Den medionan di komunikashon den dianan ku a pasa mi a tuma nota ku tin un mal kontentu formal bou di hulp shofùrnan di bus chikí. Tumando nota di e mal kontentu aki, nos komo representante di pueblo tambe ta bira preokupá.
Nos sa ku Transporte Públiko riba nos pais ta regla den AB 1969 no 23 i tambe su revishon na 2007. Ta trata aki di leinan klarito ku ta deliniá en deatyes kon mester atendé ku e asuntu di transporte públiko na Kòrsou. Ku transporte públiko nos ta referí aki na p.e. bus chikí, taksi, tour wagen i tur otro medio di transporte kontra di pago. Den esaki Gobièrnu tin un obligashon pa nombra un komishon di transporte públiko ku ta konsistí di 1 representante di Gobièrnu, un sekretario di Gobièrnu i tambe miembronan ku ta konsistí di sigur 2 di Gobièrnu i tambe 2 di e gremio, ku ta keda skohe pa medio di elekshon liber i sekreto. For di e reklamonan ku a yega serka nos, por a tuma nota tin un mal kontentu formal ta reina bou di shofùr ouksiliar di bus chikí.
Relashoná ku esaki mi tin algun pregunta pa Minister:
- Unda komishon di bus chikí i taksi a keda?
- Kiko ta pasando ku e komishonnan di bus i taksi?
- Nan ta funshonal?
- Kuantu biaha pa luna nan ta reuní i kuantu desishon nan a tuma?
- Ken ta forma parti di e komishonnan aki?
E reklamo di mas grandi ku e hulp shofùrnan aki tin ta e asuntu di hürmentu di bus. Ta konosí ku un shofùr ouksiliar no por tin su number pasombra e no ta doño di un ruta. Pero tin un reklamo, pasombra nan ta sinti nan usá pa un òf mas persona ku ta abusá di nan situashon. Nan reklamo ta ku tin hende ta doño di dos pa tres ruta pareu.
Pregunta na Minister:
- Esaki ta kuadra ku bèrdat?
- Si asina kon por ta ku un solo persona por tin dos pa tres ruta registrá riba su nòmber?
- Konforme reglanan den e lei ku ta regulá transporte públiko, esaki no ta posibel, pero e hulp shofùrnan ta denunsiando esaki. Sra. Minister por aklará esaki?
Nan ta reklamá tambe ku ta hürnan e vehíkulonan na 125 florin pa dia, loke pa nan ta konsiderá un abusu, sigur mirando ku nan mester traha pa alkansá e 125 florin promé pa paga e bus ku nan tin di hur i despues plaka pa gasolin, pa finalmente produsí algu pa nan mes. Ta ser bisá ku tin un hasimentu di negoshi formal ku e asuntu aki, no solamente den bus so, pero tambe den mundu di taksi, kaminda tambe konosé e fenómeno di shofùr ouksiliar.
Pregunta na Sra. Minister:
- Minister ta na altura di e práktika aki?
- Ta kon e asuntu di hürmentu di bus aki ta hinká den otro?
Kon sra minister lo bai trese solushoná pa e asuntu aki?
