Tin hopi comentario den comunidad, riba rednan social, hasta den medionan di comunicacion, riba e forma cu ta cobra BAVP, BAZV y BBO. Bo ta mira cu e ta mustra manera cu ta un sales tax e ta.
Ta importante pa menciona cu desde introduccion di BBO na 2007, ya caba tin mas cu 10 aña ta traha cu e sistema aki, tabata tin e mesun discusion. Segun Luenne Gomez-Pieters, directora di Departamento di Impuesto, a cuminsa cu un ley e tempo ey cu tabata completamente nobo, caminda cu tabata tin un articulo den ley poni cu e prijsnan mester ta inclui e BBO, esta e omzetbelasting. Tin dos sistema cu tin den ley. Ta tarea di Departamento di Impuesto pa dirigi y informa su clientenan con nan mester por aporta na e BBO, BAZV y BAVP den e caso aki.
Mester cuminsa na e base. Kico ta e sistema cu nan tin, ken ta esun cu ta belastingplichtig pa e BBO y con e mester wordo raporta riba e formulario y riba e factura. Si wak e sistema, tin un omzetbelasting systeem. No tin un salestax segun e directora di e Departamento di Impuesto.
Diferencia
Si wak e ley, e ta bisa ‘belasting op bedrijfsomzetten’ ta wordo cobra riba e omzet.
Departamento di Impuesto, desde inicio semper ta purba di stimula negoshantenan y comercio pa tuma e BBO den nan prijs. Mescos cu ta sosode den invoerrechten, mescos cu tin cu sosode pa gastonan di cargo, tin e gastonan di operacion.
Manera cu por a scucha riba medionan di comunicacion y tambe riba Facebook, cu esaki ta un gasto di operacion. Kico bo ta haci ora cu e gastonan di operacion ta subi, ora cu vrachtkosten ta subi, bo ta hink’e den bo prijs. Bo ta subi bo prijs, Gomez-Pieters a menciona.
Departamento di impuesto ta conseha comerciantenan pa tambe e BBO e tempo ey y awo BBO, BAZV y BAVP, wordo hinca den e prijs. Bo ta evita discusion cu e consumidor y bo ta raporta tambe segun cu e ley ta bisa cu bo tin cu raporta. Loke e cliente ta mira ta loke e prijs cu ta poni den tienda. Si ta bay cumpra un telefon y e telefon ta 100 florin, ora cu yega na e caha, ta 100 florin e cliente kier paga. Discusion ta bay cuminsa ora cu yega na e caha y ta bay paga un tiki mas di loke eigenlijk ta poni riba e prijs. E ta bira un tiki mas fastioso, ora cu e cliente sa cu e porcentahe cu lo mester wordo aplica ta 6%, pero na caha e ta aplica e porcentahe di 6.38%. Esey ta trece tambe cu e cliente ta bisa cu e porcentahe ta 6%, pero na caha e ta paga un tiki mas di loke tin cu paga.
A mira diferente comerciante cu a sali afo y a bisa cu esaki ta segun ley por haci’e. Rekenkundig e no ta malo, segun Gomez-Pieters. Si bo mira kico e comerciante ta haci, tin cu bisa cuidadosamente, pasobra tin cu guia nan den e proceso aki.
Ora bo deduci for di e comerciante cu ta bisa cu e BBO ta un gasto di operacion, e mester por ahusta esaki den su prijs. Eynan bo tin cu paga. Pasobra bo tin cu hink’e den bo prijs. Pero na momento cu bo bisa cu como comerciante cu bo tin un telefon cu ta bende pa 100 florin, e cliente bin, e ta bay aplica e porcentahe di e belastingnan na e momento ey, e ora bo ta bezig ta haciendo di e sistema di omzetbelasting, un salestax. Un salestax ta wentel af completamente e belasting riba e consumidor. Mientras cu t’abo ta e negoshante cu mester draag af.
Riba tur benta cu e berekening cu ta wordo haci y publica, bo ta bay wak cu un riba un, e consumidor ta esun cu ta carga e peso di e BBO, BAZV y BAVP. Si cumpra un producto pa 100 florin, na caha ta calcula 6.38%, e ora ta paga 6.38. E totalidad di vergoeding cu e comerciante ta ricibi for di e consumidor ta 106.38. Ora bo aplica comerciante 6%, esta 106.38, precisamente e 6.38 e consumidor a paga e momento ey. E ora ey bo a cobre 100% di e belasting cu bo tin cu bay draag af.
Pero esey no ta e sistema cu e mester bay. E compensacion di e belastingdruk, e comerciante ta haya den su winstbelasting. Belasting di BBO cu ta wordo paga pa e comerciante ta aftrekbaar 100% di nan winstbelasting. E compensacion pa e gasto di operacion ta bin di e winstbelasting. E compensacion di e gasto, subida di gasto di BBO no ta bin door di aplica un sistema di salestax. E manera cu e mester ta, ta cu bo ta tuma e BBO, BAVP, BAZV mescos cu invoerrechten, mescos cu gastonan di cargo, mescos cu otro tipo di gastonan cu tin, manera si huur subi, gastonan ta subi. Bo no ta bay wak riba factura cu ta bereken otro cos pa huur. Mescos cu BBO, BAVP y BAZV, e prijsnan mester wordo ahusta. Loke a mira ta sosode, e confrontacion entre e consumidor y comerciante, no ta algo cu ta bon, pasobra cu bo ta mira cu e consumidornan ta bira un tiki mas conciente y esey ta bon di kico nan ta paga na momento cu nan ta paga.
Door di bay haci of aplica un sistema di salestax cu bo ta wendel af e BBO completamente riba e consumidor, bo ta hayabo cu e discusionnan aki. E prijsnan finalmente loke tin cu sosode, prijsnan cu tin cu wordo ahusta, eynan cos ta bay robes. Na momento cu e cliente yega na e caha, e ta hay’e cu un 6.38% di belating y e cliente ta reclama cu esaki no ta corecto pasobra e belasting mester ta 6% den su totalidad. Despues e comerciante por trek af tambe e belasting cu ta e consumidor a carga, for di e winstbelasting. Ta algo cu ta crea tension. A haya diferente keho riba e tereno aki. A haya diferente factura di e consumidornan cu ta bisa pa porfabor wak si e ta bon. Pa sali afo cu e informacion corecto. Lo kier bay organisa un conferencia di prensa otro siman caminda cu ta duna un tiki mas informacion riba e tereno aki. Ta intension di Departamento di Impuesto pa sinta hunto cu ATIA y Camara di Comercio cu ta representa e comerciantenan na Aruba pasobra mester por papia como departamento di impuesto hunto cu clientenan cu finalmente ta nan ta aporta na e pago di BBO pa por yega na un solucion caminda cu lo bay presenta esaki na minister.
E solucion cu ta mira cu ta miho y cu tabata den ley caba na momento di introduccion di e BBO, ta cu ta stipula den ley cu tur prijs ta inclui e BBO, BAZV, y BAVP. Esey ta e miho manera, asina cu e omzetbelasting systeem ta traha. Ta wak’e mesun cos na Corsou caminda cu tin un articulo specifico nombra den ley, cual ta articulo 18-A cual ta bisa cu ta prohibi pa un ondernemer stipula un prijs sin inclui e OB den dje, Gomez-Pieters a splica.
