Abogado mr. Nancy Gravenstijn a tuma e caso di Presidente di Parlamento, mr. Ady Thijsen. Esaki despues cu otro abogadonan a NENGA di tuma e caso pasobra for di un prome instante a mustra cu esaki ta mustra hopi zwak. Durante tratamento di e caso, e abogado a haci tur intento pa purba convence Hues mr. Sap cu su cliente tin rason dor di manda dos carta pa e periodista Nelson Andrade, un pa mustr’e riba reglanan nobo cu ta aplicabel awor den sala y di dos carta pa prohibi’e di drenta e edificio di Parlamento pa 3 luna largo.
Den su defensa, abogado Mr. Gravenstijn a splica cu no ta trata di ningun regla nobo, sino mas bien di reglanan existente caba cu tur miembro di Prensa ta na altura di dje. Pesey e no ta mira kico por ta e problema di Andrade.
E abogado a splica e Magistrado den Corte cu Nelson Andrade a drenta Parlamento sin pasa via e porta normal, pasobra e miembro di siguridad a traha un rapport bisando cu e no a mira Speed drenta. Riba esaki Hues a puntre ta di unda el a kere e lo a drenta anto, via un tunnel of for di riba dak. Speed mes a splica cu el a drenta pa un reunion cu Parlamentario Rocco Tjon (MEP) y despues e mes a hibe den Sala di Parlamento pa e haci su raportahe, basa precisamente riba e reunion, esta e discusion relaciona cu e logo di Parlamento.
Riba e ponencia cu Nelson Andrade, cu tin un agencia di noticia, lo perde placa si acaso nan limita su entrada den e edificio, e abogado a bisa cu e no ta kere. “Het zijn maar drie maandjes” el a bisa Hues Sap, splicando cu otro reportero di 24ora.com si lo por bin reemplasando Andrade.
E abogado, den nomber di Parlamento, a bisa den Corte cu nan no tin problema cu libertad di prensa, pero cu hasta e libertad ey tin limite y cu periodistanan tambe tin cu tene nan mes na regla. El a hay’e na dado momento cu e interes di pais Aruba y e interes di Prensa. E ta sinti cu den e discusion aki e interes di Gobierno/Parlamento ta bay riba dje.
Durante tratamento di e caso, na dado momento mr. Ady Thijsen mes a hiba palabra pa defende su mes. El a bisa Hues cu Speed a bisa na radio cu e tin mas di 20 aña den e trabou aki y cu e ta drenta Parlamento ora cu e kier y cuanto cu e kier. E declaracion ey e ta considera un menasa serio contra e instituto Parlamento.
Hues a pare na mas di un ocasion puntrande si e ta sinti cu Speed no por bisa esey na radio y unda ta para den ley cu e no por expresa su pensamento. Tambe el a cuestiona Thijsen den cua ley ta para cu e tin e autoridad pa prohibi un periodista of cualkier otro ciudadano di drenta sala di Parlamento pa 3 luna. Hues a puntre tambe si e ta sinti su mes menasa cu Speed lo drenta Parlamento y kibra ley of causa un desordo, pasobra e no ta compronde di unda e ta considera su declaracion na radio como menasante.
Hues a mustr’e riba e hecho cu articulo 82 ta stipula cu un hende cu comporta su mes malo den Parlamento por wordo saca afo. Pa e dia ey! E no ta menciona cu por dun’e un prohibicion di entrada pa 3 luna! Tampoco e ta bisa cu si e persona, den e caso aki Speed Andrade, a duna su opinion na radio, pafo di Parlamento, cu esey ta duna e Presidente e poder di prohibie drenta e edificio.
Presidente Thijsen e medio cuminsa un discusion cu Hues pa cual Hues Sap a bise: “Corda bon cu den Parlamento abo ta Presidente pero den e sala aki ta ami ta Presidente y ami ta manda!”, dunando un indicacion cla cu e no tabata contento cu e fomra con Thijsen tabata papiando den Corte.
Hues na un dado momento a bisa e abogado cu e ta sinti cu Parlamento kier sanciona un periodista pasobra el a sinta riba e stoel di Presidente, den un sala bashi sin un reunion andando. E abogado a contesta cu no, cu ta e expresion cu Andrade a haci na radio. E Hues e ora a lesa e carta cu Ady Thijsen a manda Speed Andrade unda claramente esey ta poni den dje.
E Magistrado a bisa na final di tratamento di e caso sumario cu e tin un bon impresion caba di kico ta pasando aki, e sa caba kico su decision ta y cu mayan caba y no den dos siman manera normal, cu e lo manda su decision via fax pa e partidonan durante dia.
Pafo di Corte, e abogado di Parlamento, mr. Nancy Gravenstijn no a duna ningun declaracion na prensa y a opta pa cana bay su bufete.
