergiversa informacion.’ El a agrega cu e videonan ta mustra un proceso di gestion cu “cualkier congresista tin cu realisa.” “Ami nunca a ofrece cambio di voto,” Fujimori a bisa.
Keiko Fujimori a bisa na Twitter cu e ta lamenta cu su ruman ta envolvi den e practicanan aki y cu gobierno “ta kere cu placa por cumpra tur cos. Eror. Semper tin Peruanonan balente y digno cu no ta bende nan mes.”
E presidente di e Conseho di Minister, Mercedes Araoz, a bisa den un rueda di prensa cu “gobierno no ta cumpra congresista”. E Congreso Peruano a convoca pa diaranson, un hunta di vocero pa evalua e accionnan legal y constituciona pa loke ta e denuncianan. Di su banda, Ministerio Publico di Peru, lo investiga e contenidonan di audio y videonan difundi.
Kuczynski, di 79 aña, tabata ocupa e cargo for di Juli di 2016.
