Parlamentario Sue-Ann Ras (MEP): ‘Summer camp di Kids4Bytes a duna un toke di loke ta digitalisacion

Mas y mas nos ta bay den e era di digitalisacion y tecnologia y nos scolnan y sociedad mester forma hende capaz pa por anda cu tecnologia, siñando nos mucha- y hobennan, con por uza e instrumentonan aki debidamente.

Esey ta pensamento di Parlamentario Sue-Ann Ras (MEP). “Awendia nos alumnonan semper ta conecta, semper ta siñando, tanto na scol como na cas y pa e scolnan uza educacion a base di tecnologia, sigur lo aumenta e involvimento di e alumnonan”. Y p’esey e Parlamentario ta contento cu, e team di Innovacion di Gobierno, Futura, cu esaki den mente a brinda les completamente gratis na mas di 60 mucha durante e prome Summer Camp: Kids4Bytes.

Kids4Bytes

Durante 1 siman, un poco mas di 60 mucha mucha entre 7-13 aña, a siña e proceso di coding y traha nan mesun weganan riba computer. Ras a presencia esaki y a keda contento di mira e muchanan den accion. Di e muchanan Ras a comprende, cu esaki ta prome biaha cu nan por a haci tipo di actividad aki. “E interes tabata enorme durante e 4 oranan cu nan tabata haya les pa 5 dia, di e ekipo dinamico Futura, bou guia di Marilis Becker, cu a percura pa siña e muchanan con nan mes por crea wega”, Ras a sigui bisa. “E felicidad, satisfaccion y interes di e muchanan tabata enorme y nan tabata expresa nan mes facilmente tocante kico nan a siña, kico tabata mas dificil, con nan a resolve e problema cu a presenta y cu nan tin masha curiosidad y gana pa sigui sa mas”. Segun Ras, Kids4Bytes definitivamente ta un proyecto cu mester sigui den diferente bario y districto di Aruba y asina hacie un compromiso di colaboracion cu nos comunidad. “E interes t’ey, ya cu tin un lista di espera di mucha masha grandi, cu ta masha interesa di participa na e camp aki”.

TRANSFORMACION DEN EDUCACION

Segun e Parlamentario, e caminda pa crea un ambiente exitoso di educacion ta cuminsa cu un vision y door di desaroya un plan strategico pa conduci cambio y transformacion den educacion, pa asina trece e vision di educacion na bida. “Awendia nos alumnonan ta semper conecta. Segun e encuesta di 2017 ICT, 69% di nos hubentud ta uza computer, laptop of tablet diario of casi diario y 80% ta usuario di internet y casi 70% di henter nos hubentud ta usuario di celular. Pues uzando tecnologia den educacion lo aumenta e compromiso y involvimento di e alumnonan, brindando nan un combinacion di strategia combina di e artefactonan adecua pa siña”, Ras a sigui bisa. E tecnologia corecto por yuda e alumnonan desaroya den e mundo real y adkiri conocemento y habilidad preparativo pa nan futuro carera y formacion personal. Uza tecnologia adecua y structura ta empodera e educadornan pa maneha nan operacionnan den klas eficientemente y ta duna nan acceso na data y contenido pa personalisa aprendizahe pa nan studiantenan. Un curiculo actualisa y cu vision pa un era di digitalisacion, unda ta tene cuenta cu tur e aspectonan di tecnologia, lo brinda un experiencia cu por tin exito significativo y impacto sostenibel cerca cada alumno.

“Nos muchanan mester ta protagonista den e era di tecnologia y nos curiculo di enseñansa mester di un revolucion completo, unda educacion y tecnologia ta bini hunto y asina crea un comunidad cu ta cla pa innovacion y hacie accesibel pa tur hende”, Ras a finalisa bisando.