Ora cu no tin argumento valido insulto ta tuma over

Parlamentario drs. Mervin Wyatt-Ras a tuma nota di e forma denigrante cu sr. Endy Croes a dirigi su mes na su persona despues cu Wyatt-Ras a publica un articulo den cual e ta referi na Raad van Advies cu a duna gobierno un “dikke onvoldoende” pa e presupuesto 2018 cu Croes su gobierno a presenta.
Den e articulo Wyatt-Ras no ta djis bisa sino ta trece echonan di e reaccion di Raad van Advies ariba e presupuesto. Raad van Advies ta indica cu den liñanan grandi e maneho no ta suficiente concreto ni ta ser splica suficiente ni ta ser responsabilisa financieramente. Esaki mientras cu lo hisa gastonan.
Raad van Advies ta menciona cu e Nota di Cambio cu a ser entrega djis despues cu a manda e presupuesto pa Raad van Advies mester a wordo incorpora den e presupuesto mes.
Raad van Advies ta reclama gobierno alabes di no a manda diferente rekisitonan manera
1) liquiditeitsprognose
2) gespecificeerd overzicht van de gegeven garanties y
3)overzicht van de vorderingen en schulden per ministerie.
Raad van Advies ta indica alabes cu nan a haci un excepcion pa duna conseho tog pero cu den futuro lo no tuma tipo di concepto di leynan asina cu no ta cumpli cu proceduranan cu ta hancra den ley, es decir cu gobierno aki cu ta pretende di ta integro pero no ta cumpli cu ley.
Raad van Advies ta trece padilanti cu e ta spera cu pa loke ta trata presupuesto 2019 gobierno lo cumpli cu tur procedura describi den ley.
Banda di esey en bes cu gobierno aki a baha gasto paso nan a keha añanan largo, ta keha cu tin mega debe, gastonan di operacion a subi mientras cu gastonan di personal tambe a subi cu 100 empleado extra. Ademas di esakinan inversion tambe a subi.
Por constata pues cu di parti di gobierno no tin niun versobering, pero si ta exigi pa nos pueblo bay paga dentro di poco 6% di BBO. Un mocion entrega dor di fraccion di AVP pa no introduci aumento di BBO a ser rechasa dor di e Parlamentarionan di e “stempel coalitie”.
Notabel ta e hecho cu Parlamentario Endy Croes no a gusta esaki y a bira cataloga Wyatt-Ras como parlamentario di peso pluma. Esaki ta bisa hopi, no di Mervin Wyatt-Ras, kende a pasa varios aña na Hulanda pa studia pa bin traha pa su pais y cu tin un carera profesional y politico amplio y briyante y kende a sabi di mantene simpatia di su votadonan, sino ta bisa mas tanto di e actitud denigrante di sr. Croes.
Segun Mervin Wyatt-Ras sr. Endy Croes mester stop di yora mescos cu su gobierno. Yora aki, yora na Hulanda cu tin crisis pa despues bin tuma medida di crisis, hibando nos pueblo en special esunnan vulnerabel, berdaderamente den crisis.
Por nota cu Parlamentario Endy Croes no a gusta tampoco cu Wyatt-Ras a hasta dun’e rason ora el a papia di stempel di coalicion, paso Wyatt-Ras a mustr’e riba e hecho cu e ta parti di un “stempel coalitie” cu ta forma un “stempel parlament”. Paso loke gobierno bisa e parlamentarionan di coalicion ta haci.
Un stempel parlament ta ora cu miembronan di parlamento na luga di atende den nomber di pueblo cu presupuesto entrega pa gobierno cu nan mester yuda controla, ta converti nan mes den soldaat den prome fila pa defende gobierno cu a manda un presupuesto pa nan controla.
E carera den politica y profesional di Mervin Wyatt – Ras bou di ningun circunstancia ta core paralelo cu esun di Endy Croes, sigur tumando na consideracion tur loke su persona a pasa aden cu husticia, despues di actonan incorecto cu el a haya su mes aden.
Loke e mester corda ta cu tur acto tin su consecuencia y manera bo ta trata otro ta bin trata bo. Esey ta e ley di carma.
Na final Endy Croes na un forma arogante y “ouderwets” manera lo e ta haci cu esunnan rond di dje cu probablemente lo tin miedo di dje, ta haci Wyatt-Ras tres pregunta y Wyatt-Ras tambe kier haci e parlamentario aki tres pregunta:
Endy, bo tambe ta contento y orguyoso cu bo gobierno lo tuma medida den forma di hisa BBO cu 6% riba lomba di nos pueblo?
Endy, bo sa y lo apoya cu a pesar cu bo gobierno a yora 8 aña largo cu tin mega debe y a sigui yora tardando 5 luna pa nan por entrega un presupuesto na Parlamento, awe den e presupuesto nan ta sigui subi gastonan tanto operacional como di personal aumentando e debe cu tanto nan ta critica?
Endy, bo ta consciente cu e medidanan lo conduci berdaderamente na un crisis social cu lo costa añanan pa por yega na un balans social?
Mientrastanto pueblo por conta cu Parlamentario Wyatt-Ras sigur lo sali na vanguardia di nos pueblo.